منتديات مسك الغلا | al2la.com - الله يطول بعمر والدي .. والله يرحم من فقد ابوه ؟

- همس القوافي - شعر - قصائد •• (https://www.al2la.com/vb/f5.html)

الله يطول بعمر والدي .. والله يرحم من فقد ابوه ؟

https://www.************/watch?v=stRN06Lb1SA

دقـات قلبي تزيد بحرة ٍ فيها . . . والدمع من مهجتي بالحزن ذرافي
من لوعة يا عسى ربي يجليها . . . حمى غشتني بغم وتنفض أطرافي
ليت الليالي تعود بحلو ما ضيها . . . هيهاتي ترجع بما روَّح وما طافي
كل ٍ يعزي وأنا روحي أعزيها . . . لرحيل أبوي اللي بالأفضال معطافي
آآآهـ من الوقت والدنيـا أثنِّيها . . . دنيا تفرق شمل بالحيل تنعافي
بسمتك يا والدي ما ني بناسيها . . . تضحك إذا شفتني بالخير متعافي
ليت العمر ساعته تنباع وأشريها . . . بأغلى ثمن يايبه للعمر تنضافي
مسجدك مشتاق للآية وتاليها . . . ومنبرك من عقب ما فارقت له طافي
غرشة دهن عودك بدرجك أغطِّيها . . . أشم ريحه وكنك مقبل(ن) لافي
نظارتك شلتها حزني يبكِّيها . . . حتى المساويك ناحت بين الأرفافي
وعصاك مسنودة(ن) جيت أبحاكيها . . . تقول يكفيني ما فيني ترى كافي
وبستانك اللي به النخلات تسقيها . . . يبست سواقيه تمره دون خرافي
يبه .. يبه .. يا يبه لمن بأطرِّيها . . . هني من له أبو حي(ن) وينشافي
فنجال قهوة معاك أوقات نغليها . . . ويضمني بالشتاء في مشلح دافي
همزت رجليك أنا أفدى مواطيها . . . أرجي لبرِّك عسى ما تشكي خلافي
الارض ضاقت علي باوسع فيافيها . . . ماذقت نوم هني والانس متجافي
فضايلك يا يبه عجزان أوَفِّيها . . . لو وصلت بالشعر بيت الألف من قافي
يا ربي تجعله للفردوس ناصيها . . . ومن ثمار الجنان الخضر قطَّافي

واضيم حالي عقب ابوي عزالله اني فاقده غالي :(

الله يحفظ كل غالي لحيه ويرحم ابوي وكل ميت

يعطيك العافيه

ما قدرت اكملها .. لا قراءتها ولا بسمعها :30:
فقد الاب شيء عظيم لا يشعر به الا من جربه
الله يرحم ابوي ويرحم كل من فقد عزيز عليه

الله يحسن عزاء الجميع ممن فقدوا آبائهم ويعظم اجرنا واجرهم ـ قصيدة معبرّة جداً ـ الله يعطيك العافية عليها نبرة حزنن ، صح السانك يا قايلها ، ويجبر مصيبتك ومصايبنا جميعاً يا رب ـ احترامي

الله يرحم من فقد ابوه

شاكر لمروركم

همزت رجليك أنا أفدى مواطيها . . . أرجي لبرِّك عسى ما تشكي خلافي
الارض ضاقت علي باوسع فيافيها . . . ماذقت نوم هني والانس متجافي
فضايلك يا يبه عجزان أوَفِّيها . . . لو وصلت بالشعر بيت الألف من قافي
يا ربي تجعله للفردوس ناصيها . . . ومن ثمار الجنان الخضر قطَّافي

كلمات رائعه

الله يحفظ لك الوالد

ويرحم والدي وكل من فقد غالي

آمــــــــــــــــيــــــن