يا بو قلب الذهب ( حصري )
 

ودي أحب .. و أنحب !

ودي يخطفني هالمُعجب ..


و أقوله لحظه لحظه .. بس آخذ شنطة الميك أب

و ييطالعني بنظرة مريبة و يقول : ما تحتاجين لا حمرة و ولا شادو .. هاري أب هاري أب

أسلّم له إيدي و أغمض عيوني .. ع أساس بنبني عش الحب ..

و أركض وراه .. و كل شوي اسأله : متى نوصل ؟ يجاوبني : شت أب !

طريجك صعب ..

و طبعك صعب ..

و إيدي تعورني .. وقّف شوي .. خل نشرب شاي أو حتى ماي عذب !

قال : چب !!

نفضت إيدي من إيده و قلت : خلاص ستوب !!

حبّك عذاب .. تعب في تعب ..


عصّب !


تلّ إيدي و قال بغضب : مو إنتي اللي قلتي أبي أحب !!!

بچيت

و صحت .. مابي مابي هونت .. أبي أمي و أبوي ..

أبي داري اللي فيها كل شي أحب ..

روح ..

وخِّر عني ..

بس عطني إيدي و قلبي و عيوني .. و كل شي خذيته مني باسم الحب

بس تعال ..

رجعني بيتنا .. كنت مغمضة و ما أدل الدرب !!

عطني اللوكيشن .. عشان أوصل قبل لا يحطمني هالقلب ..

أو أقولك .. أكتبلي عنواني .. برسالة واتس أب

و احجز على أول رحلة نسيان .. حتى لو بالچذب ( الكذب )


يلااا هِدّ إيدي .. حررني منك .. كافي مو غصب !

رد بمسخرة : هيي عبالچ السالفة لِعب !

أبي أبي مابي مابي .. على كيفج يا بنت العشق و الحب ؟!

طولي بالچ .. صبري و بتشوفين العَجب ..

أول القصة عذاب و تعب ..

تاليها سعادة و راحة لقلبچ و قلبي ..

خمس سنين هواش و طراقات و تكفخ .. بس هاااا مانبي سَب !

تالي نتفاهم .. نتناقش .. نتنازل و نبتدي نتقن أسرار اللعب ..

لعبة الحياة و الحب .. و لعبة البقاء في دوامة الشعور .. الصعب ..


سألته : ليش صعب يا .. حبيبي الصعب !

بطّل عيونه على حدّها و ضحك : أخيرا قلتيها يا بنت اللذين آمنوا .. شبّ قلبي شبّ

رديت السؤال : انزين ليش هالشعور صعب .. ؟!


قال : ما عندي جواب .. بس اللي أعرفه أني تعبت .. كان ودي مثلچ أحب و أنحب !

مديت له إيديني الثنتين ..

و قلت له : يلا كمل و امش فيني هالطريج الطويل .. و أنا بكتِب ..

بكتب رسايل و اكتب خواطر و اكتب و اعبي دفاتر أيامنا .. بالحلو و المرّ

بضحك و ببچي و عادي لو شفتني أنتِحب ..

من خوفي ..

نخلِّص القصة و ما أشبع من هالحب و منك ..


يا بو قلب الذهب ( عاد لا تصدق وايد بس عشان القافية )

قرأت كلمات النص وكأنّي أتابع مشهدًا حيًا .

أعجبني كيف جمعتي بين خفة الظل وصدق الشعور

وكيف خلّيتي الحوار يمشي بسلاسة من الضحكة إلى الوجع ثم إلى الأمل.

اسلوبك جميل وعفوي، والنهاية كانت ذكية وخفيفة رغم عمق الفكرة

استمتعت بالقراءة شكرا EvE :SnipeR103:

هلا و غلا يوسسف


الله يسعدك .. مرات الواحد يحتاج يشوف القصة من زاوية مختلفة ..

بعيد شوي عن الجدية و التزمت ..

أعتقد بتصير الأمور أسهل و الحلول أيسر ..

نورت الدار يا يوسف .. و شهادة أعتز فيها فعلا بدون مجاملة ..

شكرا لك ..

ماشاءالله ماشالله تبارك الرحمن ابدعتي ايفي والله واااجد تجنن القصيده والخاطره
المهم انها تجنن حيل اصلا اكثر شي جذبني القافيه وانتي تكتبين الحروف فيها طرب
تطرب المسمع وحتى يطلع الصوت يتردد في الخيال اثناء القرايه يعني اتخيل جمال الخاطره
مع حرف كتتبيه فيه الخاطره بالذات اللهجه الكوتييه حيل تجنن عليها ابدعتي حيل
انا كنت مع الفتاه وهي تمشي مع المششهد واخر شي يوم رضت ومشت
كل هذه المشاهد كانت تجنن خلال القراءه
فعلا ابدعتي وتالقتي يانجمة مسك الغلا ويا اميره
مبدعه دائما ايفي تتطربين مسامعنا وحتى العيون تتحفينا بجمال رسوماتك الفتانه الجمال

دمتي ودام جمال عطاءك يزهر في مسك الغلا
لكي خالص شكري وتقديري
في امان الله وحفظه :نبض:

جميلة بطريقة لطيفة وسلسة
تاخذنا وكأننا نسير معها
خطوة بخطوة حتى النهاية...

يعطيكِ العافية غاليتي
يختم لـ3 ايام مع التقييم

هو يعني لازم تحبي بالعنجليزي ههههه جميل وعذب ك انتِ يا حواء