منتديات مسك الغلا

 


موضوع مُغلق
 
LinkBack أدوات الموضوع انواع عرض الموضوع
قديم 02-28-16, 12:43 AM   #13
إحساس طفله

الصورة الرمزية إحساس طفله

آخر زيارة »  11-21-23 (09:06 AM)
المكان »  بِـ مملكتـي
الهوايه »  آلشِعـــــر ..
- يَآربَ أسآلكَ رآحَه تِستوطِن
- قلوبنآ بعرضِ سمَآئك .!,
MMS ~

 الأوسمة و جوائز

افتراضي



يتبع الفصل الخامس…
.
،
.
في منزله بالدمام..
رن جرس هاتفه بشكل ازعجه.. فتح عينيه و هو يبعد عنه البطانيه الثقيله… شعر وكأنه نام دهراً..رأى ساعة هاتفه تشير للخامسه بعد العصر.. فإعتدل واقفاً بهلع.. فقد فاتته صلاتي الظهر والعصر..
اتجه لدولابه و اخرج ملابس نظيفه وضعها على طرف السرير ثم اخذ منشفته و اتجه فوراً الى الحمام ليغتسل و يتوضأ.. وخرج وأذن لوحده وصلّى ..

بعد الفراغ من الصلاة ..تذكر انه قد وصل هنا وقت صلاة الفجر.. حضر الصلاة في المسجد وبعدها عاد للبيت وغرق في نومه..
اخذ ساعته ليضعها في معصمه وهو يشعر بصداع البارحه يعاوده .. في هذه الاثناء رن هاتفه للمرّه الألف ثم اخذه ليرد. واستغرب من الرقم الغريب/الو…

تغيرت ملامح وجهه اخذ مفتاح سيارته و لوازمه الشخصيه.. وخرج مسرعاً يكمل حديثه وهو مقطباً حاجبيه/طيب اخوي.. اي مستشفى؟!..
/
/
/
/
/
/
اخذت شعرها جانباً محاولتاً تسريحه..لكن يدها المتورمه تمنعها،اخفضت يدها لتريحها و تذكرت ما قاله لها الطبيب قبل خروجها من المستشفى (رحمك تأذى كتير ..بسبب الركض على الخيل وركوبها ممنووع وانتي بوقت الدوره.. لو انك اكتفيتي بالمشي خفيف كان ما تأثر بالشكل ده…….. صعب اقولك الكلام ده و لكن للأسف مضطر أقولك بأنو اصبح من الصصصعب حدوث حمل لو تزوجتي مستقبلاً)
..انكسر قلبها واشتعلت نيرانه من الحرقه هو بسبب ذلك الحقير...
ومن جهه اخرى ظهرها به ندبه تحرقها.. كل هذا بسببه.. لن تغفر له.. ستؤذيه لكن بشي يكرهه، ستحرق قلبه وتحاول كسره كما جعلها انثى ناقصه..!
فكرت وفكرت لكنها تعجز عن معرفة ما يحرق قلبه كما احرق قلبها..

لحظات ودخلت شيهانه وبصحبتها البنات وصايف وصيته ودلال..

صيته بابتسامه/هاا شلونتس اللحين بنت عمو عساتس احسن

سلهام مثلت القوه فهي تكره الاستضعاف لأحد مهما بلغت من الألم..ابعدت شعرها للخلف بابتسامه/اي بخير الحمدلله

وصايف بنعومتها المتناهيه جلست عندها وهي متعاطفه معها خصوصاً بعد رؤية يدها المتورمه/بسم الله عليك وش هاللي بيدك يا سلهام

شيهانه شعرت بالخوف لو تحدثت سلهام بما حدث او ماذا أصابها جراء ما حدث/…

سلهام ليست بتلك السذاجه والضعف،ابتسمت/الممرضه يدها ثقيله شووي.. حطت لي ابره كبيره.. ونزفت وبعدها قررت تنزعها و بعدها حطت لي ابرة اطفال من هنا.. والحمدلله مشي الحال بس بعدما ورتني الويل

شيهانه ارتاااحت انها خذلتها ولم تخبرهم ..وابتسمت بنفس الوقت لقوة عزيمتها..

دلال/طيب بيروح هالبنفسجي والاحمر هذا او لا.. حرام والله تشوهت يدك

سلهام وهي تشعر بعدم الراحه لإطالتها الجلوس وظهرها يؤلمها/طمني الدكتور يقول كلها اسبوع اسبوعين وتروح هالالوان من البشره..

صيته بأسف/سلهام طلبتك ..لا تواخذينا باللي سواه تميم.. تراه متهور و محد منا سلم من تهوره

سلهام بعد صمت ثواني/انتم مالكم دخل..ليش ازعل منكم… اللي أخطأ هو بس اللي بيتحمل خطاه

شيهانه وهي تحاول تصريف البنات لتحادثها في امر مهم/بنات ‏يلا روحوا جهزوا باقي الاشياء.. مانبي تجي الساعه 8الا وكل شي جاهز.. ترى العزيمه في البر مب مثل عندكم في المدن.. يلا

صيته فهمتها/تااامرررين.. يلا بنات.

خرجوا البنات وضلت شيهانه المتردده/سلهام..

سلهام شعرت بفضولها.. لابد وان تعرف شيهانه ما يحدث،هي الآن بمثابة الاخت والام..و هي تؤمن ان شيهانه لن تخذلها ابداً فلقد عرفتها عن كثب..

شيهانه اقتربت منها/ وريني ظهرك ابشوف وش فيك كل شوي تمسكينه

سلهام/لا عمتي مافيه شي صدقيني

شيهانه باصرار لفت وراها/انا حلفت لتوريني ظهرك.. من جيتي من الخيل وانا اشوفتس تمسكينه وكأنه يحرقتس..

سلهام استسلمت لها وتركتها ترفع البلوزه وهي خائفه.. كانت صوره منحنيه مثل القوس لضربة العقال القويه.. وقد تحول لونها للبنفسجي!!

شيهانه تغيرت ملامح وجهها بعدما رآت مكان الضربه في ظهر سلهام وتبادر لذهنها وجود تميم بغرفة سلهام بالمستشفى وخوفها منه.. استنتجت ان تميم لابد وانه قد أذآها لا محاله،
جلست امام سلهام/واضح انك انضربتي.. تميم صح؟

سلهام لا تفتح قلبها لأحد بسهوله/انا اقول خلينا نروح نساعد البنات احسن مـ..

قاطعتها شيهانه بحزم/وش يعرف عنتس تميم؟.. و ليش جابتس ابوتس هنا، ابيتس تحكين لي الحقيقه.. ابي اعرف ماضيتس بالبحرين كيف كان.. ابي اسمع منتس انتي.. لاني سمعت اشياء من تميم ماعجبتني.

سلهام فهمت ان تميم قد تحدث مع شيهانه بخصوص البحرين ولكن لا تعلم ماذا قال لها ذلك المهووس. تنهدت وهي مُكرهه على الحديث عنه.. لكن لابد لها ان توضح بعض الامور لعمتها/بالبدايه ابيك تفهمين اني ماعمري غلطت غلطه تسود الوجه ولا ارتكبت ماحرم الله

شيهانه وهي ترفع حاجبها الايسر بعدم رضا/كفايه انتس كنتي متبرجه، تطلعين بدون عبايه ومصاحبه واحد.

سلهام لمعت عينيها بألم/كنت… لكن اللحين ورب الكعبه لا وتااايبه.. عمتي ابيك تسمعيني انا وتفهميني..انا من جيتكم مارحت مكان وماقابلت غيرك انتي وبنات عمي كيف تبيني اغلط الغلط اللي يخلي تميم يتحرش بي ويأذيني..و بالاخير تسبب في حرماني من الامومه..

شيهانه خافت من حديثها وكلمة "تحرش" زاد الامر سوءاً في نظرها.. كانت تظنه لم يصل لهذه المرحله!!
،تعاطفت معها حينما تذكرت كلام الطبيب بهذا الشأن/سلهام حبيبتي.. اوعدك اول ماتتزوجين اسعى في علاجك.. وراح تكونين أم بإذن الله لا تيأسين من اللحين..

سلهام في حالة حزن لم تتوقعه..لأن فكرة الحرمان من انها تكون أم تقتلها الآن "نزلت دموعها بقهر"/انا اللحين ناقصه..وش الفاايده من الزواج ماراح أورط اي رجال بزواجي منه..

شيهانه سكتت فهي لا تملك مواساه لها، وهي اصلاً فقدت وليدها بعد شهور من ولادته منذ سنوات ولم تنساه للآن.. نزلت دمعتها عفويه..

سلهام استغربت دمعة عمتها وحزنتها اكثر، فـ عمتها اصبحت في منزلة غاااليه بالنسبه لها/لا عمتي ليه تبكين اللحين، خلاااص انا اصلاً معاد ابي اطفال يلا بلا دموع تكفين

شيهانه ابتسمت وهي تمسح دمعتها/تذكرت ولدي.. توفي وعمره 10شهور..

سلهام نزلت دمعتها فوراً/كان عندك طفل؟ يعني كنتي متزوجه؟

شيهانه اكملت حديثها عن طفلها بابتسامه مخضبه بالدموع/كان اسمه عبدالله و نناديه عبود..كان حلوو وضحكته تجنن الكل كان مجنون فيه. ماكان يشكي من شي.. صحته كانت حلوه.. فجأه بدون سابق انذار بيوم من الايام قمت من النوم.. واتجهت لسريره كالعاده و مديت يدي ابي اصحيه لانه معودني يصحي قبلي، يده كانت متجمده و وجهه ثلج.. ما يتحرك ابداً.. صرخت وبكيت و اجتمعوا حولي ..وبعدها عرفت انه توفي…

سلهام تأثرت ونزلت دمعاتها/بأذن الله يكون شفيع لك.. طيب وزوجك وينه عنك؟

شيهانه بأسى/توفي بحادث سقوط طيارته برحله تدريبيه.. هو كان طيار حربي..تخيلي توفي قبل يعرف اني حامل.. ظليت بفترة حداد 9شهور لأني حامل.. وبعدها خاواني الحزن لين يومتس هذا من سبع سنوات..

سلهام اقتربت من عمتها وضمتها وهي تبكي/ااسسفه اني بعثرة احزانك.. ياليييتني سكت يااالييت..

شيهانه لم تعلّق ..أكتفت بالدموع التي لطالما كانت تحبسها..
،.
،
..
،
في الدمام..
المستشفى العام..
دخل وهو يستعجل خطواته.. سأل عن أبن عمّه في الاستقبال.. وذهب له..وهو مرعوب مما سيراه.. ماذا حدث له.. ولماذا اتصل به ولم يتصل بأخيه تميم!!

رأى شرطيان يقفان امام غرفته ومجموعة رجال عرف بعضهم.. وحاول الدخول/لو سمحتوا

الشرطي/ممنووع.. انت من؟

حاكم ازداد خوفه/أنا ابن عم صقر البراك

الرجال التفتوا له.. وتقدم له اثنان منهم وحاولا ان ينالا منه.. ولكن الشرطه منعتهم..
مشاري الصارم بغضب عاارم/ووورب البيت لأخذ بثاري وثار عيال عمي يا حاكم..

حاكم بهدوء رجل عاقل/عيّن خير يا رجال..

مشاري وقصده توق اللي احترق قلبها عليها/الخير كان قبل تاخذ شي مهو لك..

حاكم مافهم عليه/!!

مشاري اقترب منه بحيث لا احد يسمعه سوا حاكم/بنت عمي والله ان تموت دونها والله ما تاخذها وانا مشاري

حاكم يفور دمه غيّره وهذا يخوض في سيرة زوجته بل معشوقته/ان قدرت لا تقصر.. وثاني مره خلك رجااال و لا تجيب طاري زوجتي على لسانك

مشاري ارتفع صوته/تخسي وتعقب.. والله ما تفوز بها والله

حاكم التفت للشرطي وهو يؤشر بأصبعه على مشاري/ترى وجود هالمخلوق في المستشفى ما يصلح.. ازعج المرضى بنباحه

مشاري انقض عليه ولكن مسكوه بالقوه/أنا كلب يا للي ماتستحي..

حاكم ابتسم على غباءه ودخل غرفة صقر واغلقها متجاهلاً حديث مشاري…

دخل عند صقر ورآه ملقى على السرير، يده مكسوره ويبدو عليه الشحوب لابد وانه فقد كميات من الدم/سلامات يا صقر.. ماتشوف شر

صقر وهو مرعوب من ردة فعل اخيه الشرس، كان متوتر/الشر مايجيك.. حاكم انا مالي دخل.. والله مالي دخل.. عيال عمي هاجد هم اللي ثوروا في عيال ال صارم.. انا ماكنت ادري ان معهم رشاش

حاكم فتح عينيه على اتساعهما/وشووو؟!! لاحول ولا قوه الا بالله العظيم… طييب عساه ما توفي احد

صقر وباين عليه الخوف/مدري.. اكيد فيه وفيات عيال عمي هاجد مساطيل..

حاكم عقد حاجبيه وهو يشعر بأن كل شي يأتي ضده وضد علاقته بزوجته ولكن المهم الآن يجب ان يُخرج ابن عمه من هذا المأزق/صقر طلبتك قول لي الصدق انت ما رميت احد؟ وما استخدمت سلاح؟

صقر بتوتر/حااكم اقسسم بالله اني مالمست سلاح.. انا ناديتك انت وماقلت لتميم ادري انه بيسود لي عيشتي.. بيذبحني

حاكم فهمه/لا تقول كذا ..اخوك يحبك.. صحيح انه شديد عليك وعصبي.. بس تراه يفديك بروحه لو صابك مكروه..

صقر وهو بحالة هلع/حاكم وش يبون مني الشرطه انا ماسويت شي اقسم بالله ماسويت شي… انا حاولت أمنع عيال عمي بس انهم ماكانوا طبيعيين.. ماقدرت اسيطر عليهم فجأه بدأت الهوشه.. وعيال ال صارم هم اللي بدأوا بالسب والشتم..

حاكم وهو يربت على كتفه/خلاص اهدأ وانا اخوك دامك ما سويت شي.. اكيد بيفكونك..ماقلت لي وين عيال عمك الباقين

صقر بحزن/في العنايه.. كلهم اصاباتهم خطيره

حاكم بضيق/لا حول ولا قوّه الا بالله ..الله يشفيهم ..انا طالع اتصل بعمي هاجد والباقين وأزور عيال عمي هاجد بعد..

صقر بخوف/حااكم لا تخليني لحالي طلبتك

حاكم/عيييب عليك ذالكلام تراك رجاال ..خل قلبك قووي ما يهاب. دامك ما اخطيت ليش تخاف!! وبعدين انا هنا حوولك مانيب رايح مكان.. شوي ازور عيال عمك بالعنايه واجيك، سلام

صقر هنا سكت ..وهو يرى حاكم يخرج..
.
،
.
خارج غرفة صقر..
حاولوا يهدونه لأن التهور في هذا الظرف ليس من صالحهم.. لكن مشاري رفض الانصياع لحديثهم وتوجه لغرفة صقر وهو يقصد حاكم…

اتجه لحاكم الذي يخرج من الغرفه وصوب سلاحه تجاهه من مسافه بعيده واطلق عياراته الناريه في تصرف أرعن ينم عن كراهيه و حقد دفين…
،
.
،
.
،
.
،
.
دخل البيت مُرهق القلب بعدما خرجوا اخوانه كلهم من عنده.. شعر بضيق فهم يضغطون عليه..
جلس في أقرب مقعد في الصاله الجانبيه.. اخذ نفساً عميقا واغمض عيناه على مضض..
وفتحهما بعدما سمع صوت صغيرته المدلله تهمس عنده بإسمه/يبه..

توق جلست عند قدميه وعيناها تغص بالدموع،قبّلت يده ورفعت عيناها له مجدداً/ان كان زواجي من حاكم سبب لك اذيّه ومضيق لك صدرك.. اتصل به اللحين واطلب طلاقي.. تراني يبه افضل اموت وماشوفك ضايق ومقهور

بو ناصر وضع يده على راسها وهو يبتسم/انتي عارفه سلوم قبيلتنا ..انا عطيته والرجال ماتسترد العطايا.. وهو حافظ عليك ويستحقك.. لو هو رجل غير حاكم كان ماترددت.. لكن حاكم محد يقدر يرده او يسوي فيه هالسوات. .سمعته طيبه وصيته بين الرجال عاالي ماقد شفت من يذمه... وانتي اجمل واثمن عطيه اعطيها لأحد بحياتي و الحمدلله زوجك من اطيب الرجال.. لا تزعليني منك وتطرين طلاقك.. ناسيه اني سمحت له يكلمك ويجيب لك الهدايا!

توق ما صدقت ان حاكم يستأذن بوصالها واهدائها وهي حلاله/يعني هو استأذنك؟

بو ناصر هز رأسه بالإيجاب وهو يبتسم لردة فعلها/ايه.. وكل شي بعلمي.. ماقلت لك هو الرجال اللي اقدر آمن عليك عنده

توق كبر في عينها هذا الحاكم اكثر من السابق، اكتفت بالسكوت والابتسامه...

بو ناصر وقف ووقفها معه/انا عطيتك للي بيحافظ عليك باذن الله.. عسى ربي يوفقك..و لا تشيلين هم هالمشاكل.. هذي تخصني أنا.. وانا قادر اتصرف مع اخواني

توق باحساس صعب تفسيره/الله لا يحرمني منك.

تركها والدها بابتسامته الجانبيه وصعد لغرفته بالأعلى..

خرجت لساحة المنزل و اخرجت هاتفها من معطفها الشتوي و فتحت الواتساب لترى ما إذا كان قد قرأ رسالتها أم لا… واستغربت أنه لم يقرأها الى الآن (يارب سترك وش فيه.. ليه مافتح الواتساب من امس.. ليه حاقر اتصالاتي من كم يوم!! ) ..

رن جوالها واستغربت وهي ترى أسم "منال" اللي سبق وقطعت علاقتها فيها ولكنها ردة بصفاء نيه/الوه

على الطرف الآخر منال بنبره ساخره/السلام عليكم يا بنت عمي الفلته

توق تفهم نبرة السخريه وتتجاهلها/وعليكم السلام.. عاش من سمع صوتك

منال بكراهيه/وعساهم يموتون عدااااي

توق ابتسمت وهي تعرف مقصدها/شلونك منال؟

منال/انا بخير لكن خليك مني.. دريتي ان واحد من عيال عمك مات وانتي متزوجه ابن عم قاتله.. ابي اعرف وش شعورك اللحين؟

توق بلعة ريقها بخوف ولكنها ماضعفت لها/ابن عمه.. يعني مو هو..

منال تركت هدوءها ورفعت صوتها بعصبيه/انتي غبيه!! او تستغبين؟!!..محد هامك؟

توق بخيبة أمل/توقعت صلة الرحم هي اللي خلتك تتصلين تسألين عني بعد كل هالقطاعه.. لكن للاسف.. حقدك الأعمى هو اللي خلاك تتصلين.

منال/صلة رحم معك انتي؟!! ماتشررف ببنت عم مثلك.. اوووعدك بكره تسمعين خبر يقهرك وينهي زواجك من ابن براك… وبتقوولين مناااال بنت متعب قاالت..وبدون سلاااام

… أغلقت هاتفها بتوتر.. اتلفت أعصابها "منال"..وهذا الحبيب لا تعرف شيئاً عن اخباره خصوصاً بعدما سمعت من اعمامها و ابنائهم انواع الوعيد بالثأر منه ومن اهله!

اتعبتها مشاعرها المتأرجحه تجاه "حاكم".. هل هي أحبته حقاً أم أنه مجرد اعجاب بشخصيه لا اكثر..!
اتعبها اكثر انقطاع اتصاله بها.. فجأه
،
.
،
.
،


.وجود الأسلحه في أيدي السفهاء وسهولة إقتنائها خطر يهدد حياة المجتمع.. *
اجتمعوا في قسم الشرطه بعد ان تم القبض على "مشاري" في محاولة قتل "حاكم"..
الضابط/تم التحفظ على المتهم لحين عرضه على هيئة التحقيق والادعاء العام و من ثم محاكمته..

حاكم لم يشأ ان تتطور الامور بهذا الاضطراد البشع/الله يعينكم.. لولا أنه أذى ناس بالمستشفى وحصلت اصابات والا كان طلبتكم تطلعونه اللحين… لكنه في رقبته اللحين حقوق ناس ثانيه غير حقي

الضابط بعدم تصديق! /يعني انت متنازل عن الاعتداء عليك؟!!

حاكم بهدوء/من ناحيتي عفيت.. وهو الله يعينه على حقوق الناس المصابه..

الضابط/محد تنازل غيرك.. انتبه في المرات الجايه… واضح ان فيه مشاكل بين العايلتين بسبب هوشة العيال

حاكم بعقلانيه/شباب ومتهورين ماراح تتفرق ناس علشان تصرفات طيش من صغار سن..يعني انت ضابط وعاارف هالقضايا..والله يهدي الجميع

الضابط/اتصلنا بعمك هاجد البراك وما رد علينا

حاكم بضيق.. من تبلد أعمامه وعدم اههتمامهم باولادهم/يمكن غيّر الرقم.. الله اعلم…

الضابط بتأكيد/لازم يحضر بكرا بدررري..

حاكم وقف/ان شااء الله..اظن ماعاد تبوني ..واقدر امشي صح؟

الضابط/تفضل تقدر تروح..
،
.
،
.
اتجه لسيارته في موقف السيارات ..زفر من صدره الضيق والكآبه..أخرج من جيبه.. هاتفه المحمول وهو ينوي الاتصال بـ تميم.. وهو يتمتم بداخله(هذا اللي بيسوي لنا سالفه… الله يعينك ياصقر.. عز الله بتروح فيها منه)..
اثناء فتحه للهاتف "رن جرس هاتفه معلناً عن إتصالها..!!
لم يكن في مزاج يسمح له بالشجار ..ضغط الزر الأحمر لينهي إتصالها و اتصل بـ تميم مباشرتاً..
.
،
.
،
.
،
.
.. أغلقت هاتفها على مضض و هي تحترق غضباً..وألماً من تصرفه الفض بحقها..فمايفعله تجاهها ليس عدلاً البته..!

تركت هاتفها بهدوء على طرف النضد واتجهت لسريرها لتلوذ بدفئه..لم تعتد الصراخ ولا اختلاق المشاكل.. هي هادئه بطبعها..
تذكرت أول لقاء جمعهما بعد العقد.. كان لا يحول بصره عنها.. عيناه بعينيها فقط وكأنه يغوص بهما.. كان لقاءاً مثالياً فهي لا تُنكر انها شعرت حينها بالانجذاب والافتتان..

مالذي جعله يتغير ؟… هل عدم ردها عليه هو السبب؟..ولكن لم تكن متعمده.. لماذا لم يصغي إليها؟!!

تلاشت كل الافكار المزعجه من رأسها وهي تسمع صوت الآذان معلناً عن دخول وقت صلاة الفجر…!!
لم تصدق أنها أمضت ليلتها وهي تفكر به!!
تركت كل شي واتجهت لدورة المياه لتتوضأ وتصلي فرضها..
.
،
.
،
.
،
.

استيقض على صوت جده وهو يوقضه لصلاة الفجر.. تعب كثيراً في العزيمه ليلة البارحه..

الجد وهو يقف عند رأسه/يا ولد قم الله يصلحك.. وش هالنوم الثقيل اللي براسك.. ازعجني جوالك مغير يرن طول الليل دبل تسبدي ولا خلاني امرح زين

استقعد وعدل جلسته وهو يفتح عينيه بكسل/كم الساعه جدي

الجد/قووم تووضى بسرعه خلنا نصلي الفجر ..اللحين حزة الفجر يا مسلم.. هذا الماء الدافي جنب الضو جابته شيهانه..توضا منه وخلص علينا.. وانا بصحي عناد وفاهد

تميم استعاذ من الشيطان الرجيم وترك فراشه ليذهب ويتوضأ..

استيقض الجميع.. واقاموا الصلاة جماعه..

ذهب تميم ليجلس امام النار ويلتمس الدفء..اخذ بعض الحطب وزاد لهيبها..

عناد اخذ جواله يتفقده كعادته بعدما يصلي الفجر.. وتفاجأ بمكالمات لـ حاكم!!

تميم اتجه لجواله وهو يسب ويشتم/علي الحرام لأوري صقر شغله.. اللي هااايت ماندري وين دياره..
تفاجأ بمكالمات من حاكم"!!!

عناد بتعجب/بسم الله 4مكالمات من حاكم.. الله يستر

تميم/وانا،6مكالمات… شكل الموضوع يبي فزعه

عناد كتم ضحكته/ياااحبك للمشاكل.. لا تفاول… خلنا نتصل عليه

تميم وهو يتصل بحاكم/انا بتصل فيه اتركك منه..
… شفيه ما يررردد

على الطرف الآخر رد بصوت يوضح تعبه وارهاقه/هلا تميم..

تميم/السلام عليكم.. زيين اللي لقيتك صاحي..

حاكم بدون مقدمات/اللحين تركب سيارتك وتجيني بالشرقيه.. ولا تقول لأحد

تميم وقف وهو مستغرب/وش العلم يا ولد؟!! انت صاير لك شي
.
،
.
،
يتبع



قراءه ممتعه


 
مواضيع : إحساس طفله



قديم 02-28-16, 01:05 AM   #14
إحساس طفله

الصورة الرمزية إحساس طفله

آخر زيارة »  11-21-23 (09:06 AM)
المكان »  بِـ مملكتـي
الهوايه »  آلشِعـــــر ..
- يَآربَ أسآلكَ رآحَه تِستوطِن
- قلوبنآ بعرضِ سمَآئك .!,
MMS ~

 الأوسمة و جوائز

افتراضي



ظن انه حين تزوج من حبيبته انه تخلص من القيود التي من الممكن ان تنغص عليه ارتباطه بها ولكنه وجد قيوداً اقوى..
.

ظنت انها عاشقه محظوظه.. فأولى لقاءاتها معه كانت زوجته على سنة الله ورسوله..كل شي كان مثالياً في اللقاء الأول.. تأكدت من مشاعرها ..حسدت نفسها على ذلك البدوي الانيق.. لم تتوقع ماحدث ولكنه سحرها بقوة حضوره،
لكن يجب ان تعترف انها في ورطه بين زوجها وعائلتها التي تنبذ هذا النسب الجديد!!

**من قال أن هناك "عِشقٌ بِلا قُيود" !!
،
.
.


في استوديو تصوير يغلب عليه اللون الابيض والاثاث "العصري" والكثير من المرايا..ولوحات الرسوم التجريديه، هي عاشقه لهذا النوع من الفن..ترتدي بلوفر ابيض وبنطلونا ازرق و تربط شعرها بشكل ذيل حصان..

جلست تلتقط بعض الصور لزبونتها الحامل،وهي تنادي احدى موظفاتها/سيرييين هااتي البويه الورديه بليييز

الزبونه بابتسامه/بوويه ورديه؟!!وش تفكرين فيه

توق وهي تثبت الكاميرا وتغير عدساتها/مو تقولين حامل ببنوته؟ راح نسوي لك حركه بالصوره واعتبريها هديه مني بس نفذي كل اللي اطلبه منك

الزبونه ابتسمت/تمنيت اني اطلبك للبيت علشان تصوريني مع زوجي حابه توثقين لي هاللحظات بلمساتك

توق بابتسامه صغيره/سوري والله انتي عارفه ما اشتغل برا الاستوديو . بس عندي فريق تصوير محترفات يطلعون مناسبات، بس انا ما اطلع لاسبابي الخاصه.

الزبونه شعرت باحباط/ياليتك تطلعين كان والله بتطلع احلى صور .. بس ماعليه حابه احجز فريق تصويرك اكيد مثل شطارتك

توق بابتسامه مصطنعه/اوكي تقدرين تحددين موعد من السكرتيره، تنسق لك زياره خلال هالاسبوع اذا جدول مواعيد المصورات يسمح..

الزبونه/تسلمين حبيبتي
،
خرجت الزبونه بعد انتهاء جلست التصوير.. جلست توق وهي مرهقه.. هذه آخر زبونه ..ضغط اسبوع ممن تخلفت مواعيدهم..حاولت الاسترخاء قبل الاستعداد للخروج، تذكرت ان هاتفها معها ولم تسمع نغمته الا عند اتصال والدتها للاطمئنان عليها..!!
اخذت هاتفها الخاص بـ حاكم و ألقت عليه نظره وهي محبطه كامل الاحباط.. شعرت بغصّه وهي ترى صدوده عنها يطول.. ومع طول صدوده عنها تزداد به تعلقاً!!
بئساً لعشقٍ يجذبُ صاحبه على رأسه للهاويه..

رن هاتفها الآخر وهي صافنه ولكنها انتبهت له بعد برهه، فتحت لترد بدون نفس.. وهي ترى أسم منال"خيراً يا رب"/هلا منال

منال على الطرف الآخر/لا هلا ولا مسهلا..

توق اعتادت على وقاحة منال مؤخراً/خييير مناال وش عندك بعد؟

منال وهي تنفث سموم غضبها/منين بيجينا الخيير وانتي دخلتي حاكم في حياتنا.. حسسبي الله ونعم الوكيل.. اخوي مشاري بالسجن والسبب انتي وحاكم… قهرتيه بتركك له..لاااا ورايحه تتزوجين قاتل ابوه بعد.. وتبينه يتصرف بعقل.

توق بعصبيه غير معهوده بها/وانا من متى كنت مع اخوك علشان اتركه ..عيييب عليك.. واصلاً من متى تصرف مشاري مثل الرجال علشان يختلف اللحين!! لو فيه خير ماتركته<<<لم تعتد جرح احد ولكنها بلغت من السكوت ما لا ينبغي السكوت عنه..

منال بحرقه وكراهيه علنيه/اخخخ يالقهر ان مشاري ما قدر يصوبه حتى برصاصه وحده.. اخوي هاجمه بالسلاح لكن نفذ بجلده.

توق توقفت والخوف يعتري قلبها/قصدك ان مشاري رمى حاكم؟

منال/وليته ذبحه وريح قلبي وطفّى ناري ..لكن هالمره ماصابت… والايام قدام

توق اغلقت الهاتف بوجهها وقد بلغت من الخوف مبلغه، ليس لهذه الدرجه تبلغ الكراهيه!! كيف ستطمئن الآن على حاكم.. لابد وانه مصاب بأذى ..على الرغم من غضبها بسبب صدوده إلا ان اصابته جعلت خوفها يغلب غضبها "حالياً " فكرت في سؤال والدها عنه.. سيكون لديه علم بحالته..

اخذت هاتفها واتصلت بسائقها ليأتي و بعد ذلك اتجهت للشماعه اخذت عبائتها و بدأت بلبسها و جمعت مستلزماتها استعداداً للخروج..
،
.
،
.

نزلت من سيارتها وهي تتعكز على العصى مشت بعجله واتجهت للداخل..عجوز طاعنه في السن قد بانت على ملامحها المتجعده علامات الغضب.. وجدت الباب مفتوح على مصراعيه كعادة كرم صاحب المنزل..

يمشي بجانبها ويساعدها حفيدها "سطام" الذي اصطحبها من رماح الى الدمام/يا جده تركدي تراك بتطيحين اللحين.

الجده بغضب رفعت العصى و ضربت بها باب المنزل الداخلي، دخلت وهي تجهر بصوتها/ماعلييك مننني.. وين ولددي بس..

دخلت وهي تنادي/ يا فهههههددد....

لا احد يجيب…!

سطام وهو يشعر بالحرج/جده انا بروح لمجلس الرجال

الجده بنبرة أمر/خلللك هنياااا بسس...

نزلت بهذه اللحظات أم ناصر بابتسامه قلقه لأن دخول الجده بهذا الشكل يوحي بغضبها لابد وانها قد سمعت بما حدث لكن من اخبرها يا تُرى؟!.. اتجهت لها وهي تتغطى عن سطام/يا مرررحبا بعمتي يا مرحبا ومسهلا ..استريحي لبى قلبتس.. و حي الله سطام

سطام بحرج/الله يحييتس يا خاله..

الجده/لا مرحبا ولا مسهلا.. انتي ماتعلميني وش مسوي رجلتس؟!! وراااه مزوجن ولد ذباح اخوووه؟!!! ماعنده ناموس!! والا انهبل من تالي عمره!!

ام ناصر بهدوءها/خالتي الله يهديتس وش ذالكلام ذه.. اقعدي وبعلمتس باللي صار

لحظات ودخلت "توق" عائده من استوديو التصوير الخاص بها، وقد اسدلت الغطاء على عينيها من فوق النقاب/السلام عليكم

الجده بحده/الله لا يسلم في عدونا مغز أبره يا ..يا بنت فهد

سطام لم يحتمل الوقوف اكثر وهو يعلم نوايا الجده..خرج لمجلس الرجال فوراً..

توق فتحت نقابها و اتجهت لجدتها بابتسامه/اهلييين يا جده

الجده وهي تصدها/لا اهلين ولا سهلين..ابعدددي عنني وش سويتي انتي وابوتس؟ تبون تذبحوني؟.. مالقيتوا الا حاااكم البراك !! ضااقت بكم الوسيعه؟!!!

توق لم تعد تحب الخوض في هذا الحديث وقلبها الآن مثقل بالخوف على صحّة حاكم بعد اطلاق النار عليه من مشاري/الله يسامحك يا جده..

ام ناصر شعرت بضيق ابنتها لكن مالحل.. ليس بيدها شيء/خالتي تفضلي داخل وتقهوي وعيني خير، اللحين بيجي فهد ومعه عبدالرحمن تووهم متصلين بي.

الجده وهي تتجه لتوق بالحديث/وش سوا ابوتس ليه يزوجتس لولد البراك..هذوول قاتلين ولددي متعب واللحين بيذبحون احفاادي والله اعلم بصحتهم وتبووني امرر لكم هالزواج كذيااا لا وانا بنت عاامر ما يصير هالعرس. . حلفت بالله لو ما خلا "حفيد حاااكم" يطلقك… لا أنا أمه ولا أعررفه.

اهتز قلبها.. شعرت بخفقان وخوف من المجهول،فـ تدخل جدتها المتسلطه ستكون عواقبه وخيمه..لا يجدر بها ان تناقش جدتها في ما تقول..اكتفت بالصمت..!!

تركتها تريد الصعود لغرفتها في الأعلى.. ولكن سمعت صوت والدها يلقي السلام وهو يدخل بصحبة أخيها عبدالرحمن عائدين للتو ..
توقفت وهي تمسك بالدرابزين، شيئاً ما سيحدث.. قلبها ليس مطمئناً بالتأكيد سينزعج والدها بعد سماع حديث الجده.

ابو ناصر اتجه لوالدته بوجهه البشوش/أرررحبي يأم فهد.. الله حييييهاااا

الجده"ام فهد" بنبرة محتقنه تنم عن غضبها/ مابيني وبينك سلام يا فهد ولانت ولدي لييين تطرد حاكم ابن براك وتخليه يطلق بنتنا توق.

صمت رهيب من الكل.. اما عبدالرحمن ارتاح لتدخل جدته، فهي الوحيده القادره على ردع والده..!!

ابو ناصر حاول استيعاب حديثها الغير معقول.. كيف له ان يتراجع عن زواجٍ تم وانتهى امام الرجال.. هو قد اعطى توق لحاكم ولم تعد بيده.. اتجه لوالدته راجياً/يممه تعوذي من الشيطان.. الله يخليتس لي، البنت صارت حلاله.. معاد لي سلطه عليها وزواجها هالشهر..وحاكم كفو يمه ماهو حي الله رجل

الجده قاطعته بصراامه وكأنه بإسم "حاكم" يثير نيرانها من تحت الرماد/لو ما سوويت اللي قلت لك، وخليت حاكم يطلق بنتك.. لا انته ولدي ولا اعرفك ،و غضبت عليك ليوم الدين.. شلوون تزوج بنتك ولد ذباح اخوك، واللحين دور عيال خوانك

بو ناصر شعر بضيق تنفسه..لعجزه عن ردع والدته التي بطلبها الغريب هذا تهينه، وتساوم رجولته برضاها عليه، فلا أشد من قهر الرجال/انتي تجورين علي يمه،لا تذبحيني

قال هذه الكلمات بصعوبه وسقط مغمياً عليه..

صرخ الكل وفزع متجهاً اليه ومن بينهم توق التي كانت غارقه بدموعها حزينه لوجع والدها، ولحديث جدتها القاسي. .

الجده بقسوه دفعت توق بعيداً عن والدها/ابعدي عننا ..دامك على ذمة حاكم ابن براك فـ انتي غريبه

… لم تصغي لها.. رغم جرحها، فوالدها الذي قهرته جدتها وتسببت في إذائه الآن هو الأهم..

عبدالرحمن شعر وان الوضع لم ولن يمر مرور الكرام.. سقوط والده مؤلم وهو صمام الامان لهذه الاسره.. اتصل باخوته بسرعه واخذوه للمستشفى..
.
،
.
،
.

بين غرف أبناء عمه في المستشفى.. محاولاً الاطمئنان عليهم.. و لا تبدو له بوادر تحسن واضحه. كلا الطرفين اصاباتهم بالغه..ضاق ذرعاً بعمه "هاجد" الذي لم يأتي لزيارة ابناءه سوى مره واحده، وكأنهم ابناء الجيران!!
لكنه ارتاح بعدما عرف ان قريباً سوف يخرجون "صقر" بعدما يطمئن الطبيب على جمجمته المصابه وذراعه المكسوره.

اتجه صوب الاستقبال خارجاً لأخذ كوب قهوه..و تفاجأ بأنسابه يدخلون بصحبة والدهم مع الاسعاف ويتضح أنه في حالةٍ حرجه جداً لدرجة لم ينتبه له أحد منهم!!

من الواجب ان يذهب لهم ويقف معهم ويسأل عن حال والد زوجته.. مع حرجه منهم..
اتجه لهم ليجد عبدالرحمن و بجاد واقفان خارج غرفة الطوارئ/السلام عليكم

بجاد وهو يخفي حزنه/وعليكم السلام

عبدالرحمن التفت صوبه بضيق و رفع صوته/انت وش جاييك هاااه.. وووش جاايبك

حاكم استغرب عصبيته وفضل عدم الرد..

بجاد حاول تهدئة اخيه ونجح/معليه يا حاكم اعذره.. الوالد حيل تعبان وماندري وش صابه

حاكم عذرهم وقرر ان يضل ينتظر معهم/طهور ان شاء الله ..الله يشفيه ويعافيه

بجاد جلس بكراسي الانتظار،لا يعرف سبب سقوط والده، اتصل به عبدالرحمن واخبره ان والده سقط وفقد وعيه فقط.. لم يظن ان كارثة قد حلت/اميين

حاكم جلس بجانبه ..وهو يلاحظ نظرات عبدالرحمن الحاقده!!
مرت حوالي ساعه .. ليحضر سطام بالجده ومعها ام ناصر وتوق المنهاره…

بجاد اتجه لوالدته وهو غاضب/ليش جايين؟

الجده لم ترد عليه..

توق بلهفه اتضحت بصوتها/بجااد شلون ابوي تككفى طممني عليه.. صحى؟ كلمتوه؟ فتح عيونه؟

… ..كان يجلس بالجهه المقابله ولم تنتبه له..وهو عرف صوتها الذي يسستحيل ان ينسى نبرته، ورفع رأسه ليراها بكامل حشمتها المعهوده.. لكن من ذاك الذي اوصلها الى هنا؟!!..شعر بغضب من شدة غيرته..

بجاد وهو يحاول تهدئتها/ادعيله وانا اخوتس

الجده جلست وهي تخفي مشاعرها بسكوتها وانتظارها ..!

سطام بأسف على ماحدث/ماجورين يا بجاد.. سلامة الوالد

بجاد/الله يسلمك.. اتعبناك معنا

سطام لاحظ نظرات حاكم الذي لا يعرفه/شدعوه ماسويت شي..

ام ناصر جلست و جلست بجانبها ابنتها وانتبهت لحاكم الذي يجلس بالمقابل وبصوت لا يسمعه سوا من يجلس جانبها/حااكم!!

توق رفعت راسها تلقائياً تريد الاطمئنان على سلامته بعينيها وبصوت منخفض فيه بحة اللهفه واضحه/وينه؟

ام ناصر نغزتها بكتفها/اثقلي. شايفه هالمصيبه اللي حنا فيها،

توق شعرت بضعف و برغبه في البكاء في هذه اللحظه، انهيار والدها و صدود حاكم الذي احدث البعثره المفاجئه في حياتها ووقوف الكل ضد قلبها..!!

حاكم رغماً عنه اتجه بنظراته لها وسقطت عينيه بعينيها بنظرات صامته و يكتسيها الجمود، فقدومها مع سطام لا يستطيع تجاوزه، الغيره ستقتله !!

توق شعرت بخوف من نظراته لا تعلم لماذا.. لكن نظراته تحكي شيئاً ما..

اقبل راجس وهو ملهوف بانت على ملامحه المفاجأه/وش صاير يا جماعه…

لا احد يرد عليه…

راجس شعر بأن مكروهاً أصاب جده، هو من رباه بعد وفاة ابيه سلطان توأم ناصر الذي توفي مبكراً و بعد ولادة راجس الابن الوحيد بشهور/يا جماعه لا تخوفووني علااامه بو ناصر

لاحظته إنهار وهذا العزيز الغاالي اتجهت له و تمسكت بيده محاوله تهدئته/ابوي تعبان دعواتك له يا راجس

راجس ماتحمل ورفع طرف شماغه ليخفي عينيه التي غرقت بالدموع..
توق حضنته عن عيون الناس وهي تبكي بصمت.. لاحظت حاكم ينظر لها بحدّه و ويقف ليترك المكان ويذهب ..ازداد الضغط عليها اكثر ،و الامور تصبح اكثر تعقيداً.. لم تعد تحتمل مزيداً من اللوم.. و بنفس الوقت قلقه ماهو مصيرهما معاً بعد الآن..ومامصير والدها ذلك الرجل الغالي على قلبها كروحها!!

الجده لمحت حاكم وهو يقف ويغادر المكان، تبادرت لمخيلتها صوره قديمه لشخص لم تنساه مع مرور السنين.. ومشهد تلك الفتاه البارعة الجمال في ريعان الشباب على جال مورد الماء تودع حبيبها ذلك الفارس وتعاهده ان تبقى في انتظاره الى الربيع القادم ليأتي لخطبتها مع علمها بأنه متزوج ولديه ابن.. لكنه معشوقها وهي معشوقته و العرب تعرف قصتهم.. تذكرت وعد فارسها لها قبل الرحيل، وصوته الرجولي الذي تعشق نغمته( الربيع الجاي يا الجازي برسل لتس خويي ناصر بالمهر ويخطبتس لي هو وجماعه من ربعي، لجل اذا عودت لنجد يكون العرس.. وآخذتس معي)..
نفضت هذه الذكرى الجارحهه لقلبها.. والتفتت لبجاد مستفسره/بجاااد من هذا؟

بجاد/هذا حاكم البراك يا جده

الجده رجعت لتلتفت اليه وهو ذاهب ولم تعلق ..لم تستغرب انها تذكرت ذلك الحبيب الذي غدر بها وارسل صديقه ناصر ليعتذر عن الزواج منها ومن بعدها خطبها ناصر لنفسه ووافقت عليه مع انها كانت ترفض فرسان القبائل من اجل "حاكم راعي الصيت والمرجله"..

.
،
.
المساء..
في احد بيوت ال صارم..
بيت اجتمع فيه افراد العائله ماعدا توق ووالدتها التي تقف لجانب والدها الذي ينام في المستشفى..
وقع خبر وفاة اخيها كان شديداً على مها فهو وحيدهم من الصبيان.. لم تحتمل فقدانه.. ضلت بجانب والدتها المكلومه، باكيه بصمت تستعين بالله وقوّة ايمانها به على مصابها الجلل وتستقبل المعزيات..

وقفت لجانبها تلك الحاقده وكأنها تواسيها بعدما ذهب الجميع/احسن الله عزاك والله يرحمه..
مها و قد تورمت عيناها من بكاها/ جزاك الله خير

اكملت منال بكراهيه/والله ان ابن براك من دخل عايلتنا محد فينا سلم ..اخوي دخل السجن بسبته وعمي فهد طاح مريض واللحين ولد عمي توفي والثاني ما يندرا عنه

مها احتفظت بسكوتها واتجهت لوالدتها تواسيها.. لمعرفتها بتلميحات منال/..

منال اكملت/الله لا يوفقك يا حاكم البراك.. ولا يوفق اهلك

مها قاطعتها بغضب عارم وهي ترى أمها منهاره و تبكي بصمت/بسسس انتي ماتسكتين، من دخلتي تدعين على واحد ماله ذنب. كلنا عارفين ان سبب دخول اخوك السجن هو محاولة قتل حااكم .. وندري انه لهالسبب تسبب على ناس بريئه واللحين هالناس بين الحياة والموت… مدري ليه تتكلمين عن حاكم وكأنه قاتل مع انه عفى عن اخوك!! المفروض انك مديونه له بالشكر..

الكل/!!!

منال خافت من نظراتهم/بسسس نسيتوا وش سوااا ابو حاكم!!

مها ودموعها تنسكب بحزن على اخيها/محد نسى انه تم القصاص من قاتل ابوك.. و انتهت القضيه.. بس انتي "بسووس ثااانيه' تبين تشبين حرايب وبس..ترى ذبحتينا.. هذا انا اخوي الوحييييد انقتل ومعاد لي بهالدنيا سند ولا لأبوي ولد ..و مع ذلك ناري طفت لان اللي قتلوه ماتوا بنفس الوقت و رضينا بالقدر و احتسبنا مصيبتنا… شفيك انتي حقوده..انا متأكده انك وراء تحريض اخوك مشاري، ناويه تحرقين العالم كله بكراهيتك، لين متى يا مناال؟

منال اختنقت عيناها بالدموع وهي لم تتقبل حديث مها،فهي بنظرها تتكلم عن ثأر والدها بسطحيه!! اخذت عبائتها وخرجت مسرعه..

مها جلست براحه وهي تستعيذ من الشيطان لو كانت قد جرحتها..

ام مها بحزن مكبوت يتضح بصوتها/ضيقتي صدرها يا بنيتي

مها بضيق ودموع تنسكب/خليها تعرف وتفهم انه فيه ناس فقدوا غالين على قلوبهم ماهو بس هي.. وكأن محد انقتل غير ابوها..هذي جايه تعزينا والا تغثنا!!

امها سكتت على حزنها وهي تتفهم حديث ابنتها العاقل.. لقد كبرت مها..وكأنها بالتفكير أكبر من منال ..!!
.
،
.
،
.
في الليل..
اجتمع الكل عند صقر.. تميم بعكس ما كان متوقع منه هاهو يجلس بالقرب من اخيه وهو يشعر بغصة غضب ممن تسبب بالأذى لـ صقر ، هذه المرّه لم يُخفي خوفه من فكرة فقدان اخيه.. فـ صقر هو سنده بعد الله،ماذا لو حدث له مكروه كما حدث لأبناء عمه.. كيف سيكون وقع الألم عليه..

صقر ابتسم وهو يرى والدته تلمس يده السليمه/يممااه والله اني بخير لا تخافين

ام تميم ودمعتها تعبر خدها/شاايف يوومنك ماتسمع كلامي وش صار فيك. الله يصلحك ويخليك لي.. روعتني عليك..

صقر اخذ يدها وطبع قبله عليها/لبى قلبتس سامحيني يالغاليه

ام تميم التفتت على تميم وهي خائفه/شلون المصابين الباقين

تميم تنهد بضيقه/عيال الصارم توفي منهم واحد والباقين بخير بس اظن واحد مشلول.. اما عيال عمي هاجد توفوا الله يرحمهم.. ، حاكم وعناد راحوا مع اعمامي يسوون الاجراءات.. وبنصلي عليهم الفجر ان شاء الله.

ام تميم بكت رأفتاً بحال امهاتهم/ الله يصبر امهاتهم بس ويرحمهم..

صقر لم يحتمل الخبر و انهار يبكي،هؤلاء ابناء عمومته واصحاب طفولته.. اتجه له تميم وحاول مواساته/تعوذ من الشيطان وترحم عليهم.. انت رجال والرجال تصبر وقت الشدايد

صقر وهو يبكي بشكل محزن ويفكر بدون تركيز، تذكر حال اولاد عمه كانوا في غفله، غير محافظين على صلواتهم "الموت حق علينا" وهو مؤمن به، لكنه يبكي على مصيرهم كان ينصحهم دااائماً عن تأخير الصلاه و احيان يتركونها ولا يصلوون، زاد بكائه لانه كان يرجوهم يصلون وهم يماطلون.. و هذا القدر لا يُمهل احداً..ضل يبكي حزناً على وفاتهم وهم في غفله..

تميم امتلئت عيناه بالدموع وهو يحتضن اخيه المنهار تماماً ،قد يحتمل اي شيء ماعدا رؤية دموع صقر ، بالرغم من شدته وغلظته..!

ام تميم بحزن/لا حول ولا قوّة الا بالله، الله يغفر لهم ويرحمهم ويتجاوز عنهم
.


 
مواضيع : إحساس طفله



موضوع مُغلق

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة


المواضيع المتشابهه للموضوع : رواية عشق بلا قيود/بقلم الاخت " رشا الخياليه
الموضوع كاتب الموضوع المنتدى مشاركات آخر مشاركة
رواية بقلمي بعنوان "استفهام" . مرجانة قصص وروايات لا تحكمها أرض أو حدود ( رواياتُنا ) 223 08-22-16 06:20 PM
تفسير الاية "وما أنزل على الملكين ببابل هاروت وماروت " شرقية بلا قدر مواضيع إسلاميه - فقه - أقوال ( نفحات ايمانيه ) •• 15 04-24-15 11:01 AM
رواية " حاستي المشؤومة " الجزء الاخير لحن الحياة قصص - روايات - Novels stories - روايات طويله •• 5 03-22-15 10:18 PM
رواية " حاستي المشؤومة " الجزء الثاني من كتابتي .. لحن الحياة قصص - روايات - Novels stories - روايات طويله •• 6 03-22-15 09:13 PM
رواية " حاستي المشؤومة " الجزء الاول من كتابتي .. لحن الحياة قصص - روايات - Novels stories - روايات طويله •• 9 03-22-15 08:27 PM


| أصدقاء منتدى مسك الغلا |


الساعة الآن 12:59 PM.

Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
بدعم من : المرحبي . كوم | Developed by : Marhabi SeoV2
جميع الحقوق محفوظه لـ منتديات مسك الغلا