الموضوع مركب شوية
تعريف كلمة الصداقة في المنتديات
او الشات معقد شوية

الأغلبية او ربما الكل بيدخل المنتديات عامة
وفي دماغه انها مرحلة مؤقته من حياته
ومحتم انها هتنتهي في أي وقت ..
والبعض بيستحوذ عليه فكرة
ازاي انا مثلا موجود بشكل مستمر في عالم افتراضي
لدرجة ان بيخاف ان البعض يطلق أحكامه
انه شخص بدون حياة واقعية او حقيقية ..
وده بيخلي كتير بيدخل باسم واتنين
ومشاعره مش حقيقية لحد غير لنفسه
او لاغراض تانية مش حابب اكلم فيها ..

بس الكتير بينسحب اول ما تجيله فرصة
او انه ينسجم في حياته وينشغل فيها ..
يتجوز بقا ... يشتغل ..
احيانا تلاقيه يرجع بعدها بفترة
فيلاقي نفسه مش قادر ينسجم
او مش قادر يدخل
لأنه مش عاوز يستحوذ عليه المكان مرة تانية ..
او مش لاقي نفس الناس اللي كان سايبها ..
او يدخل ويحاول بس يحس ان المكان مش بتاعه ..

وفي البعض مش بيقدر يتواجد في عالمين في نفس الوقت
بمجرد انه بيشعر بعدم السيطرة بينسحب من حياة ناس تانية
هما احتمال مقدرينه بشكل مختلف..

وده ينقلنا بقا المشاعر ..
مش كل الناس اللي بتكتب هنا كلام بتعنيه ..
مش كل حد يقولك انت صاحبي او حبيبي
يبقا بيعنيها ...
مش كل من بيعمل هههههه هو بيضحك في الحقيقة
الكتير بيكون عايش دور مش دوره
لحد ما يلاقي دور يناسبه في حياته ..
ودي حقيقة لازم كتير يفهمها ..

اكيد في ناس طلعوا ببعض كصداقة
بس دول اقلية جدا .. وممكن الظروف تساعد
غير كدا
في اخر اليوم لا احد يهتم

انا واحد من الناس تواجدي في المنتديات
خلاني بتعمد من فترة طويلة اني ماكتبش كلام لا أعنيه
ماقولش لحد حاجة انا مش شاعر بيها ..
من قبيل احترامي لنفسي ..
مابقتش انمق الكلام بتاعي ..
مابقتش ابيع كلام من الآخر..
بسبب اللي قلته فوق ده ..

يعني انا كنت في اول منتدي دخلته عن طريق الشات
اعرف ناس كتير ومصاحب ناس كتير
وماكنتش بعمل غير اني بهزر واضحك وفي الوسط بكلم شوية جد
من الآخر انا لو فتحت العنان لنفسي هنا زي زمان
الكل هتتغير نظرته ليا .. بس الزمن مش بيرجع لوراء
انا وصلت لقناعة في نفسي .. و ما بقتش اقدر اعمل غير كدا ..
مابقاش عندي فضول لحاجة من الآخر ..
لأني فاهم اخرها فين .. فمجرد اني بحاول اتسلي
بأني اهري شوية في اي نقاش وخلاص ..
علي سبيل اننا نقضي فراغنا بشكل سليم ليس اكثر ..

يعني قلت اشارك كتجربة كشخصية
يمكن الصورة تتضح ليكي اكتر..