منتديات مسك الغلا | al2la.com

..

حاولت أن أكتب القصيده .. على طريقة الإلقاء

أتمنى أن تقرؤوها بالشكل الصحيح .. حتى يتسنى لها أن تكون جميله في أعينكم

..

إذا ما للشعر فتنه إذا ما للشعر حاله
لهيب أنفاسه من الفكر يشعل قلبك البالي

..

إذا ما هو شبيهٍ للوهج والغيم تنداله
إذا ما يحيي إحساس الهشيم بربعك الخالي

..

حرام إنك تِلَّفتْ له حرام إنك تعناله
حرام إنك تسوق إله القدم رجلي وخيالي

..

حسافه لو تقول الله يصح لسان من قاله
حسافه لو تعده يا شبيه الريح من جالي

..

كتبت الشعر من عمر الصبا جيدٍ وسلساله
واغني به مع عمي وأغني به مع خالي

..

وابوي يقول حي الصوت واللي جر مواله
ويهمس لي يقول آعز من ربيت بعيالي

..

وانا طفلٍ يقبل كفه الطاهر ودسماله
واقول آنا حبيبك يا يبه ويضمني سالي

..

لذا يا شعري اسمع شاعرك لو حالته حاله
طلبتك لا تشمت بي عدو وتبدد آمالي

..

كبرت وصار يكبر بي ولو يعقد طرف شاله
وانا ويــاه نشرب من ضفاف المر والحالي

..

كتبته حالة إستنفار تشكو جاير اهماله
كتبته مهرةٍ ما تعشق إلا ميلة عـقــالـي

..

كتبته يستفز المشيه اللي جات مختاله
كتبته يبتسم لعيونها ويكب فنجالي

..

كتبته في رقيق الصوت وإلا ساعد ابطاله
إذا ماني بالأول عدني يا شعري التالي

..

انا ماني قصيدٍ ينحصر بعيون عذاله
بما قد قدمت يمناي ماهي تدري إشمالي

..

أنا ماني قصيدٍ ترتعد يمناه وشماله
انا كفٍ لـيـا مــدت تـهـز صدور عذالي

..

انا ماني بـشـاعـر لا تكلم يسبق افعاله
انا قدام أقول الفعل يسبق صادق أقوالي

..

أَطَرِّز من مآسيِّي تبسامةْ طفل داله
واعيش بواقعٍ فيه الخيال يفوح بدلالي

..

أنا ماني نقيضك ياليوضوح الصافي ازلاله
لو إني غامضٍ بعيون من يُصغِي ويقرالي

..

أعدك من خيوط الشمس واتهجاك برماله
واعيد صياغتك وآشكلك وآقول تحلالي

..

انا شاعر تفيض إبه المشاعر لين ترثاله
تقول الله يرحم خاطرك ويسَمِّح اقبالي

..

..

إلى هنا

..

عتيم

19 / 9 / 1438 هـ

..