مشكلتي مع ابوي
 

السلام عليكم ورحمة الله

مشكلتي مع ابوي مو مخليتني انام وضميري يعذبني ودمعاتي دايم تنزل وخايف من رب العالمين وخايف من يوم الحساب !

اليوم شفته يتمشى جنب البيت وهو شايب وكان ودي اروح اشيله من الارض اللي يمشي عليها واحطه فوق راسي بس الحاجز كبيييييييييييييييييير

ابوي متزوج من 3 حريم وانا ابنه من الزوجة الاولى ،، ابوي تركنا انا وامي واخواني ،، وراح جلس عند زوجاته الجدد
طبعا ما يجي بيتنا وعلاقتنا معاه علاقة سطحية نحبه وما نرضى عليه بس هو حط حواجز كبييييييرة بينا وبينه


اخواني الكبار يزورونه وكل ما يحتاج فلوس يساعدونه برغم ان حالتنا المادية الحمدلله مستورة
لكن هو مو راضي يرضى عنا ودايما زعلان علينا ، هو بصراحة ما سوى فينا شي ولا ظلمنا لكن تركنا وخلانا نعتمد على انفسنا وحتى امي تركها ودايما زعلان نحاول نراضيه ونساعده يقبل المساعده لكن ما يبين بعينه ويرجع يزعل على اي شي ودايما يبين للناس انا مو زينين معاه وسمعنا من الناس كلام كثير لكن احنا ما يهمنا كلام الناس وعلينا من انفسنا


الوالد بصراحة مو داري عنا واحنا الحمدلله اعتمدنا على الله ثم على انفسنا واشتغلنا وتزوجنا انا واخواني الكبار وصار عندنا عيال
الحين انا و2 من اخواني وامي ساكنين بنفس البيت ، والوالد ساكن عند زوجاته الثنتين كل وحدة ببيت منفصل ، عنده عيال منهم والحمدلله نحبهم ويحبونا ودايم نزور بعض



لكن ابوي زعلاااااااااااااااااان ومو مبين في عينه شي
كل المحاولات اللي حاولنا انه نرجع المياه الى مجاريها باءت بالفشل يعني يرضى يوم يومين ويرجع زعلان
والمشكلة انه حط حواجز كبيرة بينا لدرجة ان صارلي عيدين ما رحت سلمت عليه ، بالصدفة اشوفه بعرس او بعزيمة او بمناسبة واسلم عليه يرد السلام يرفع عتب ،


يشهد الله اني احبه وابوس التراب اللي يمشي عليه
وابوي رجال كفو وكريم وشهم رغم فقره
والله ان الشياب يحلفون براسه من علو شانه عند جماعتنا
لكن ابوي اعتفس من تزوج الزوجة الثالثة ، وتغير بدرجة كبيرة

انا خايف من رب العالمين وخايف من تقصيري معاه لا اتصل عليه ولا اسئل عنه
دايما اشوفه لأن بيته قريب من بيتنا لكن ما بينا غير السلام

ودي اروح ابوس رجله وابكي بحضنه
لكن والله ان الحااااجز كبييييييييييير


انا حاليا عمري 21 ويشهد الله ان ابوي من انا صغير مو مهتم فيني ولا بأخواني
لدرجة اني لما كنت طالب كان يسألني انت اي صف!!


اذا المدرسة يعطوني استدعاء ولي الامر كانوا اخواني يجون
وهو ما يهتم
ولما كنت بتزوج خبرته اني ابغي بنت خالي رفض فقط لأنها من طرف امي ، على الرغم ان امي انظلمت منه ويشهد الله ان امي تحملت وصبرت لسنين طويلة ويا طيب معدنها !
وضليت 3 سنين وانا احن عليه وهو رافض وكنت اقدر اتزوج واخذ البنت لأن هو منفصل عنا وامورنا نتدبرها بأنفسنا
لكن خفت ان الله عزوجل ما يوفقني بالزواج لأنه كان رافض
وتخيلو والله 3 سنين وانا احاول معاه وواسطات مافيه فايدة يقولي ليش انت مهتم برايي روح تزوجها وفك عمرك
وانا رفضت اني اتزوج الا بموافقته

بعدها لما خطب الزوجة الثالثة جتني فكرة اني اسوي واسطة عن طريق زوجته الثالثة وخليتها تكلمه ووافق على طول
والحمدلله تزوجت ،، تخيلوا !!


ايش الحل يا اخوان ضميري معذبني
وخايف من عيالي لا يسيئون معاملتي لكن يشهد الله ان مو انا السبب

وعليكم السلام اخوي في بادي الامر الكل لا يريد ان تحدث مشكله او خلاف مع الوالدين او احدهما
اخي عندي لك ثلاث حلول
الحل الاول تكلم واحد من أعمامك قريب منه وقريب منكم وتفهمه اللي يصير معك ومع والدك ويفهمه عمك انك تبي رضاه بس ومااتبي زعله
الحل الثاني تكلم وحده من زوجاته دام هي ساعدتك بأمر الزواج يمكن تساعدك بأمرك هذا وتحاول تفهم منه سبب هاالخلاف معك
الحل الثالث تكلمه انت بنفسك وتحاول تفهمه انك ماتبي غير رضاه وطيح عند رجوله وقل اسف لو ضايقتك لو عصيتك وانا ماادري وحاول تلين معه باالكلام ماتجيه بعصبيه وان شاء الله تفيدك هاالحلول
جرب كل شي لا تقول مالقيت استجابه عيد كل حل من جديد وان شاء الله بتكسب رضاه
وبإذن الله تنحل مشكلتك
وأما اولادك لا تخاف ان شاء الله مايصير كذا معهم
الله يسعدك ويعينك

اسعى لإرضائه حتى ولو لم يرضى

وإن كان ماتقول صحيحا فأنت بار بوالدك لكن والدك عاق لك
وأسأل الله أن يهديه..التزم ببرك ومحاولاتك في إرضائه
واعلم بأن الله شاهد عليك ومعك ..واستبشر خيرا أخي

دمت كما تحب

اعتقد ماقاله لك الاخ سعود واقع لا مفر منه وكما يقال في المثل

البعيد عن العين بعيد عن القلب ..!!

ابوك له عالمه الاخر البعيد عنكم ومحاولاتك تبدو لي بعيده المنال
لاسباب عديده من اهمها انكم لستم امامه ..!!

تذكر بان اغلب القصص المشابهه لك وهي انفصال الاب عن الام
يكون ضحيته الاولاد اما بخسارتهم الاب او الام وانت خسرت الاب ..!

ويكفي بان قلبك بار به

تحياتي
آخيـــل