مديت ايدي على زوجي
 

انا اتابع هالمنتدى بس اليوم ضاقت الارض فيه من بعد المغرب وانا احاول اسجل في هالمنتدى والحمدلله سجلت بنات ربي يسعدكم ابغاء قبل كل شي تدعولي لعل فيكم من تستجاب دعوته
زوجي زعلان من البارح تاركلي البيت كله وطالع مادري وين هو فيه عشان مديت يدي عليه انا احبه وهو نفس الشي هو قلبه طيب بس هالمره احس اني زودتها حنا نمزح مع بعض زي اي زوجين بدايتها قبل شهرين سويت فيه مقلب ونسيت وهو بذاك الوقت ضحك ومانسى وقال اردها لك




البارح راح وسوا كروت دعوه زواج ممكن عشره وحاط اسمه العريس فيها ودخل البيت وراح على المجلس ونزل شماغه على الكنب واخفى الكروت تحتها بعد نصف ساعة قالي عطيني شماغي ورحت
رفعت الشماغ حصلت الكروت انا عطيته شماغه وطلع رجعت فتحت الكروت انصدمت وابكي مدري ايش جاني احس انجنيت بعد مارجع سألته قال ايوا بتزوج بس انتي تبقين الغاليه وحبيبتي
انا فقدت اعصابي حسيته يستخفني وصارخت عليه وهو يضحك يقولي مراح اروحلها غير يوم في الاسبوع انا ضربته بيدي ورميت ريموت التلفزيون وجاء في راسه
هو شاف اني انهرت وماقدرت امسك اعصابي وولدي وبناتي يبكون قالي الحمدلله على نعمة العقل والله لامتزوج ولا شي واني طابع هالكروت مقلب بدال الي سويتي في وجاب جواله وفتح محادثته مع صاحب المطبعه الي هو صاحبه وهو يقوله سويلي عشره كروت وزبطلي اسم عم حلو بسوي مقلب في الحرمه
بعد ماشفت المحادثة قالي ثمان سنوات من تزوجتك مامديت يدي عليك ولا احب ارفع صوتي عليك اخرتها ترفعين يدك علي وقام وطلع ارسلتله واتس اب سوالي حظر
اتصل عليه مسويلي حظر يجيني مشغول مشغول
اليوم جاء وحنا نايمين فتح الباب ونزل زبادي وحليب بنتي واغراض ومشى ومجاء لحد الان
غصب عني الي سويته اغار عليه لاحد يلومني وربي اكره الدنيا بدونه
قولولي وش اسوي اذا جاء محتاجه لكم
وإذا مجاء ايش اسوي والله اني ضايقه

وعليكم السلام
الله يهديكم ويرده لك و يسعدكم
هو زودها في المقلب احس ردة فعلك عاديه و مديتي ايدك بدون قصد ..بس ولو انتي غلطانه المفروض سيطرتي ع نفسك
مفروض اخذتيه ع جنب لغرفتكم مو قدام العيال حرام تخوفينهم و اكيد هو حز في نفسه انه سويتي كذا قدامهم
حاولي تتواصلين معه و تعتذرين و لا تسوون مقالب في بعض كذا ))):1:

مصيره يرجع ان شاء الله وتهدء الامور بينكم وبتضحكوا على ذا الموقف وبيكون لكم درس
المهم اصحي احد يعرف من اهلك او اهلة وكل الناس مره لا يطلع الكلام لانة بياخذوة نكتة ويتمسخرو بزوجك
انتبهي خليه بينكم مدى الحياة حتى لو طول زعله مصيره ربي بيهدية ويرجع
وهذي ردة فعل طبيعية لانة رجل وماقبلها على كرامته بصرف النظر عن المقلب شي وصار
الله يهدي سركم ويصلح الحال

سوي له حفله اعتذار

تليق بمقامه

لعل وعسى

يرضى

الله يخليكم لبعض حبيبتي

ولايفرقكم

المقالب تحتاج إلى تحمل ردة فعل الطرف الآخر .. لابد أن نتوقع أسوء ردة فعل ..

صحيح حتى ولو كانت الكروت صحيحة وانه ناوي الزواج فلا حق لكـ بضربه إطلاقاً

فهذا زوجكـ وله مكانته الخاصه وله كرامته ...

المقلب كان جامد جدا ... ويتوجب على زوجكـ انه كان حذر جدا من ردة فعلكـ ..

ولكن حصل ذلكـ ..

حاولي بأكثر من طريقة لإرضاءه والتسامح منه .. ولا تتركي الموضوع يتفاقم أكثر ..

إن شاء الله يكون عند الأعضاء أفكار حلوه للتسامح ...

عندمآ يأتي بأغراض لأولادكـ في آخر الليل .. حاولي أن تقابليه وجه لوجه وأعتذري منه بحرارة وندم ولا تتركي له فرصة بالمغادرة من المنزل وإن شاء الله يكون لها وقعها الخاص ..

أسأل الله أن يوفقك بينكما ويجمع بينكما بخير

تحية طيبة

أشوف أن ردة فعلك طبيعيه يحمد ربه ما سوى المقلب في المطبخ


لا تشيلين هم أتوقع أنو مصدوم من ناحية المقلب

وإن مارضى اليوم يرضى بكره