السلام عليكم ورحمة الله وبركاته .

موقف صار معي في مستوصف خاص رحت له للعلاج
وجلست انتظر دوري بقسم الرجال .. ولاكن جميع الحضور
مافيه احد يسولف كل واحد ماسك جواله ويلعب فيه
طبعا وقتها ما معي الا ( سيد مصباح ) ابو كشاف
مليت وطلعت اتمشى في ممرات المستوصف
وجتني ممرضه وقالت لو سمحت اخوي رح قسم الرجال هنا ممنوع
قلت طيب رحت وكتبت هذه الابيات .. ان شاء الله تروق لذائقتكم .



دفعت من كيسي ريالات واموال
مدري رضا هالنفس ولا انعمينا

جلست بالكرسي وانا ضايق البال
دوري يا بنت الناس طول علينا

يمناي رجالٍ ويسراي رجال
اجمل حكايا الصمت حنا حكينا

جيت الممر وشفت العيون تختال
رموش عينك لعبت الدور فينا

الزول مهره لاكن بدون خيال
واضح ثبات العود للناظرينا

من شوفتك قمت اتخبط كالاطفال
كني كما عدنان من دون لينا

صرت اتواضع بالنظر والانفعال
خوفي على النبضات لا تبتلينا

يا بنت كافي لا تفكين الاقفال
ياما رميت العين ولا انرمينا

مبطي وانا مع شيخه الغيد رحال
اخفت هواها عننا واختفينا

صعبٍ اعيد التجربة دون محتال
غصبٍ عليها بالوفا تحتوينا

وانتي صغيره سن والعمر مازال
يحكم عليكِ بالدلع تزعلينا

وانا عليكم بالشكل واضح الحال
من نار صكات الليال اكتوينا

مغروز من جالٍ ومنزوع من جال
كني عن الاثقال كفت يدينا

هذا ولي بين الرجاجيل منزال
عالي تعلى فوق محنا بغينا

لاكن ظروف الوقت مع طيب الفال
تمشي بعكس دروبنا اللي مشينا

الحب نكبه والمخاليق جهال
قلوب خظرا والبشر مايلينا

يم الغزل واهل الغزل والتغزال
اما اشتهانا بليس ولا اشتهينا

نمشي معه بفعال ماضن تنقال
عيبً علينا حيّل عيبٍ علينا