السلام عليكم :
منسف من شغلي بس على طريقة ماما الله يطول عمرها
اولا الجاج نفس المحمر بالزبط
الطريقة : بنضف الجاج بنغسلو بالماء والطحين والليمون وببهرو ببهارات الجاج
في صينية نفرم البصل وبنكترهم شوي بنحط عليه ملح كمية منيحة تكفي الجاج الي انا عاملو وفلفل وزيت الزيتون بسخى شوي بزيت الزيتون(يعني بحط كمية منيحة)
بجيب الجاج بفركو بالبصل وزيت وبصفو بالصينية وبخلي الجهة الي فيها اللحم اكتر لتحت
وبحطها بالفرن بغطيها لمدة45 دقيقة وبعدين بشيل الغطا وبتركها لمدة نص ساعة بعدين بقلب الجاج وبتركو كمان ربع ساعة لحد ما يتحمر
الرز: بنقع الرز وبطبخو عادي بس بضيف معلقة سمن بلدي عليه بعطيه طعم روعة
اللبن:لكل كيلو لبن بحط معلقة كبيرة معرمة طحين -بحطهم بالخلاط مع الجميد السائل
وبخلطهم منيح وبحطهم بالطنجرة وبحط ماجي وشوية كركم وشوية هيل ناعم بحطهم على النار وبضل احرك لحد ما يغلو بعدين بضيف إلهم ماء الجاج الي في الصينية بس بستعمل مصفاية عشان ما ينزل البصل بالشوربة
وصحتين