البارحه مع هاجس الليل والخوف
ذكرتها واوجست بالقلب خيفه

ذكرتها والشرع واضح ومعروف
واخذت اتبع مذهب ابوحنيفه

اشوف عاطف يستغل عطف معطوف
واقول ماتقوى النفوس الضعيفه

ماتشفي جروحي كثيرات الحروف
ولا حدٍ تجي دنياه دايم بكيفه

منها لزمت الصمت لااسمع ولا اشوف
أبكي وتضحك كل نكته طريفه

من كثر مامريت بااحزان وظروف
صارت ثقيلات المآسي خفيفه

زمان صدق اشتاق واجيك ملهوف
جربت برد شتاك وجربت صيفه

الذل كنه طير يحوم ويطوف
ماتدفنه مر الظروف العصيفه

خرجت عن طوري وعن كل مآلوف
والجرح يسري في ضلوعي نزيفه

بعض الولايف يرمي الجرح ويلوف
يكسي من ثياب المذله وليفه

وبعض البشر ثقيل دم وملقوف
وبعض البشر خفيف عقل وهديفه

وبعض البشر ميت وهو حي يشوف
وبعض البشر حي وعيونه كفيفه

وبعض العرب اسمه من الطيب محذوف
عايش حياة ماعليها الحسيفه

الطيب وسط الكفن صار ملفوف
رجيت ربي في جنانه يضيفه

ياخوك اكرمهم معازيب وضيوف
الجود انت معزبه وانت ضيفه

واوجب لهم واذبح من العدل خروف
والجار قدره مثل قدر الخليفه

والا الردي عشاه مايل ومعكوف
خالي من علوم الرجال الشريفه

يبقى مثل بيت بلا ساس وسقوف
يعني مثل بنت الطبيب السخيفه

احسن يموت ولا على موته حسوف
تقضي عليه بوسط داره قذيفه

مليت اصدق كذب بدموع وحلوف
بعد الفصول المرعبه والمخيفه

مهما يطير الطير والريش منتوف
يعجز عن طلوع الرجوم المنيفه

اطرد سراب الحلم والجرح منزوف
وابحث عن حلول الضباب الكثيفه

لكن شعاع الشمس غايب ومكسوف
والليل يجني نور شمس كسيفه