صباح الخير،
أنا بدأت قصتي مع القهوة متأخر جدًا، يعني تقريبًا من سنتين بس، قبل كدا كنت بشرب الشاي فقط لا غير

القهوة بالنسبة لي كانت مرتبطة بطقوس «العزاء» مش عارف النقطة دي موجودة في باقي الدول العربية ولا لأ
بس في مصر عموما بيشربوها في العزاء والمناسبات دي

لما بدأت أنتظم في الجم ، قرأت فوايد ليها، ودورها في تسريع معدّلات الحرق، وزيادة نسبة الانتباه أثناء التمرين، فبدأت القصة من هنا
كنت بشربها في الأول بسكر عادي، وبعدين مرة حد قالي عيب تشرب القهوة بسكر
فبقيت أشربها بدون سكر
ومستمر على كدا

بشرب في اليوم كوبايتين

بشرب القهوة التركي معرفش غيرها
-
نسيت اقولكم إن لي تجربة وأنا في الكويت كان زميل لي كويتي في الشركة جايب معاه قهوة، شكلها غير بتاعتنا دي، بس كانت مرة مرة مرة بضم الميم
مش قدرت أكمل بوء واحد