معوّض خير يا حيٍ خدعك من الرجال أشكال
تشوف أشكالها وتحطها أرفع من منازلها
تعلّم من زمانك لا تصير من أجهل الجهال
ترى في كل يوم تجيك عبرة لا تجاهلها
إذا ربي وهب لك عقل تلقى في الرجال رجال
تعرف اللي يقدّر قيمتك واللي ينزلها
ترى من بعض ما يندي الجبين ويحرج الرجال
ليا ساق الميانه في نفوسٍ ما تقبّلها
ومهما شفت في صاحبك من نخوة وطيبة فال
ترى بعض السجايا كثرة الإلحاح يقتلها
معاريف الرجال ديون وديون الرجال ثقال
ليا صرت متعافي ليش تغرق في جمايلها
رصيدك في حياتك سمعتك مع طيبين الفال
رجال الطيب والمعروف بالمعروف عاملها
ولا تبدي بجاهك في مقام ما يسر الحال
ولا تشفع لناسٍ ما تنومسك بفعايلها
ليا جاتك تعذّرها مدام العذر له مدخال
ووقت الجد قول لها الصحيح ولا تجاملها