سود الليالي هينة.. لا تحاتين
إذا على سود الليالي.. عوافي

أجل لا عشتي عيشتي.. وش تقولين؟
لا القلب متطمن ولا الرمش غافي

والله يا مرّت على عمري.. سنين
كانت تمشيني على الجمر حافي

قضيتها في ضيق صدر وسهر عين
ماني مقضيها على فراش دافي

تقطع أحلامي بحد السكاكين
هي تقطع أحلامي.. وانا أقطع فيافي

وجيتك وقلبي مجوده في يدي زين
وافي وأدور له على قلب وافي

لين الصدف خلتك جنبي تمرين
في ليلة يبغى لها.. بال صافي

وياك.. أنا عندي عمر ثاني الحين
لكن ورى خوفك لـ هالحين.. ضافي؟

يخوفك درب الشقى؟ لا تخافين
لا صرت أنا ماني بموجود.. خافي

على هواك وسوي اللي تسوين
أنا بوجه الضيم.. وأنتي خلافي

إييييه اضحكي.. والحزن خليه بعدين
بعدييين.. لا صار المواصل تجافي!"
– مشاري الغنيم