‏كم تمرّ ظروف .. وتعدّي ظروف
ما نزعل من أقدارنا لا ابتلينا

تعدّي الأحلام .. وعيوننا تشوف
وبما كتب ربّي علينا رضينا ..

من طوّل الغيبات يفقد مكانه
‏ياخذ غنايم غيبته .. مانبيها "

ما كل دخان في المجلس يجي له قبول

من قال دخان عود الطيب مثل البكت؟

ولا كل قافٍ سمعته قلت ليته يطول

قيفان ما هزت إحساسي ولا حركت

ولا كل راعي سوالف ملتزم بالأصول

كم سالفه من خيال الراوي تفبركت

يا مضحّك الناس ما يِطري عليك الفضول

الناس تضحك معك وإلا عليك اضحكت؟

إن كان منته بقايل شيء يملا العقول

الصمت خير إلك من ترديد بعض النكت

محدٍ بقايل لراعي الصمت ليته يقول

لكن كم قيل للهرّاج ليته سكت

ويا شاعرٍ صرت من دنيا الهوى في ذهول

دنيا الهوى شربكت دنياك وتشربكت

ما تهرج إلا عن الفرقا وظلم العذول

وقلوب تشكي لها، وقلوب منك اشتكت

لو القصايد تقدم للقضايا حلول

ما كل ساعة نزف جرحك وعينك بكت

في سكة الوهم ما تلقى محطة للوصول

كم ضيعت ناس قدّامك وناس اهلكت

قبلك ترانا مشيناها طلوع ونزول

سقنا الركايب بدرب الجهل لين بركت

حتى وصلنا بعد مرّت علينا الفصول

لنهاية الصيف وأيام الخريف أوشكت

من هرجنا ويش مكسبنا بعد ما نزول

ياما حكينا وياما الناس عنّا حكت!

والهرج من دون قال الله، وقال الرسول

جسمٍ بلا روح لو إن العقول أدركت

عبدالله الهذلي ..~