منتديات مسك الغلا | al2la.com - ضياع وكبت || بقلمي ||

يارب يارب يا معبود وش جاني
لو زان وقتي دقائق شانت أحواله

أعيش حالة ضياع وكبت وآعاني
والقلب ينزف جروح وحالته حاله

البارح الحزن سولفني وغنّاني
وعلى تراتيل آهاتي جرّ مواله

يسريبي الضيق يوم الصمت سرّاني
على دروب الشقاء بخطوات مختاله

الهم والغم والأحزان عنواني
والجرح شيّد بعرش الروح منزاله

عطشان فرحة ودمع عيوني أرواني
والليل خرمان يشرب عمري بياله

يموت كل الكلام بطراف لساني
وشلون أفضفض بقلبن ماتت آماله

أغلى ضيوفي رسالة نصفي الثاني
الموت الأحمر قريته داخل رساله

أصدق جروحي تقهوى دمّ شرياني
والعمر فاله وراحة عمري عقاله

الصبر سافر مع أصحابه وخلاّني
كل ما تمسّكت به خانت بي حباله

مات الأمل في ظلام اليأس وأعماني
والموت صدر الحزين المختنق شاله

حزني عميق بوجيه النّاس عرّاني
لو ودي أخفيه يصفقني على جاله

من صغري الحزن يكتبني ويقراني
ما كني إلا الوحيد اللي على باله

لو غاب عني دقائق صعب ينساني
نبقى حبايب وهو خالي وأنا خاله

يومن ورى يوم وأنا يزيد حرماني
والوقت رجال خائن زايد إهماله

أكتب وأنا الدمع يحفر محجر أعياني
والقلب ينبض ألم والحال يرثاله

تعبت أعيش الحياة أحزان بأحزاني
وش حيلتي والعمر ماشي على فاله

يا قلبي أرجوك لا تبكي على شأني
والحظ ما يوم عمرك ذاق فنجاله

تحطّم الروح صعب يعمّر آماني
والحلم شيخ ٍ كبير وماتوا عياله

من أمس وأنا أطلب الله يتوفاني
إن كان بالموت حالة غير هالحالة

{ سراب الشعر }