زوجتي هل اطلقها ام لا شورو علي تكفون سلام عليكم يالربع كيفكم اخباركم عندي مشكله ياليت تلقون لي حل فيها انا ملكت ع بنت كنت ابيها من زمان وعمري 33وهي 25 والله يعلم قد ايش عانيت عشان اجمع واتزوجها المهم مرره احبها ماتوقعت ان انا قلبي بيحب بنت قدها فيها شي يجذبني غير عن البنات هي طيبه وخلوقه ومحترمه واهلها كويسين واصلا مو من قبيلتي قبيله ثانيه ماعلينا بذي التفاصيل انا اول ماملكت عليها كنت معاها 24 ساعه وسوالف وضحك بس ماازورها عشان عملي بعيدد واكيد اي فرصه زرتها واللي خلاني اكتب مشكلتي هنا شوفوا انا انسان مسؤول عن اهلي ومسؤول عن أبوي المريض عنده شلل وجلس متنوم 9 شهور بغيبوبه وتعب وتأجل زواجي وزواج اختي بعدد تأجل المهم ماعليناا من ذا كله الحين زعلانه وكل يوم مسببه لي مشكله وطلقني وطلقني وطلقني تعبتني ياناس والله اكثر شي اطنش كلامها واذا طنشت ياويلك ياويلك اذا مارديت وتجلس ترسلي انت مطنشني وانت ماترد علي وكلام كثيير واذا ماكملتها جوال ي عيني ع الكلام السم اللي أسمعه تخليني بيزه مااسوى شي والله احيانا من كثر ماتكرر هالكلمه علي خلاص احس طفشت منها مليت من الكلام السم اللي اسمعه يعني باقي مادخلت عليها كذاً اش بتسوي فيني لاتزوجتهاا هي طيبه مره واحب طيبتها وحنيتها ادري ماحد بيحن علي مثلهاا وماانسى كل وقفاتها معاي والله يعلم ايام حلوه عشتها معاها بس لسانهاا هذا سم سم ماتحترمني والرجل يبي الاحترام وابوها ساعدني بالمهر وماكلف علي وامها تتصل علي بعد فتره وفتره يعني حتى لو هي فيها شي اهلها ماحد يفوتهم . انا والله انسان مشغووول مشغول اهلي انا مسؤول عنهم اختي مطلقه انا مسوؤل عنها وعن عيالها اوديهم واجيبهم وعملي دوامه طويل وشغل اداره كل شي ع راسي والله احيانا أداوم مواصل والله يعلم وحده أش فيني قبل البارح تخاصمننا كثييير وفعلا كنت خلاص بارسل ورقتها لانهاااااا اعطتني كلام والله ولارجال يتحممله بس لما بكيت عندي هديت أنا ورحمتها وهديتها وقلت لها مابسيبك واتحمليني وكل شي يضبط ونتزوج بس لاترسلي كلام كذا قالت طيب واعتذرت مني وانا رجال لااحب لاواتس ولاغيره ومخليه عشانها تبني معاها 24 ساعه وبس اكلمها انا لوفاضي جيت كلمتها احيانا بالويكندد اخوييااي يخرجون واعتذر منهم كله عشانها هي اسهر معاها الى الصباح واليوم الثاني لما مااكلمها خلاص نسيت كل شي ومو مقصر بشي معها والله يكفي احبها وحاربت الدنيا عشانها بس هي الله يهديها مدري تتحرش مدري تبي تتحكم فيني مدري مدري اش فيها الله يهديها بس آش الحل معاها والله خايف منها انا رجال عانيت كثير خطبت زمان وفسخت وماتوفقت بالخطوبه الاولى والله عوضني فيها هالبنت اول ماملكت عليها يازينها حتى اخويااي يشوفون الفرحه بعيني لما اكلمها بس الظروف مرض ابوي انشغالاتي لاني ترقيت بمنصب اعلى وصار اغلب الشغل ع راسي أحيانا أرجع المغرب او العشاء من الدوام اذا ماخصلنا بدري اذا فيه مشاكل بالشغل من 7 الصباح خارج عشان الزحمه وبالنهايه تجيك حرمه تقولك انت فيك وفيك وماتستاهلني وطلقني اااه والله تعبان تعبت منها ومن كل شي انا ماابي اطلقها ابيها اليوم قبل بكره ببيتي بس اخاف تطفشني بكره اذا ماسهرت معاها ولا طلعت مع اصحابي انت فيك وفيك اخاف تروح لاهلهاا والله مجنونه هي مو بعيده تسويها فجاءه تسمعني كلامم حلوووو واقول حظي فيها بعد ساعه تسمعني كلام سم هههه انفصاام والله خويي مره تخاصمنا وانا عنده وعصبت بالجوال واحنا نتكلم فيه وهداني قلي طلقها اشتبي فيها ذي ماتصلح لك زوجه والله مررره بايعتها اش الحل تشوفون انا غلطان. قولوا لي بااتحمل كلامكم ولا مقصر معها قولوا لي انا رجل مشغول ومسؤول عن اهلي ودوامي مسؤليه جداً . وشقتي مع العمال لازم اكون معهم واكلمها كل يوم اتطمن عليها لو ربع ساعه اذا ارسلت رديت عليها اعلق ع صوره فيديو مستحيل اطنشها حتى لو طنشتهاااا ارجع مره ثانيه اكلمها لما افضى .. هي تبغاني كل يوم سوالف بالجوال ساعات طويله تبيني اكلمها وانا داخل خارج ومتى نمت وصحيت ومع مين رحت ومين البنات اللي معاك بالشغل واذا مثلا كلمتها وسرحت شوي اكيدشفت حرمه وسرحت بجسمها هههه مي صاحيه وتبيني اقولها بكل شي في حياتي وانا رجل مااحب التحكم هي طيبه وخلوقه مممره وحنووووووونه حنيتها مخليتني اتمسك فيهاً وتخاف الله وتصلي وتصوم دايم وتذكرني بااذكاري والسنن وذي الاشياء بس لسانهاا كيف اتعامل معها شوروا علي تكفوووووون والله مابي يجي يوم واقولها فعلا ماابيك لان طفشت مممرره ممممره وانا رجال مو ناقصني شي الحمدلله والكل والله ع كلامهم ليتك نسيبنااا مااحب امدح تروا بس ذا كلام الناس لي بس انا لاقي في هالبنت كل شي الا لسانها هذاا وتحكمها فيني وغيرتها الغير طبيعيه ماابي اوصل للطلاق تكفون يااداره نزلوا مشششكلتي ابي حل والله العظيييييييييمّ... خلاص ابي حل بس يمكن القى حل عندكم حلو نزلوا مشكلتي بااسرع وقت ... اخوكم بندر |
تمت الموافقه على المشكلة ____ |
الله يكون بعونك وانا اخوك .. شوفها وحط معها النقاط على الحروف وعلمها وش تبي منها وش اللي ما تبيه وافرض شخصيتك . وبالمقابل حق الله فيها آده ولاتاكل حقها اذا سلكت معك خير وبركه واذا ما استوعبت وعاندت طلقها لاهي اول ولا اخر حرمه بس البدايه مثل ما قلت لك اجلس معها وحط النقاط على الحروف . افرض شخصيتك خلك رجل والله يسهل لك ويسر |
م فيه انسان يخلو من العيوب م سوت شي يدفع انك تطلقها هي بس تغار بزياده و تخاف تهملها اهتم فيها اكثر و قول لها تحاول تعدل من لسانها م يصلح تسب بس عشانك م رديت و حاول تعجل زواجك يمكن خافت يوم تأجل لا تدخل الناس بينكم خاصه اللي ينصحك تطلق !! |
وجهه نظري لآ تخسسرهآ .. فآنت قلت وقفت معآي قبل آلخطبه لكن مثل م قآل لك سآلفه قلم ضع آلنقآط ع آلحرووف والله يششفي آبوكك وتفرح برجعته آن شآء الله والله يجمعكم بخير ي رب |
اخوي المشكله سهله الحل ماتحتاج لطلاق انت لحد الآن ماقدرت تفهمها ولا عارف كيف تتعامل معاها شوف اخوي لكل بنت طريقه مختلفه للتعامل مثل هذي يبغالك تسبقها بخطوه مثلا لوكنت مشغول وعارف انها رايحه تتصل عليك وتكون زعلانه وتعصب حاول قبل ماتتصل عليك ترسل لها رساله واحشتني كثير وكلام غزل وبعدها تكتب عذرك في النص وتختم الرساله برضه بكلام حلو يعني دائما خليك متقدم عليها بخطوه وحاول تفهمها اكثر وطريقة تفكيرها وقتها رايح تعيش معاها حياه سعيده |
طلقها وش تبي بوجع راس ما تقدر اسحب عليها |
بصراحه في بنات الله يهديهم لسانهم طويل ومايحسبون حساب لغيرهم الله يصلحهم لكن انا رايي ان تتفاهم معها وقول لها الشي اللي تحبه واللي ماتحبه فيها يعني اعترف لها انك تحب طيبتها وكذا وكذا بعدين قول لها انك ماتحب اللي مايحترمك ، وراح تتفهم ان شاء الله لأن من قصتك حسيتها تبغاك وتقول لك طلقني لكن مو من قلبها وربي يوفق مابينكم :81: |
حرام تطلقها! هي كذا و شوي وتنجن تطلقها و تطلع من حياتها كيف بيكون حالها:( بعض البنات يحبون يعرفون كل تفاصيل شريك حياتهم بس كذا من زود المحبة مو تحكم تحبك كثير و أنت تحبها خلاص لا تخسرها بس فهمها ان اهم شي الاحترام ، و وضح لها ان لسانها يمكن ينفرك منها يوم و لو تقدر تعجل بالزواج يكون احسن يمكن تهدأ و ترتاح نفسيتها و الله يكون بعونها ، اسوأ شي لما يكون الزوج مشغول دايم عن زوجته و اعتقد حتى الزوج يكره ان زوجته تنشغل دايماً عنه فقدر احتياجها لك الله يوفقك و يا رب يتمم عليكم و تفرحون بزواجكم ان شاء الله |
لو الناس تفكر مثلك كان مافيه احد متزوج وبعدين هذي ماهي مشكلة هذي حياة . الحياة كذا حلوه ومره ولازم تعرف ان كل بيت فية مشاكل اكبر واعظم من مشكلتك (مع اني ما اشوفها مشكلة ) ولا احد عرف شي عنهم ( البيوت اسرار ) وعايشين ومتانسين نصيحة لا تاخذ كلام احد حتى كلامي لاتاخذة في قراراتك اسال اهل العرف والاختصاص بالتوفيق |
وعليكم السلامه أخوي من الكلام حسيت بحجم الضغط اللي تتعرض له رغم أن زوجتك تبالغ بمشاعرها ولكن هي باين تحبك وماتعرف تتصرف مو شرط تلبي رغباتها ع حساب نفسك لا يكلف الله نفسا إلا وسعها ولمن تبدى تتكلم عليك أفضل شيء قفل جوالك وأسحب عليها يوم يومين وكل ماترجع لموالها كرر الحركه لين تعرف غلطها بس ماأنصحك بالطلاق دامكم تحبون بعض وممكن تقولك طلقني وهي مرعوبه من الفكره بس كمجرد تبين لك أنها تقدر ع البعد دامها ملكه وعندك ضغوط ومشاغل أبتعدوا عن بعض فترة ترويح نفس بعيدا عن الطلاق لين ربي يفرج همومك وهي تكون راجعت نفسها ألف مره أحيانا البعد يفك عقد لكثير مشاكل وإن كان رجعتوا لبعض ومافي شي تغير صل أستخاره وربي بيرشدك للأفضل سواء تكملون مع بعض أو تنفصلون بس أشوفها كثيره ساعات العمل حقك يعني لو تحاول مع الشغل معك يخففون أقل شيء للعصر يصير عندك وقت راحه وتلتفت لأهلك ولبيتك الله يكتب لك الخير حيثما كان :22: |
الله يعينك ويوفقك ويشفي والدك ويصلح حال زوجة المستقبل :::::: تأكد يا أخي أن المرأة إذا طلبت الطلاق لا يخلو حالها من أمرين :- إما أنها تطلب الطلاق من ملل و كره للزوج بسبب مشاكل أسرية وتعثر أسلوب التفاهم بينهما.وهذا لا يمكن تأويله في مشكلتك لأن حبها لك ظاهر. الحالة الثانية :- أنها تطلب الطلاق لفظاً لا مضمونا. من باب التهديد فقط وتلجأ لهذا الأسلوب وهي واثقة من أن الزوج لا يستطيع أن يطلقها ولا يستطيع الاستغناء عنها فتبين هي - من فرط غرورها - أنها تستطيع الاستغناء عنه حتى يقدم تنازلات ويتبع الأوامر. وللأسف الكثير لا يتفهم هذا الشعور ويظنها من الحالة الأولى فتقوده العزة والكرامة المفتعلة إلى طلاقها ويغتال الحب بين الغرور والاعتزاز. والذي يبدو أنك أظهرت لها منذ البداية مشاعرك وتعلقك بها بل بينت فاقتك لها قبل أن تعرف كل تفاصيلها وطباعها. وهذا اتعكس على تعاملها معك وكأنك الحلقة الأضعف في هذه الدائرة. نصيحتي لك : تباعد ولا تبعد. احرص على حفظ الحب والحنان والمودة في قالب مرتفع عن السب والشتم والشك. انسحب تدريجياً عن الأجواء السابقة التي تمكنت من خلالها رسم صورة عنك لا ترتقي لوصفك. أي قلل من العبارات للعاطفية والأشواق. وفتح مواضيع عن الحياة وكيفية التعامل معها والتخلص من هدوءك الملحوظ عليك وكن ظريفاً لطيفاً. وربما يكون العمل الإداري منحك الجدية في التعامل والبحث عن المنطقية التي يتعذر وجودها أحياناً في مثل هذه المواضيع. فالحل بيدك ويتمثل في مراجعة أسلوبك معها والتدرج في تغييره إلى درجة تقوي اعتبارك لديها وتجعله مهيباً. الحد من اللهفة العارمة التي قد تفسد الحب وتفسد الحياة الزوجية حينما تستغل كنقطة ضعف ضدك. الحوار بهدوء وعقلانية ووضع النقاط على الحروف من البداية. لا تؤخر الزواج فأغلب المشاكل تأتي من هذه القترة وتؤثر سلبياً على مسيرة الحياة الزوجية فيما بعد. ما دمت باراً بأبيك مراعياً لذويك. فأبشر بالخير. وفقك الله لما فيه الخير والصلاح وأعانك. |
كلام اخي معلم فله صحيح هي فقط تحتاج إلى اهتمامك وهذا من حقها ارسل لها عدة رسائل في اليوم لن تكلفك لا وقت ولا مال فرسائل العشاق تملئ المواقع والتطبيقات لا يستحق الأمر لن تطلقها ما السبب اصلا لسانها ..فقط كذلك .دائما اخبرها بمكنوناتك اذا واجهت اية مشكلة صغيرة او كبيرة اخبرها بها . .هي تريد ان تشعر انها جزء مهم في حياتك ولست منشغل بمن حولك عنها . . وبالتأكيد هي تفكر بأنك منشغل عنها منذ الأن فكيف اذا تزوجتم وفقك الله |
يسعد صباحك اخي بندر شوف معلم فله كلامه تمام وبعدين ياخوي هي تبي شوية اهتمام وبس لا تفكر الزواج سعادة ابدية تريه فيه عسل وبصل > حسب عجايزنا المراد ياخوي طبق كلام معلم فله ولا تخسرها بعد الزواج راح تفهمها وهي راح تفهمك في حفظ الرحمن |
وعليكم السلام اخي الحبيب لازم تعرف بان نفسيات البنات تختلف من وقت لآخر وخاصه عندما يزورهن الزائر الشهري وتركيبة المرأه عقلاً وجسداً يختلف عن الرجال اللي ابغى اوصل له انك اولا ما تعاملها كاصدقائك ولا كالموظفين اللي تحت ادارتك هذي زوجتك من حقها تعرف عنك ادق الامور ممكن انت تشوف انها ما تحترمك بالكلام وهي من غيرتها وحرقتها وشوقها اليك لا تطلقها وحاول تتفاهم معها ولا تحدها على مالاتستطيع اذا اردت ان تطاع فامر بما يستطاع واذا كرهت منها خلق ترضى منها خلق اخر استخر والله يكتب لك الخير |
السلام عليكم ورحمة الله وبركاته المرأه بطبيعتها تحب الأهتمام والسؤال وتقدير ذاتها وما تقوله المرأه دائما بحالة الغضب مخالف لما بالقلب ! هو مجرد كلام تطلقه دون وعي منها وبالمقابل لا تغفل جانب الأحترام والتقدير هو الشيء المهم والأساسي في أي علاقة زوجية ناجحه تقدير وأحترام الرجل لزوجته وهي بالمثل صحيح الجمييع يمرون بظروف ونفسيات لكن لا تتعدى وتتطور لا أكبر من ذلك فتصبح الحياة مجرد مشاكل و صراخ ودموع !! من الأن تحاور معها بجدية وحزم وأن هذا السلوك لا يعجبك فَ أنت تريد حياة مستقرة يسودها المودة والرحمة والألفة هي تستغل طيبتك من هذه الناحية ( فتعزف على هذا الوتر ) لكن مع العشرة يصبح التحمل صعب جدآ ولا تجد أمامك سوى الهروب وفقكما الله وأسعدكما |
وعليكم السلام ورحمة الله وبركاته لقد قرات المشكلة اكثر من مره وطرحت عدة نقاط سوف اجيبك عليها بشكل مطول اقتباس:
|
حكمه من الله سبحانه وتعالى ان تكون العصمه والكلمة للرجل.. لان الرجل المعروف عنه الصبر.. فأصبر .. انا اشوف انها تحبك و تغار عليك كثير و هي تشوف ان من حقها تكون معك طول الوقت. اصبر عليها لكن بخصوص الشتم و كلامها السم لابد تاخذ منها موقف يوقفها عند حدها .. والله يعينك.. |
بصراحه ماكملت كل الموضوع لانه طويله وانا لا احب هذا اول حاجه ابغض الحلال عند الله الطلاق لاكن الغلط عليك خليتها تتمادى وتسب وانت تسكت بسبب حبك لها انت كلمها مكالمه عقلانيه وفهمها كل شي بدون صراخ وقول لها ذي حياتي الحين وبعد الزواج راح اظل اهتم ب اهلي واختي المطلقه عاجبك حياك الله مو عاجبك انتي وافقتي علي وانتي عارفه ظروفي والله يكتب لك الي فيه الخير :Dl3: |
الساعة الآن 07:31 PM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا