أسباب كثيرة لو نجي نحصرها مانقدر
والأخوة اللي قبلي تكلموا عن أهمها
بالنسبة لي اشوف أن للأسرة دور كبير في المشاكل النفسية اللي صايره اليوم
الأسرة اليوم اختلفت عن الأسرة زمان
زمان كانت الحياة صعبة مو زي اليوم
وكان الأب مشغول طول الوقت برى البيت مايجي الا بالليل ويجي تعبان مافيه للهواش ووجع الراس يبي ينخمد بس
والأم طول الوقت مشغوله بالكرف بين البيت والأطفال ولو لقيت وقت قصير تروح لم جارتها تتقهوى وتنبسط شوي
والأطفال عايشين حياتهم بالطول والعرض بعيد عن التوجيهات والضغوطات ليش سويت كذا وليش ما تسوي كذا
الجيل القديم نشأ نشأة سويه بدون ضغوطات وتكسير مجاديف
أما اليوم صارت فترة الاحتكاك بالعائلة اطول
وفي أحيان كثيرة يجي الأب مضغوط من برى ويفجر غضبه في الزوجة والأطفال المساكين
وهي ماتتحمل تقوم تنفجر هي الثانية في أطفالها
والنتيجة جيل مضغوط معقد وحتى مايعرف يدبر نفسه تعود على التوجيهات في حياته
وهذا الشي زاد الضغط النفسي عليه وولد أمراض نفسية متنوعه
بالمختصر
أنا مع المثل اللي يقول كل مهّمل مكمّل بس بحدود طبعا
الحرص الزائد والتدليل الزائد كلها تطلع معاتيه
اترك طفلك يمارس حياته الطبيعية ويكسب خبرات وتجارب منها مع مراقبتك من بعيد
لا تتدخل إلا عند الضرورة القصوى
كذا تطلع انسان طبيعي يقدر يتحمل الحياة وصعوباتها ويحل مشاكله بنفسه