تسرمد غلاك بداخل القلب والحشا
سنينٍ وأنا نفسي عن الحب تايبه
تعتّق وثار الهم وأنا عذبة الهوى
تمادى على روحي وهبت هبايبه
تخاوى مع أفكاري وبعثر سكونها
تركّى على دمعي وهلت سحايبه
توجّدت حبك وأسهر الوجد مقلتي
كلا الشوق قلبي وأثقل الهم صايبه
تشفّقت شوفك كل ليلة وأنا احتري
أمد النظر للدرب والعين خايبه
سرا صوتك بسمعي اهوجس وأسمعه
وهَذي سواة الحب وهَذي عجايبه
متى تحتضن يدي يدينك وتنطوي
مسافات بعدك والغياب وسبايبه
أنا في دخيلك لو تعجّل لنا اللقا
تبرّد على كبدٍ من البعد ذايبه
ترا القلب ظامي شوق يشكي من الوله
ولَا يرتوي إلا بشوفة حبايبه
ام الفهده