طريق الردى يسهل على كل ناقص فود ،
 

( باب العلاقات )



على طاري الاصحاب والطيب والمجهود ،
وهذاك جاملته وهذاك جمّلته ،،


آنا لي مع أصناف البشر موقفٍ مشهود ،
سببها تغيّر سير قلبي وبوصلته ،،


الآجواد ( نعمة) والكفو مثل ريح العود ،
يطيب وتزايد طيبته كلما اشعلته ،،


والأنذال ( نقمة) والردي دايماً مقرود ،
يحدّك وتبلش فيه مهما تحمّلته ،،


والآحلام واجد والأمل بالله المعبود ،
عليه الأمل معقود تاليه وأوّلته ،،


فلا يخلق المـُعدَم ولايحفظ الموجود ،
سوا الله وحده جلّ شانه ومنزلته ،،


قضى العمر والأيام تسبق هبوب النود ،
لمن يغمِضْ عيونه ويسْرِجّ مخيّلته ،،


ندوّر على الراحة ولا للطموح حدود ،
ونتسارع مع الوقت ونسابق عجلته ،،


أحد نظرته ( للمال) والمنصب الموعود ،
وأحد نظرته ( لـمقـرّد ) الخلق وصّلته ،،


وأحد نظرته دفع البلا كنّها ( البارود)،
تقادح شرر وإن صابت إنسان كبّلته ،،


وأحد مدّته تغدِق وتغني وتكفي زود ،
وأحد مدّته تنعاف من كثرة اسئلته ،،


وأحد لا عطى يعطي ولا ينتظر مردود ،
وأحد تكره أعذاره وتكره مقابلته ،،


وأحد كل ضيقة صدر ( بحجاجه المعقود) ،،
وأحد ينشرح صدرك بطيبة معاملته ،،


تدور الليالي والبشر فاقد ومفقود ،
والأيام تثبت ماكتبته وماقلته ،،


وأنا إنسان ما نزّهت نفسي عن المنقود ،
عيوبي كثيرة والخطا ما تجاهلته ،،


طريق الردى يسهل على كل ناقص فود ،
وطريق الجمايل صعب مهما تساهلته ،،


لكن رحمة الله واسعه واللبيب يعود ،
ودرب الهداية ينطوي لو تطاولته ،،


مدام العمر باقي وحبل الرجا ممدود ،
برحمة كريمٍ جلّ شانه ومنزلته ،،


فلاني على خلقه بمُجْبَر ولا محدود ،
ابصبر على جور الزمن لو تثاقلته ،،


وربع السعة والصحن وأهل النوايا السود ،
على ذِكْرهم باب العلاقات قفّلته ،،


:SnipeR94:

كلمات جميله

يعطيك العافيه

الله يعافيك
شكرا ع مرورك
بارك الله فيك
جرم

كلمااااااات رائعه نطق بها قلمك
وبوح كتب هنا من فيض مشاعرك
يعطيك العافيه وبانتظار جديدك

الله يعافيك
شكرا نورت الموضوع
بارك الله فيك

صح لسآن قايلهآ وسلمت يمينك عـ لطرح