مساء الكلام الطويل اللي يلتغي بالغلط

‏"لولي"

للي ما يعرفها كلب الحراسه حقنا من بعد موت سنايدي صغيره شقيه تحب تتهاوش مع بنات الحاره من فصيلتها وتتسبب بهوشه وتطلع منتصره بعد مايفزعون لها أخواني من براثن العدو

تحرك ذيلها فرحانه أن أحد دافع عنها من البشر

تحب تنام عند البوابه الداخليه وأحيانا تجلس بأخر المساحه

الساعه 12 رحت عندها مع أني ما ألمسها وما أحب الكلاب إلا أني أحب أجلس وأتربع أسولف معها تجلس تحرك ذيلها وتصفط أذانها بإنصات كنها تقول جت النشبه


المهم ساعه أحكي مشاكل ساعه أدندن ساعه أتسيمج ع راسها وما تمل مني الشيء الوحيد اللي يسكتني هو العبره لمن أهلوس بالكلام شيء بعيونها يتحرك هل هي دموع أم رحمه أم ماذا

بيني وبينكم أمي ماتدري عن طلعتي ولا كان بأقرب شبشب مقتنعه أن في وحوش تختطف الجميلات من وسط حوشهم

يآآآآآه يا سنين الصبر كلما أنسكب الصبر تلقفته إيدي الأمل إن لم يكن الغد ف بعد الغد

.

محب من يكذب علي أو يخبي أو يجمل قبيح عشان ما أدري أو يراوغ ويماطل أفضل تصدمني ع بلاطه أهون من أني أكتشف أنك شخص كذاب وتطيح من عيني

‏"قلت لها أحس في أحد يكذب علي ومصيري أكتشفه أرتبكت ليش؟"

.


عقب هالثرثره أريد قدحا من الكولا وصحنا مما لذ وطاب الزبده جعت وشلام