يالفاتنه, يالطاهـره , يالاصيلـه
يالناعمه , يالهاديه , يالخجولـه

يالظامره , يالراويـه , يالطويلـه
يالناعسه , ياأم الرموش الكسوله

يالمقبله صبحٍ تعب منه ../ ليلـه
يالمقفيه ليلٍ يعيبـه ../ خمولـه

تمشين , أقول ان الوطا فيه "ميله"
واذا وقفتي , قلت "منهو يقوله؟!"

وجهك يسولف عن كثيره ../ قليله
والقل فاضح لـلاوادم فضولـه!!

اذا تكلمـتـي أعــدك بخيـلـه
حتى كلامك مايجـي بالسهولـه!

ولا حروفك مالها فيـك .. حيلـه
تمـرّ شفّتـك وتطيـح "مهبولـه"

اذا تبسمتـي بـروق المخيـلـه
تعب يدرّسها الزمان ل.. فصولـه

ضحكتك سيل و في عروقي مسيله
يالله لا تحـرم فياضـي وصولـه

والأزرق اللي فوق جسمك يشيلـه
وده يسولف عن هنـاه وذهولـه

كنه (سماء) لولا شجره ونخيلـه!
كنه (بحر) وانتي محَـاره ولولـه

فيك الطباع الطاهرات , الفضيلـه
فيك الصفات المغويات , المهوله!!

أحيان , اشوفك كايـده مستحيلـه
واحيان , أشوفك مقبله لي عجوله