ولما قلتلها وفيها ايه
لو تقولي بحبك
قالتلي فيها قبايل
طيب خلاص
وانا كمان مش قايل
حتى ولو العشق سوى
ف القلب الهوايل
مش قايل
مش هقول انك
رقيقة وانك بريئة
وانك ف الحب جبانة
لكن ف القصف جريئة
ولما بس يقلب مزاجك
حاجبك ينقلب ثمانية
والعيون الوسيعة
تبقى حريقة
طيب بلاش تقولي بحبك
لو هترتجف شفايفك
أو هترتعد صوابعك
بالرغم قلبي ماهو شايفك
خابر ان الخيبة طابعك
بلاش تقولي بحبك
ابعتيلي غنوه
تقول بحبك يا اسمراني
تقول جاني الفرح جاني
تقول ان الهوى رمانا بسهامه
والشوق عامل عمايل
ولما قلتلها وفيها ايه
لو تقولي بحبك
قالتي مجنون انت
دا فيها قبايل