بكرا بيصير لي ست شهور من اشتركت بالنادي.
كنت متحمسة بالبداية لكن اليوم صرت أشوفه مثل العمل،
تأدية واجب وحق من حقوق جسدي وصحتي علي
فصار أقرب ما له روتين، وهذا الهدف.
أستمتع بتمارين الصدر والظهر، ألمها لذيذ
وأستمتع لا صار عندي وقت ورحت المسبح بعد التمرين.
أذكر أني رحت أول يوم العصر
وكان الجو كئيب، وزحمة، وتعب،
ويروح النهار وأنا هناك بدل ما أجلس مع أهلي،
فما لقيت وقت مناسب أفضل من الفجرية.
كنا وقتها بالصيف فكنت أصلي الفجر، أسوي فطوري،
أطلع للجم، أتمرن، أطلع من الصالة وأروح أسبح،
أدخل الجاكوزي البارد، أتروش والدوام ما بدا.
الحين الوقت ضيق بالشتاء،
وما يمديك تقرأ أذكار الصباح إلا أمداها
صارت الساعة ست! ودوامي مبكر يبدأ سبع.
فصرت أقوم أتهجد لي ركعتين قبل الأذان،
أصلي الراتبة ثم أقرأ أذكاري وعلى الجم،
وعلى هذا الحال روتيني تعدّل.
والحمدلله دائمًا وأبدًا.