حافة الجنون ( بالعامية )
لما أكون قاعد مع حالي، بحس إنه في واحد ثالث قاعد بيننا ..!
زي كأنه مسكنا بوضع مشبوه ..!
بيبدأ الموضوع بحركشة مني لحالي، وحالي .. عارف شو بدي أحكي له.
بتحسه ماخد وضع التأهب.
أما الثالث بيراقب عن بعد، زي كأنه ذئب بيستنى لحظة الانقضاض على فريسته.
بسأل أنا حالي وقتها : يعني الواحد يفكر إنه في بكرا ..؟ أو خلص ( توو لييت ) زي ما بيحكوا هناك عندهم ..؟
بحس وقتها إنه حالي زي كأنه صدمته سيارة بسرعة ميتين كيلومتر في الساعة.
بيلتخم الله وكيلكم زي لما يسأل الأستاذ تلميذ حمار فجأة..!
وبيصير يحك راسه زي كأنه مقمل، على أمل تنزل فكرة تخليه يعرف يرد علي.
والثالث اللي بيننا بيصفن كثير، زي كأنه مضيع شي فجأة وبيحاول يستوعب ..!
بعد ...... من الزمن، بتضوي لمبة فوق راس حالي، وبيرد علي بنرفزة
( يعني بالله عليك إنت معك تحلق، لما تفكر بالمستقبل يعني ..؟! )
وقتها بحس الثالث بدون حيرة أو تردد، بياخد الطموح اللي وقع على الأرض، وبيكتب على شاهد قبره .. ( نسي حاله وحلم ببكرا ) ..
هيك هيك للتفاؤل