قم تلمَّس حاجة الفجر البعيد
وانشد الظلما عن أوجاع الزمان
ما حضرت من الغياب الا بجديد
لو قديم البوح يزهر بالمكان
شاعرٍ من طلّ بالدنيا وحيد !
شوفوا أحزانه على وجهه تبان
ما يخاف الجوع والبرد الشديد
كثر خوفه لا صدق والوقت خان
والله إن الخوف يرتع فالوريد
مثل ما يرتع بعشب الروض ضان !
كن صدري قاع والجفوة جليد
كن راسي شمس وضلوعي طمان !
ما اكتفى وقتي ويطلبني المزيد
لين ركبته على جسر الهوان
عيشة الساعي ورى حبر البريد
وعيشة ضعوف العرب كنا وكان !
خلها لو هي على بيت القصيد
البيان يصير من بعد العيان !
نرفع بيوت العرب من دون حيد
ونهدم بيوتٍ لها قدرٍ و شان !!
بس أخاف بموقف يوم الوعيد
ما يسرك فيه مال ولا لسان
لا وقفت وكل ذنبٍ صار قيد
وامتلى مالك على العبد البيان
عندها دوّر على أهل الرصيد
ولجل عين فلان سبينا فلان !
الحياة بكبرها وأخذ الأكيد ..
خلها بين الإقامة والأذان