وعليكم السلام ورحمة الله وبركاته

أولاً لازم نعرف ان الخوف شعور طبيعي، كلنا نخاف من المستقبل، ونخاف من صواديف الأيام
لكن الغير طبيعي أننا نخاف من أي شي ومن كل شي، لأن الحياة راح تفقد رونقها وبهجتها، وتخلينا أشخاص انطوائيين باهتين
فيه دراسه نفسيه أجريت على عدد كبير من الأشخاص، وكانت نتيجتها صادمة
" 85% من مخاوفنا لاتحدث "
نسبة عالية جداً !!
بمعنى آخر "15% فقط من مخاوفنا هي التي تحدث فعلاً"
إذاً .. هذه المخاوف مجرد أوهام
وعشان نتخلص من هالشعور المزعج لازم نسوي عدة خطوات .. منها:
- لازم نزيد ايماننا وثقتنا بالله عز وجل، ولازم نتيقن أن ماأصابنا لم يكن ليخطئنا، وماأخطأنا لم يكن ليصيبنا، وأن الناس لو اجتمعوا ليضروك بشيء فلن يضروك إلا بشيء كتبه الله عليك.
- حدد الأشياء اللي تخاف منها وحاول انك تتغلب عليها بشتى الطرق، إذا كنت تخاف من الكلام قدام الناس، وقف قدام المرايه بدون خجل واتكلم .. قل سالفه، قل نكته، تدرب على هالشي، بالاول راح تحس نفسك مرتبك وخجلان، بعدين راح تتعود وتحس بالفرق، وإذا كنت تخاف من اتخاذ قرارات مهمة، عود نفسك على الحزم والحسم، وقل لنفسك هالحياة راح اعيشها مره وحده، لازم أعيشها بالشكل اللي يرضيني، أهم شي انك ماتضر أحد، واجه مشاكلك ولا تهرب منها، الهروب هو اللي يخلي الواحد عايش بدوامة القلق والخوف، والخوف يقتلك ألف مره، بينما المواجهة تخليك تحط حد لهالمشكلة حتى لو خسرت، المهم انك أرضيت نفسك وعملت الشي اللي انت مؤمن فيه.
- وسع مداركك عن طريق القراءة والإطلاع ومشاركة الناس في أفراحهم وأتراحهم، حس انك عضو فعال في هالمجتمع، كل مااقتربت من الناس أكثر أحبوك أكثر، وإذا حبوك راح تزيل العوائق اللي بينكم، وراح تتشجع أكثر.
- لازم تعرف ان كل واحد في هالدنيا مشغول بنفسه وعنده همومه اللي تشغله عن الآخرين، يعني لاتتخيل ان الأنظار كلها مسلطة عليك.
- ردد دائماً كلمات تفاؤلية، وحاول تتصادق مع ناس متفائلين، وابتعد قدر المستطاع عن الناس المتشائمين، صدقني التفاؤل طاقة ايجابية كبيرة.
- لاتفكر بأخطائك كثير، كلنا نخطي ونصيب، وكلنا مرينا بلحظات فشل ونجاح، أغلب الناجحين مروا بلحظات فشل مروعة بس إرادتهم كانت أقوى، إذا " لاتخشَ الفشل".
- لازم تفرق بين "الخوف" و "الحِلم"، أحياناً واحد يغلط عليك وتسكت مو لأنك خايف، لأنك متسامح فقط. وهذي خصلة حميدة وتدل على شخصية قوية، لايهمك اللي يقولون ليش مارديت عليه انت جبان انت خواف، ويمكن هالصوت ينبع من داخلك .. لا، انت كسبت نفسك وتعاملت مع الموقف بحكمة. مثلاً .. واحد ضايقك وانت ماشي بسيارتك، لف عليك والا طلع يده مع النافذه وقعد يسب فيك، ابتسم وخلك ماشي، لأن المواجهه هنا مالها معنى، يمكن الشخص الثاني مو في وعيه، ويمكن ماعنده شي يخسره، أما انت عندك أشياء تخسرها. لاتقول لنفسك بعدين انا كنت جبان، لأن الشجاعه هنا تعتبر تهور، والحكمة تقتضي معاملة الناس على قدر عقولهم.

طبعاً هالمهارات لازم تتعلمها وتقتنع فيها
ولازم تعرف انها تجي بالممارسة والتدرج
ماراح تصحى من النوم وتحس نفسك أشجع رجل بالعالم
لازم تتدرب، لين تصير هالقناعات مغروسه في عقلك الباطن
عذراً على الإطالة
ولكن الموضوع مهم ويعاني منه كثير من الناس ..
حتى أنا أعاني منه، وكل الخطوات اللي قلتها طبقتها على نفسي وفيه غيرها كثير
تذكر .. الحياة حلوه، وعشان نحس بحلاوتها لازم نبادر ونواجه ويكون إيماننا بالله أكبر من كل شي