هالفتره انا مدمنه محاضرات الدكتور ابراهيم الفقي " الله يرحمه "
انسان عجيب ، كلامه عقلاني و منطقي ،،

انا قررت بدل ما اسمع شيلات و شعر و فديوهات مالها هدف ،،
اني اخصص في اليوم ساعه او ساعتين اسمع محاضرات عن تطوير الذات و كلام تحفيزي ،،
منها اطور في نفسي و اغيرها ،، عشان احبني اكثر


اليوم ازعجتني بنتي و كنت بضربها ،، بس قلت الضرب ماراح يفيد ،،
عطيتها دفتر صغير اكتب فيه ملاحظاتي و اهدافي اليوميه ،، قلت يالله هذا دفترنا نكتب فيه اللي نبي ،،
و هذي صفحتك اجلسي مع نفسك و اكتبي الاشياء اللي ما تحبينها في نفسك و تبين تغيرينها ،،
بهدوء فكري مع نفسك ،،
المهم جلست تكتب تكتب ،، و عشانها دايم عجوله كل شوي تقول خلصت و انا اقولها كملي ،،
الين وصلت الي ١٢ نقطه ،، كلها سلبيات ،،

قلت لها يالله الحين عرفنا الاخطاء ، لازم نطلع لها حل ، عشان نغيرها ،،
و كتبت لها في الصفحه المقابله ١٢ سطر و رقمتها ،،
قلت كل خطأ اكتبي بسطر واحد كيف تصححين هذا الخطأ ،،
و الصراحه ابهرتني بالحلول ،،
بكذا عرفت الخطأ و عرفت الحل بكل بساطه ،،

و هذي الطريقه تقدرون تطبقونها مع انفسكم ، راح تنبهرون
كل شي مكتوب يرسخ في مخكم اكثر من الكلام في الهوا ،، يعني خلو معكم دايم نوت صغير
و اكتبوا فيه ملاحظاتكم ، اهدافكم و خططكم ،، و بعد انجازاتكم