السلام عليكم

ف البديه اشكر كل من رح يرد علي ورح ادعي لكل من أرشدني بنصيحه تكون حلق بأذني لحد اخر يوم بحياتي

مشكلتي انقلها بين أيديكم بعد توكلي ع الله


انا متزوجة وسلفتي( زوجة اخو زوجي) من بداية زواجنا إنسانه متفتحة بمعنى الكلمة اي بمعنى مثال تضحك وترفع صوتها بالضحك امام زوجي وتتظاهر له وإذا شفتها تبرر بحجه صدفه شفته طبعا احنا ما نكشف على بعض بس هيه الله يهديها تتعمد ان زوجي يشوفها او حتى يسمع صوتها وطبعا انا ما ام ادخل بالنوايا ولكن كل شي واضح وهي تكشف ع اخو زوجي الأصغر من زوجي بحكم انه بعد ما تزوج ولبسها الأغلب بناطيل ضيقه وبلايز شبه ضيقه عند اخو زوجي اللي تكشف عليه وحتى زوجي احيانا بل أغلبيته تتعمد ان يراها وانا لاحول لي ولاقوة ان حكينا ندمنا وان سكتنا قهر
طبعا كلمت زوجي اكثر من مره ويقول خلاص انا احبك وما علي منها وهي قليله أدب وزوجي ولله الحمد إنسان محترم ولكن الشيطان يجري في بني آدم مجرى الدم وهذا ما يخيفني وغير هذا كله هي تحلي لسانها لأهل زوجي وصاروا يحط ونئ هامش عدمي ووجودي واحد وهذا لا يهمني حقيقه اهم شي زوجي أحافظ عليه وتبقى محبتنا والمشكلة ان اليوم تهاوشت انا وسلفتي وقالت انا مو بنت شوارع ومن هالقبيل ورديت عليها وجلست تهددني تقول لزوجها قلت انا عادي قولي وقالت لزوجها أني انا أشكك فيها انها مو متربيه ومو مزبوطه وقام زوجها يعلم زوجي وخاصمني زوجي قال ليش قلتي عنها كذا قلت هيه اللي جالسه تسحبني بالكلام لين جابتها ع نفسهاتبي تتغدا فيني قبل أتعشى عليها وتدور الزله علي المهم خاصني وقال خلاص لأعاد تساعدينها بالمطبخ اذا جوها ظيوف وهي ما تساعدك وبينكم بس السلام وانا الحمدلله قلت أحسن أصلا. ما ابي احتك فيها ابركها من ساعه ولكن اللي قهرني بالموضوع اخت زوجي تساعدها اذا جاها ظيوف ويجلسون مع بعض رغم ان كان بينهم مشاكل بس سبحان الله مغير الأحوال وأنا مااحد يساعدني اجلس لوحدي والله احزن وأخت زوجي للأسف وقفت مع زوجة اخو زوجي ضدي ونسيت كل جميلي ومعارفي معهم وجحدوا طيبي وانا جالسه ابكي وأقول يارب تنصرني ع من ظلمني لان انا الخسرانه كنت ابي الحق ويوقفوا سلفتي عند حدها وحطوني الغلطانه واللحين لمن يجيني ظيوف بجلس اكرف لوحدي وماعندي لا عمه تحبني ولاشغاله ولا بنات أدعو لي بالذريه وانصحوني كيف أتعامل مع هذا الصنف؟؟ وإذا جونا ظيوف احس احراج كأني مقطوعة من شجره ماحد يساعدني وأخاف من هرج الناس ؟؟انا محتاااااره أرشدوني وحسبي الله ونعم الوكيل ع كل من تفرق بين حريم عيالها وكل بنت توقف مع وحده من زوجات إخوانها وتترك الباقين وتفرق ف المعاملة بين وحسبي الله ع كل زوجة تتمايع وتتظاهر امام رجال مو من محارمها

والله يا اختي بصراحه مشكلتك يبي لها صبرر

اول شي احب اقوله لاتنتظرين احد يساعدك لان هذي مسؤوليتك وهذا بيتك ولازم تديرينه بنفسك

اذا جو عندك ضيوف وكانو ضيوفك انتي فـ/ لازم انك تضيفينهم بنفسك وتهتمين بضيوفك

اما اخت زوجك اللي تساعد سلفتك ماعليك فيها خليها تساعدها يعني انتي اطلعي من هالموضوع لاني اشوفه مايخصك

ولكن ضيوفك انتي احق فيهم

ولازم تضيفينهم بدل مايضيفونهم خوات زوجك يعني لاتقولين ذي ساعدو فلانه وماساعدوني
لان هذولا ضيوفك انتي و من حقهم مايساعدونك لانهم ضيوفك مو ضيوفهم ومو مجبرين يضيفونهم

انتي مثل ماعزمتيهم تحملي ضيافتهم بنفسسك

وبعدين بلاها هالمساعده يدخلون مطبخك ويفتحون اغراضك
يعني انتي ترضين احد يشوف اشياء شخصيه لك ويشوفون كل شي بالمطبخ حقك ؟؟
ويشوفون ترتيب كل شي ويناظرون وش عندك ووش ماعندك

وتجي الميانه ويفتحون دوالايب المطبخ واشياء تخصك ؟؟؟ واخر شي بيتكلمون عليك

شفتو مطبخها كيف وشفتو ماتعرف ترتب ماعندها مدري ايش ويتكلمون بكلام مال امه داعي

وعاد احنا ابخص الحريم فيهم فضول مو طبيعي وكلامهم زايد عن حده حتى على اتفه الاسباب بتطلع عيب وتتكلم عليك

يعني بالله عايدي عندك يدخلون مطبخك ويفتشون ويناظرون بكل صغيره وكبيره ؟؟؟

نصيحه / خلي بيتك مملكتك وخاص فيك وحطي عليه خطوط حمراء محد يتعدى على شي مايخصه

بالنسبة لسلفتك بصرااحه جدا وقحه وخصوصا انك قلتي تلبس ضيق وتتعمد تسوي هالحركات

هذي مو حركات بنت رزينه بصراحه انا مابي اقول انها مو متربيه لان اهلها مساكين ربوها بس هي مافيها خير

عشان كذا مارح نقول انها مو متربيه ونتلفظ عليها بالفاظ مو حلوه لان بيعتبر قذف وهذا مايجوز

الله يهديها ويصلحهااا ومثل ماقال صائد افضل شي روحو بيت ثاني

وخليك منعزله عنهم وحطي حدود وبعدين يختي احسن انهم يخلونك مهمشه محد يكلمك والله انه ازيين لك

مريحه رااسك وش تبين بكثرة الاحتكاكات والسوالف ترا كثرة الاحتكاكات مامنها الا المشاكل

لكن لو جلستي منعزله بعيده عنهم بترتاحين وهذي نصيحه مني لاتدقين حنك معهم وتسولفين كثير

خليك ساكته وحتى لو سكتي بيتكلمون عليك ذي شايفه حالها وووو الخ انتي طنشي وسوي اللي يريحك

ترا حتى الساكت واللي في حاله مايسلم من السنة الناس ولكن اهم شي انه مريح رااسه ولايهتم لكلامهم

لان هذا الشي لمصلحته لابتجيه مشاكل ولاوجع رااس وانتي ان بغيتي راحتك امشي بنصيحتي

خلي بينكم سلام عشان ماتصير قطيعة رحم ومو اكثرر لاتعطين احد وجه زياده عن اللزوم

ولازم تنتقلين بيت ثااني بدل وجع الرااس اللي انتي عايشه فيه

اسال الله ان يوفقك ويمدك بالصبر على ما ابتلاك من هذولا البشر

وان شاء الله اكون افدتك ولو بشي بسييط

دعواتك لي ولأسرتي

آلمتفائله ..