خوذ غايتك ياجرح في تعذيبي
لانعاندك لانجيب يوم طبيبي
لو كان تنزف طول عمري كله
مانكش اقسى من فراق حبيبي
خوذ غايتك تعبني
ولا ادير كيف اللي رحل سيبني
زيد في عذابي ولوعتي عذبني
ولا انريد نسمع في الغرام سريبي
خوذ غايتك بكفايه
لاتحن ولاتهون عليا دايا
مانريد نبرى ولانريد شفايا
صابر علي مدعاي هذا عيبي
خوذ غايتك نستاهل
قلبي انجرح بالحب ماهو ساهل
ونا السبب ياجرح ماني جاهل
وعارف عذابي ايزيد في تعذيبي
خوذ غايتك سهرني
مانريد منك شي ولاتعبرني
واخذ على دمع الندم قاهرني
ومن قبل واخذ في العذاب نصيبي
خوذ غايتك مايسدك
علي راحتك لانعالجك لانردك
خوذ غايتك ماتراعي
وخليك قاسي الود ماله داعي
وانزف علي طول المدى بوجاعي
خوذ غايتك مادام غاب حبيبي