لسلام عليكم ورحمة الله وبركاته . .




ما علينا، على كل حال ندخل بالموضوع . .

-

القناع القاتل أو بالمعنى الآخر إللي يُعرف بـ " النفاق "
هو الوجه اللطيف والجميل إللي ينظهر أمامنا ونحبه وننسر بمعرفته ونسعد للقائه
وما خلف القناع!
الوجه الآخر الشرير الحقود إللي لوهله تتمنى لو ما عرفت وش قال عنك بالخفى!
هذا تعريف بسيط عنه من وجهة نظري طبعًا . .

بآخر فترة من دراستي لاحظت هالعيّنة بكثره وأشوف كل مالها تتكاثر
لدرجة صار شيء صعب نفرّق مين صديقنا ومين حبيبنا !
أغلبهم وإذا ما كانوا كلهم صايرين يرتدون هالقناع بشكل مُخيف، ليش النفاق؟
ليش ما نكون واضحين بعيدًا عن التصنّع ولبس الأقنعة؟ لهالدرجة الوضوح شيء صعب؟
أنا ما يقهروني غير إللي وقت ما يحتاج منك شيء يجيك بأرقى أسلوب عشان ياخذ حاجته
وهو ما خلّى ولا بقّى شيء ما قاله عنك، ولما تكتشف بعدين هالشيء تحس نفسك مسكين
وتندم إنك عطيته الشيء إللي يبيه وسمحت له يلعب عليك وحطّك بموضع الشخص الغبي


أنا عن نفسي لما أعرف إن في حولي شخص منافق أحاول أتجنبه قد ما أقدر!
ومستحيل ألبّي له أي طلب يطلبه مني، ولا بسمح له يلعب عليّ، وبحسّسه بطريقة ما
إني مُدركه بأنه يتكلم عني عشان ما يفكّر يسوي يتذاكى عليّ
عاد أنا نظراتي لحالها ما تقصّر وللأسف ما أقدر أتحكّم فيها وياما سبّبت لي مشاكل
أنا هذي طريقتي بالتعامل معهم لكن لازم ندوّر حلول أخرى يقدر أي أحد يطبّقها
لأن في ناس من النوع إللي ما يقدرون يقولون " لا " أو يرفضون طلب لأي أحد
وهالنوع من الناس جدًا يعانون من هالشيء لأنه صار شيء بطبيعتهم وصعب يغيّرونه
أنا الحقيقة مواقفي مع المنافقين كثيرة، وجدًا أبغضهم وأتمنى لهم الشفاء لأنه فعلًا مرض
إنك تنافق وتظهر شيء عكس إللي فيك هذا بحد ذاته تصنّع ومرض نفسي!
لا جد يعني وش بتستفيد من النفاق؟ راضي عن نفسك بهالقناع القبيح والسيء؟
الوضوح شيء جميل جدًا، اظهر للعالم شخصيتك كما هي وانزع هالقناع للأبد!


طبعًا النفاق موب بس كذا وخلاص!
النفاق له أكثر من نوع بس حبّيت أركز على " النفاق الاجتماعي "
لأنه بنظري منتشر بكثره في هالزمن، ففي النفاق الديني وهو المعروف فيه إن الشخص :
يظهر الإسلام ويبطن الكفر، وهو يختلف كثير عن النفاق الاجتماعي لتجنب اللبس . .
وما ننسى حديث الرسول صلى الله عليه وسلم لما حذّر من هذه الصفة الذميمة لقوله :
{ تجدون شر الناس ذا الوجهين الذي يأتي هؤلاء بوجه وهؤلاء بوجه }
ففعلًا مرض نفسي لما ما تقدر تعبّر عن إللي بداخلك بكل وضوح بعيدًا عن الكذب
إللي يتصّفون بهذه الصفة حاولوا تظهرون على طبيعتكم وجرّبوا شعور العفوية والوضوح
صدّقوني أنتم محرومين من مشاعر جميلة وكابتين أنفسكم بين النفاق والتصنّع!
دواء هذا المرض بمتناول أيديكم متى ما قررتوا تتشافون منه

-

نجي إلحين لفقرة الأسئلة

- إيش آرائكم عن النفاق؟
- عندكم مواقف مع هالنوعية من الناس؟ وإذا حصل لكم موقف اذكروه هنا
- كيف تتعامل معهم؟ أو إذا سبق وحصل لك موقف معهم كيف كان تعاملك؟


هممم خلوني أنا أبدأ أجاوب

السؤال الأول جاوبت عنه فوق، اما بالنسبة للثاني الصراحة حصل لي أكثر من موقف
بس بقول واحد لأن هو أكثر واحد تنرفزت منه، المهم كانت عندنا أستاذة دين تدرّسنا
بالترم الأول وأشوف بنات كثير يمدحونها لكن أنا شخصيًا صراحة ما ارتحت لها
وتنرفزني مرة مدري ليش!
المهم بعد ما عاشرناها وكذا، هي قدامنا تمدحنا وشبه حليله لكن تعالوا شوفوا من ورانا!
وصل لنا كلام من أستاذات ومن بنات شاهدين على نفاقها، حسبي الله على إبليسها
ما بقى أحد ما سبّت فصلنا عنده وما خلّت شيء إلا وقالته يعني تشويه سمعة موب طبيعي
إللي يقهر إنها أستاذة دين وأكيد دارسه عن النفاق والغيبه والنميمه، يعني صدق لا تعليق!
والله وقتها كلنا كرهناها وتضايقنا من حركتها،
وبالترم الثاني لما قالوا ترى بتدرسكم أستاذة دين ثانية والله ما تتصورون قد إيش كلنا استانسنا
وأولهم أنا، حرفيًا محد كان يبيها من بنات فصلي
يا رب لك الحمد إنها تغيّرت ولا مدري شلون كنت بتحمّل غثاثة حصصها!
وعاد شلون تعاملت معها والله تعاملت بنظراتي
وبس والله . .
-

وبكذا انتهى الموضوع . .
إن شاء الله أكون وُفقت بالطرح وكان الموضوع خفيف عليكم
أنتظر ردودكم ونقاشاتكم الحلوة والمُمتعة
دُمتم بكل حب وخير