روح في دربك واقول الله معاك
صعب تفهني وأنا صعب أسمعك
ألتقينا بكل شي الا هواك
وأتخذت أصعب قرار آودعك
الغرور الي سكن قلبك عماك
تحسب أن الحب خاتم بالصبعك
حبي الخايف رغم خوفه حماك
وصدقي نزلني ولكن طلعك
كنت أحسب أن الهوى كله وفاك
مطمعي حبك وحبي مطمعك
كنت اشوف الغيم يركض في سماك
وكنت أشوف الورد يتلاعب معك
كنت أشوف الشمس شمعه في ضياك
ومطلع أبيات القصايد مطلعك
كنت في عيني هوى روحي ملاك
صوّرك رب الخلايق وأبدعك
دوم تجرحني ومشيها معاك
دوم تنثرني وانا دوم أجمعك
لان حبي كان أصدق من خطاك
كنت انا أكبر من مجرد أخدعك
كنت أفكر كيف أنا أوصل رضاك
كنت أحاول في هوايه أقنعك
لكن الأيام ورتني قساك
ماقدرت آقول كلمه تمنعك
أنتهى حبك وقلبي قد نساك
ياخسارة عمري الي دلعك
لانت من ثوبي ولاني مستواك
خل هذا الكون كله ينفعك