فضلت أموت بجوع قلبي ولاجيك
محتاج لك أكثر وأكثر من أوّل
في ذمتي محتاج لك بس مابيك
لو أنك غذاء للقلب وأنت المموّل
فضلت أموت بجوع قلبي ولاجيك
مانيب شاحت حب جيت آتسوّل
يغنيني الله عن وصالك وطاريك
جرحي كبير وفي حشايا تجوّل
وحالي تردت من سبايب تغلّيك
قد شفت منك ما يشيب ويهوّل
شكوى لغير الله مذلة وتمليك
لأني كتوم وما أحب التقوّل
سري دفنته بالضلوع المهاليك
في صمت أحبك لو عذابي يطوّل
يكفيني أتسلى بذكرك وماضيك
حتى عيوني لو تشوفك تأوّل
وحدة تبي بعدك .. ووحدة تناديك
يا قلب غنّي في فراقه وموّل
حتى ولو كانت حزينة أغ****
راح الزمان وكل ماضي تحوّل
ولانيب قايل غير الله يهنيك
في ذمتي محتاجك أكثر من أوّل
جداً أنا محتاج لك .. بس مابيك
م ن