أما وقد طلب مني شخص عزيز تكملة القصة بتاعة الأميرة انجي وبن الريف ف نكمل الحكاية
كنت وقفت عند أن أنا اعتمدت خطة معين علشان اتعرف عليها .. احنا خلاص الدفعة اللي هي حوالي 2000 طالب اتقسمت لسكاشن كتير حسب الحروف ومن الحظ أننا كنا ف سكشن واحد الخطة كانت تتلحض ببساطة في اني اخليها تعرف اني معجب بيها طبعا بدون ما اكلمها طب ودا يحصل ازاي أن شاء الله هقولك يا نجم ببساطة مفيش بنت على وجه البسيطة تقدر تقاوم نظرة الاعجاب هو ردة الفعل بتكون مختلفة طبعا وكمان الوقت اللي هي تلاحظ فيه أن الشخص دا فعلا بينظر لها النظرة دي ونظرة الاعجاب مش بتكون نظرة وقحة طبعا فيه فرق كبير المهم اعتمدت الخطة ويوم ورا يوم فعلا انجي بقى كتير ابص ناحيتها الاقيها هي كمان بتبص عليا اه صحيح نسيت اذكر متعمدا اني كنت الشاب الاسمراني الحليوة ابو عيون عسلي ههههه هيييح بس
وبعدين تفوت الايام والشهور ويخلص التيرم الاول وناخد إجازة نص السنة ويبدأ التيرم التاني ولسه النتيجة مظهرتش طبعا هي منتظرة تطوير الأداء ههههه بس انا دا أخري أنا مش ممكن أجرؤ اكلم بنت طبعا هتكسف هههه اه والله العظيم زي ما بقولكم كدا هتقولي طب مستني ايه هقولك هي تيجي تكلمني . اصبر بس أنا جايلك ف الكلام هههه المهم كان عندنا ف التيرم الاول ف اعدادي هندسه 6 مواد منهم 3 مواد متصلة اللي هم الرسم والميكانيكا والفيزياء متهيألي و 3 منفصلة اللي هم الحاسب الآلي والهندسة الوصفية وتقريبا لغة .. المهم السنة دي كانت النتيجة وحشة ف اتاخرت المهم احنا مكملين بقى ف التيرم التاني لحد ما جه معاد الامتحان الشفوي طبعا الامتحان الشفوي دا بيدخل مجموعات صغيرة وبعدين يدخل على الدوك واحد واحد بيكون قدامه كذا سؤال ف ورق مقلوب بتختار سؤال وبعدين تجاوب ويناقشك فيه المهم اول يوم ف امتحان الشفوي ظهرت النتيجة ولأنها كانت وحشة قرروا تظهر فقط 3 مواد المنفصلة والمتصلة يخلوها نهاية التيرم على أمل التيرم التاني يحسن الاول وانا بالصلاة على النبي كدا شيلت مادتين من التلاتة ههههههه أنا حصلي صدمة الواد الفتك بقى اللي على طول من الاوائل هيسقط هههه المهم هنا أنا قلت ف عقل بالي اكيد علشان انت بقيت قليل الادب وانشغلت بالبنات هههه واصلا كل الدفعة كانت متنيلة انجي نفسها كانت شايلة مادتين ض.ج . وبعدين احنا الاتنين نجحنا اصلا وانا درجات الرأفة رفعت المادتين ونجحت بس كنت خلاص اخدت القرار المهم ف نفس اليوم اللي ظهرت فيه النتيجة كان عندنا
امتحان الشفوي وللحظ دخلنا مجموعة صغيرة وكانت انجي معايا ف مجموعتي اليوم دا البنت ماشاء الله كانت قمر هي كانت بيضا وحمرا وعيونها ملونة وكانت بشعرها طبعا سايح ونايح وعملاه قصير كدا ولبسها بقى حاجه من بتاعة البندركدا ههههههههه المهم انا دخلت الامتحان الاول وخلصت ولما خرجت جت اللحظة اللي مستنيها من اول السنة هنا قررت انجي أنها تكلمني وهقول حاجه أنا كنت متأكد انها هتيجي تكلمني ههههه المهم انا خرجت وقفت جنب الشباك فهي جت عليا وقالتلي ازيك يا باشمهندس هو الدوك بيسأل في ايه وهنا المخ القروي الساذج حكم ف قلتلها بمنتهى قلة الذوق والجليطة عامدا متعمدا معرفش اسألي حد تاني هههه وعنها ومن يومها كانت بتعاملني كأني حجر وايام بسيطة وانا تخصصت ف الميكانيكا وهي تخصصت عمارة وما شوفت انجي تاني غير يوم بالصدفة عند محطة القطار واحنا ف بكالوريوس ولما بصينا لبعض ضحكنا بس وقتها مكنتش أنا لسه ذلك الشاب القروي الساذج واكتشفت أنها اصلا مش الاستايل اللي ممكن اعجب بيه ههه بس خلاص