صباح الخير

كيفكم يا رواد الصومعة

ذاك اليوم يوم ماتت ملكة بريطانيا صاروا يتكلمون عن البروتوكولات الملكة داخل القصر

وكيف يتم التعامل مع العائلة من خلال هذه البروتوكولات بدون خرق لها


جازت لي الفكرة

وقلت ليه يا ولد ما اسوي بروتوكولات للعايلة وخاصة شلة حب الله والمؤلفة قلوبهم

طبعا على شان تعرفون شلة حسب الله هذي افراد العائلة من الذكور

الولد الصغير هذا لحاله يبي له بروتوكول نلزقه على جبهته

اكثر واحد ملعّب ويخرق ابو البروتوكولات

والشلة الثانية المؤلفة قلوبهم هذي شلة البنوتات كلهم صغار وعلى رأسهم الام

السنة هذي حطينها ضمن الشلة وذلك بعد مواقف اثبتت ذلك


ذلك اليوم قررت مصادرة جميع منابع النت بالبيت وتجفيفها

وكلها نزلتها بالصالة الارضية

على شان اجبر الضبان يطلعون من غرفهم

اصلا اكثر ما ينرفزني يوم اشوف النظام قلب كأنه مطعم

يجي واحدهم ياخذ اكله بصينية ثم يدور له مكان هادي ويحط الجوال قدامه وياكل شوي شوي

هذا يعتبر استنساخ للرجل الشرقي

حنا يوم نعزم الحب بالمطعم نقول بسم الله وناكل خلال ثلاثة دقائق وثلاثين ثانية

إلا حنا مخلصين

ثم نتفرج عليها وهي تأكل بهدوء وتروّي وكأن على رأسها الطير

ما تقول الحمد لله الا بعد نص ساعة

طبعا حنا نخلص بثلاث دقايق ثم نطقطق بالجوال

ونروح ناخذ لقمة خفيفة كذا نجبر نفسنا عليها يعني مشاركة

ونعيد الحركة بعد خمس دقايق

إلا تطول السالفة


المهم طلعنا عن صلب الموضوع

موضوع البوتوكولات العائلية

وابي انزل بند بالبروتوكول لأم العيال ممنوع مغادرة المنزل مساء يوم الخميس

عاد هي تداوم طوال الاسبوع وا تصدق يجي الويكند

وابي امارس عليها ما تبقى لنا من الولاية قبل ما تنقلب علينا الامور ونصير رهن اشارتها

الوضع داعس لصالحها