((خل الغزل ياخذ طريقة ويعتاش))
 

خل الغزل ياخذ طريقة ..... ويعتاش
حرام خله ينتعش لا ............ تصده
متى تعين القلب في شوفة .. انعاش
متى تجينا ونلتقي بوسط ...... جدة
تبخل علينا بكاشكم يا هل ... الكاش
تكتب عليك الدين وتبطي ...... ترده
والياطلبنا حقنا صرت ....... تنحاش
ما هي من طبع اهل الهوى . والمودة
ما مرني مثلك من البيض ... غشاش
تاعد بدين بالوفاء ........... ما تسده
عجل علينا بالعطاء ورشنا .. ارشاش
عجل علينا باللقاء ............. لا تلده
يا روح روحي حالتي صابها ارعاش
والعين عافت نومها ........ والمخدة
وقلب العناء عقب المحبين ما عاش
وروحي تعذب عندكم من ...... يرده


القارظ العنزي

حلو الشعر وجميل صح لسانك ونبض قلبك
مبدع وكلمات حلوه

قصيدة جميلة جدا كعادتك مبدع
بس عني سؤال
بالبيت هذا
تاعد بدين بالوفاء ........... ما تسده
كلمة تاعد هل المقصود فيها توعد؟
الله يعطيك العافية

هلا بك الجنرال خالد والجمال كله في مرورك وصح احساسك لاهنت

احمد العالمي الجمال في مرورك لاهنت ، نعم ياعد معناه يوعد .

جميلة ابياتك بجمال فكرك الراقي


ممكن تقبل ملاحظتي الله يسعدك

( ما مرني مثلك من البيض غشاش
تاعد بدينٍ بالوفى ما تسدّه )

البيت هذا خصوصاً الشطر الثاني كثر فيه التنوين وصار الحشو
فيه كثير .. حاول ما تجمع التنوين في شطر واحد عشان تتجنب الحشو
او كسر البيت في حال تركت التنوين