اهلا الاخ الكريم/ الخواف جميل، رايك هو ان "الفلوس" هي معيار النجاح في الحياة والدين ما يمنع المسلم من ان يسعى في الدنيا للكسب والثراء لكن .. - واكاد اجزم انك تتفق معي - انه اذا طغى سعينا ورا الفلوس على سعينا لعبادة الله سبحانه وتعالى، دخلنا في دائرة الشبهة .. والخطر لان حينها - ومن حيث لا نشعر - خلينا السعي وراء الفلوس وجمعها، في مرتبة ومقام يطغى على، واكثر من، عبادتنا لله اعطيك مثال بسيط على هالشئ اكيد تعرف المثل اللي يقول : لو تجري جري الوحوش غير رزق ما تحوش وانا استشهد بـ هالمثل عشان جزئية "جري الوحوش" لان في مفهوم ونمط حياتنا اليوم، اذا تبغى يصير عندك فلوس .. وتصير ثري لازم تكد وتسعى ليل نهار، وتضحي، حتى تحقق هالنجاح ولك في قصص التجار والاثرياء اللي يتداولها ويتناقلها الناس اكبر شاهد ودليل على هالشئ فـ .. في الاخر، اكيد، انت حتعطي من حياتك، ويومك، وساعاتك .. في سعيك للفلوس وللثراء اكتر مما تعطيه لله سبحانه وتعالى ولعبادتك له اكيد مر عليك الحديث الشريف اللي فيما معناه .. (من اصبح منكم امنا في سربه، معافى في جسده، عنده قوت يومه، فكانما حيذت له الدنيا) فالحديث يقولك اذا عندك فلوس على قد حاجة يومك فانت بثراء من ملك الدنيا ولما نقول "حديث شريف" فهو كلام من لا ينطق عن الهوى .. وهو المبعوث بالرسالة السماوية الالاهية وهو بمعنى ضمان وتاكيد من الله من انك يا مسلم ما تحتاج اكثر من قوت يومك، فلا تشغلك الفلوس .. والسعي وراها، عني .. ايش رايك ؟ فـ .. نعم الاخ الكريم، حياتنا اليوم، واللي هي مستنسخة بمفهومها عن نهج ونمط الحياة "الغربية" تعلمنا، وتدعونا، لان نعيش الحياة لدنيانا، .. وان نعيش الحياة للمتاع اللي فيها ولزخرفها وزينتها واللي حتما احد عناصر ومقومات النجاح فيها، هي الفلوس .. والمادة نقطة مهمة لازم نذكرها هنا وهي ان العبادة ما هي منحصرة ومقتصرة على موضوع الصلوات الخمس .. والصيام، .. الخ الموضوع اكبر من كدا، واللي حريص عليه ويبغى يعرفه .. يحاول يثقف نفسه في الدين اكتر وحيجد ان ابواب العبادة في مفهومها الواسع تشمل كل حركة وسكنة من الحياة .. وما يدور فيها شاكر كريم مرورك والمشاركة ، تقبل تحياتي