دايم أسمع عن سالفة التعلق،
في وايد ناس يتعلقون بالأشياء والأشخاص
أخوي من النوع اللي يتعلق بالأشياء،
مثلًا بطانيته يتضايق إذا تغيرت
ويخبص الأمة إذا أحد غيرها له،
وهالشيء من كنّا صغار..
فصرت أفكر، أنا من هالنوع؟ أتعلق بالأشياء والأشخاص؟
أنا لا، ما تعلقت بحياتي لا بشخص ولا بشيء..
الشخص الوحيد اللي متعلقة فيه بحياتي هو والدي
من كنت صغيرة متعلقة فيه هو بس ولحد الآن،
أتذكر لما كان يبغى يروح للحج
وقلت لأمي تمر تأخذني من المدرسة
عشان اشوفه قبل ما يسافر،
بس تأخرنا بالطلعه وسيارته اللي يروح
فيها للمطار تعدت علينا وما لحقت اشوفه،
ولإن ما شفته مرضت وظليت بالفراش
لين قدر أبوي يتصل واسمع صوته،
يا الله ارتحت وقتها عمري كان 6 سنوات،
وعندي وايد مواقف بحياتي توضح
إن ابوي الشخص الوحيد اللي متعلقة فيه،
حتى أمي واخوي وكل أهلي ما تعلقت فيهم
مثل ما تعلقت بحبيبي والدي..
بعد اني أترك الأشخاص بسهولة،
ما عندي سعة صدر اتحمل الشخص.

في صديقة أعرفها.. علمتني شيء،
هالسالفة صارت بأيام الدراسة
هي قالت لي أي شخص يأذيني
أكثر من 3 مرات أتركيه،
لا تبقين معاه لإن بعد هالـ3 مرات
راح تعانين وتتألمين منه وما تقدرين تتركينه
فأنا إلتزمت بنصيحتها وتركتها .

مافي يوم نظرت لشخص بأنه راح أبقى معاه للأبد،
إذا ما فرقتنا خلافاتنا راح يفرقنا الموت
وأدري إنه الناس تتغير وتختلف،
محد يبقى على حاله وهذا من حقه بأنه يتغير
فممكن لهذا السبب أنا مو متعلقه بأحد،
أنا أصنع ذكرياتي مع الأشخاص اللي أحبهم
ويكون لحد ما يختفون من حياتي وأحذفهم،
أغلب الأشخاص اللي قطعت علاقتي وياهم
ذكرياتهم حذفتها من عندي،
لإنهم جزء من فترة من حياتي وعمري
وهالشي عدى وراح يتم بالماضي،
مهما كانت خلافاتنا أو سبب نهايتنا
فأنا بدل ما أخاف من نهاية علاقتي مع شخص
أو أنظر لعلاقتنا "بالخلود" أعيش أيام حلوة وياه
وهذا أهم شيء،
محد دايم لأحد وحتى مواقفنا راح تنسي.