واعذاب القلب من شده تجيله بعد شده
 

اه من همٍ لو انه فوق متن الضلع هده
.................... الله اكبر ما حصلي من عناه وما جرالي

هد متن الضلع هد وبيّح الرجال سده
.................... كثر لوم وقل نوم وفتح جرح وسم حالي

واعذاب القلب من شده تجيله بعد شده
.................... وعذابه بعد ما ضلى منه خالي وسالي

شي جاله من عداه وشي جاء ممن يوده
.................... كنك اوقدته بنيران اشعلت فيه اشتعالي

لين فاح القدر منه ولين عدا الصبر حده
.................... مابقي للحلم حلم ولا بقي للصبر تالي

جيتهم مثل المسالم والعساكر مستعده
.................... مستعده بالسلاح وبالعتاد وبالرجالي

في يديني ورد مدري وين اروح وكيف امده ؟
.................... واسقطوا منها الورود وبادروني بالقتالي

ان مشينا الدرب هوّن وان عمرنا القصر هده
.................... وضعنا ماهو تمام وحالنا ماهو بحالي

كلها لجل المصالح والمجامل والاشده
.................... من ركب فوق الشداد ومن برك مثل الجمالي

بين همز وبين لمز وبين كر وبين صده
.................... بعدها فتل الحبال وبعدها نقض الحبالي

ان حصلي شي من ربعي يزعلني واعده
.................... شمت عنها واعتبرها من يميني في شمالي

وكان نور الحق يغدي عند ناسٍ مستبده
.............................. والله انه ما يولي عند مرتفع الجلالي

كل علم ٍ في سراه وكل سيلٍ في مهده
.................... لا هيا من يوم تلقى بعد طعم المر حالي

شي ماضي من يعيده شي فايت من يرده
.................... العداوه ما تسرك والعفو والطيب غالي



بقلم المتمرد

كلمات قمه على قمه
جميييل جدا
صح لسانك المتمرد:81:

ما شاء الله
صح لسانك يالشاعر واعتلا شأنك
قصيدة رائعة جداً بمعانيها ونظم قوافيها
أبدعت ومب غريب عليك الإبداع
لا خلا ولا عدم .. لك تقييمي

دمت بود

:81:

الله عليك ،،
رائعه
و المعاني جميله و معبره
صح لسانك

صح السانك يالمتمرد . نعم الشاعر انت ونعم القصيدة . قصيدة جزله في معانيها جميلة في قوافيها . ترجمت ظروف راعيها ترجمت معاناته . حقا من افضل ما كتبت ومن افضل ما مر علي من قصايد معبرة . تحياتي لقافك ولقلمك المبدع .