.













اسمه غريب..: وغربته قنديل
هذا العتيم .. اللي فهق عتمه

ياما صنع من هالقصايد جيل
تاقف لها الاجيال مزدحمه

ما له شبيه إلا شعور النيل
بشفاه طفلٍ يرتشف بسمه

في فكرته يخرج عن التأويل
حتى دخول الدهشه برتمه

كريم : لكن في الهزيل بْخيل
من شخطته الاولى الى البصمه

يبجل اهل الذائقه .. تبجيل
نبضٍ يِصَبْ بروحه وعظمه

يشيل حرف لعينهم ويعيل
حرفٍ يمر صدورهم نسمه

قادر يصير لدمعهم منديل
ولـ افراحهم يلعب طرب نظمه

انسان ما يكره سوا التضليل
ولا يعشق إلا الصدق لو نقمه

من كبريائه .... يلعن التطبيل
والفكره اللي ما لها لزمه

ماهو بكبر ولا هو بتقليل
لو ساحة الشعار محتدمه

لين انسحب في ساعة بتحيل
ناره رماد.... وليلته عتمه

يومه وقع بالحب قبل يخيل
سحابة ٍ
........... كان الظما قسمه

الحب لو ما يشبهك يا ابريل
كذبه.. تجيك احيان محتشمه

الوانها.... من علبة التجميل
زيفٍ يغرّك سيّدي رسمه

ياما صبر واشتال حمل ثْقيل
حتى... . وقع به صبره وعزمه

ما هَز من شان المواصل ليل
خايف تطيح من السما نجمه

يحس في صدره مدابك خيل
وفي العين دمعة خوف منهزمه

يا رب انا عبدك.. واحبك حيل
ولي نفس في تقواك ملتزمه

آمنت بالقرآن....... والانجيل
وان النبي المصطفى رحمه

ما عاد لي في الناس حط وشيل
انا اعتزلت الناس.. والزحمه






* عتيم !!






.