البـارحـه معطيـنـي الفـجـر انـحـره
وانــا عـلـي مــن الليـالـي مـاعـلـي
سمعني القمري على غصن شجره
صوتن شربني من علـوي لاسفلـي
تـدافـعـت مـشـاعـري عـلــى ثــــره
غنى على الخالي وانـا مانـي خلـي
باقي معي من وسعة الصدر شعره
والنار تصلانـي علـى كبـدي صلـي
واليـا ذكـرت العفـو عـنـد المـقـدره
تحاملـت نفسـي علـى كـبـر زعـلـي
لازال فـي الدنيـا مسـاحـه وسـفـره
المبـتـلا فــي غـيــر ديـنــه مـابـلـي
درسـن عطانيـه الزمـن مـن دفتـره
خـلا مزاجـي فــي التعـامـل مايـلـي
مالي ومال النـاس مـن حـب وكـره
مـحـدن بـداخــل جـنــة الله بعـمـلـي
الـطـيـب اخـاويــه لـوطــال سـفــره
واشيل حملـه فوقـي وفـوق جملـي
والخـبـل لوجامـلـت رايــه ونـظـره
لاثــر عـلـى رزقـــي ولامستقـبـلـي
وان شفت في خشمه نعافه ونعـره
حذفتـه بجلمـود صخـرن مـن علـي
تجـمـهـروا يـالـعـالـم المتـجـمـهـره
واردوا علـى رسـن يغيـب ويمتلـي
لاحدن يصدق صورته في المنظره
القـرد مالـه فـي عيـون امـه حـلـي
لـو يقلـط الطيـب علـى ولـد الـمـره
مـاعـيـن الــدلــه ولاراس الـطـلــي
انــا هـنـا وتـفــوح ريـــح العـنـبـره
بحـرن مايغـرف بالحبـال وبالـدلـي
ادور الـلــي يـرفــع الــــراس دوره
مانيب شـراي الرخيـص اليـا غلـي
عن قطة الكشتات خمسـه وعشـره
تعوضنـي وقفـة عزيـزن مـن هلـي
انـدى مـن كفـوف البخيـل المقبـره
تستقـبـل المـوتـى وعـيــت تمـتـلـي



مـدغــم ابـــو شـيـبـه