منتديات مسك الغلا

منتديات مسك الغلا (/vb/)
-   همس القوافي - شعر - قصائد •• (https://www.al2la.com/vb/f5.html)
-   -   سرب الحمآآم (https://www.al2la.com/vb/t88204.html)

آيآم 03-08-18 12:28 AM

سرب الحمآآم
 
لى حسب ما مرني ومن تجارب الأولين
وجهة نظر ويجوز فيها الاتفاق والانقسام

أترك مسافة كافيه بينك وبين الآخرين
بعض البشر ودك حدود المعرفة معهم سلام

أصمت ولا تحرص على كثر الكلام الصمت زين
اللي سكوته ساتره يمكن يعريه الكلام

وإذا تكلمت أحذر تكون أطول المتكلمين
السالفة لا طولت يضعف معاها الاهتمام

وأمزح ومزحٍ باللسان أخير من مزح اليدين
مزح الرجال العاقلة على حدود الاحترام

وأضحك ولا تضحك برفع الصوت رفع الصوت شين
من الأدب والذوق عند الضحك ضحكٍ بابتسام

وأكرم وبيبان الكرم واجد ولا يحتاج دين
وترى الرجال إكرامها ماهوب في كثر الطعام

وأحلم ولا تعجل ولا تغضب ولا تشري بدين
وشاور ولو رأيك معك لا شرت عداك الملام

وإذا شريت بدين لا تبطي على المتجملين
كلٍ حلاله غاليٍ عنده لو إنه ما يسام

ولاجاك مديونك معه بعض الوفى وبعضه لحين
فأستد باللي جاك وشدراك لله الدوام

وترى التغافل فيه لذة وأنشد المتغافلين
وإن جات كلمة توجع أطلقها مع سرب الحمام

وارضى ليا جاك الرضى لو العذر ما هو سمين
وترى التسامح ميزة السادة رفيعين المقام

وصادق وإذا صادقت ما جربت ما صادقت لين
إما يطول بك السهر وإلا يطيب لك المنام

وأصدق مع نفسك وتلقى نفسك من الصادقين
والنفس خيل إبليس لا تعطيه نفسك واللجام


وليا نصحت أنصح خفى لا تفضحه فالحاضرين
ترى الرجال يقودها لين الحكي قود الخطام

ولا تواضع في حضور العالم المتكبرين
تكلم بنفس الطريقة معهم ونفس النظام

وأخلاقك وتواضعك عامل بها المتواضعين
ونصف الأدب مجاملة جامل ولا تجامل لئام

وإذا تسولف عن طموحاتك مع المتفرغين
كنك تسولف للنصارى فالحلال و فالحرام

والعمر ما هو فرصةٍ وحدة ولا هو بفرصتين
مع كل مطلع شمس لك فرصة وخطوة للأمام

هذا ولازلنا تعلمنا الليالي والسنين
والعلم أخير من الجهل والنور جلاي الظلام

الشاعر / عبدالله علوش

الفيفي2017 03-08-18 05:59 AM

ابيات رااائعه
واحب اسمعها دائما بصوت بن ردفه القائه مميز

يعطيك العافية

آيآم 03-12-18 10:18 AM

يعطيك العافيه ع المرور الطيب

الغاوي 03-12-18 10:30 AM

روعه
صح لسان الشاعر
ولا هنت على النقل والاختيار الاروع


الساعة الآن 01:15 PM.

Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا