ياذيب ياطلق الشواجع والمخالب والنياب
لا ياعقيد البيد ودروب الليال الممحلة
لا يادليل الموت لا هب الهوا والنجم غاب
واتلا النضا قامت تراثع بالقيود المزملة
بيني وبينك شي غامض كنه أطراف السراب
أخطيت في كل المعاني بين اعرفه واجهله
يمكني أعوي بين قافين الورق وان شاب شاب
والا انت طرسك من ضلوعك والقوافي مهملة
ياذيب من وين آصفك من حربتينك والشهاب
والا التفافك في عفافك والذراع ومنجله
لك صدمة الراعد ولك خطفة مثل برق السحاب
في سكنة اللحد ولك حمول الرياح المشملة
لك وانت تزحف للطريدة ذلة اللي تو تاب
لك وانت تعوي كبر من لايرتجي تال عمله
لانكفت مثل السيل واليا غزيت انت العقاب
وان صدتها لك لفتة حجاج الكريم المقبلة
وكن العوا اللي شل رعاش الفرايس والهضاب
اول دعا لله بالتوفيق واتلى البسملة
وقفات ابن هندي فـ انقضاصة ضاري وطعنة ذياب
في طيب شالح في ذكا ابراهيم باشا ومهله
يامضرب الفريس في السطوة وفي فك النشاب
يامتعب الساطي وياهيف الجبان ومقتله
أمنت لك فيما مضى غارات وطعون وصواب
وفجوج وارقاب ومراقيب وقنيب ومنزله
واليوم أشوفك تبسط الذرعان وتضم التراب
غيبت في وقت(ن) غدا عاليه من حدر اسفله
وان قلت انا رجل الليال السود مافيها ارتياب
مار البلا ان الوقت هذا مايبي له مرجلة