لله يا أيام مضت لو تعودين * نفسي تبيها والليال تعصاها
قارنتها بالوقت الأول وذالحين * وحنت لها روحٍ تزايد عناها
رسمتها من عام خمس وثمانين * راحت سنين وخاطري ماسلاها
الله على بيتٍ لنا خابره طين * في حارةٍ مادنس الغدر ماها
الله على ذيك الغرف واللياوين * محلى برودتها ومحلى دفاها
لاجا المطر نرقى على السطح عجلين * نفتح مرازيم الغرف ونتباها
الله على جيران ابوي القديمين * ذيك الوجيه اللي كثير حلاها
الله على جيران ابوي العزيزين * اللي على الصاحب قليلٍ جفاها
نياتهم حلوة وللجار حلوين * تعتز حرمة جارهم بقصراها
الله على صدقان ابوي الوفيين * أصحاب شدات الزمان ورخاها
الله على صدقان ابوي الحبيبين * لاشافوا الخملة حديهم رفاها
اهم على زلات الأصحاب شفقين * لياجتهم العوجا تبين قداها
هاك الوجيه الطاهرين النقيين * لودارها درب الردى مالقاها
مافيه أمل ترجع هذيك الدياوين؟ * وهاك الرجال اللي كرام لحاها؟
واليوم ياوقتي تبيبي اليا وين؟ * ادخلتني غبات بحرٍ تطاها
رجعتني لوجيه ناس غريبين * ناسٍ تزوك انفوسها من عياها
فيهم قليل من الرجال المسمين * اللي تزبن بالوزى من نخاها
وفيهم كثير من الرجال المساكين * لوهي رجال مسنعتها نساها
رجالهم لوله من الوزن طنين * ريشة هوى يلعب بها من لقاها
ياشفتهم تقول وش ها البعارين * لاشك عند الحمل تسمع رغاها