منتديات مسك الغلا | al2la.com - عرض مشاركة واحدة

**شاعر العرب** · 04-16-24, 04:59 PM

بسم الله الرحمن الرحيم

وهذا هو نص مين انت كُتِب على بحر البسيط - الهجيني - وفي الحقيقه
سبب اختيار البحر للايحاء بالبساطه وللامبالاه عكس النص الأول الذي كتب
على المسحوب وكأنه يشير الى الترميز وعلاقة النص بالوزن
والنصين من ديوان الظل القادم ان شاء الله

اتمنى قراءة ممتعه وايضا تعليقاتكم لا خلا ولا عدم

( مين أنت ! )

مليت من دورة الدنيا بليالينا
وان كنت تدري وش الحاصل ففهّمنا ؟!

اللي سقيناه صافي الماء يسقينا
مر الليالي الى الأحزان سلّمنا

في الحب ياما تعذبنا وأعطينا
ليتك على قدر ماتاخذ تحشّمنا

ياقايد الريم جَامَلْنَا وَمَلِّيْنَا
مغرور في طبعك الاول تجهّمنا

مين انت حتى من الحرمان عانينا !
والا انت تبطي شحم لو ما تكلّمنا

كنا نحبك على ماقد تربينا
والحب لولا الكرامه ما تعشّمنا

في شاطي الغدر لا ساحل ولا مينا
امواج بحر الأماني كم تلطّمنا

ماقلت لي في مشاعرنا تمادينا
في كل لحظة صفا دايم تلوّمنا

ان ماتغديت من حزنك تعشينا
وان ماتقهويت في وصلك تألّمنا

تدري وهذي صنايعنا بايادينا
نحب ناس لها قدره تندّمنا

ويش انت ياللي جروحك ثاوين فينا
بيض المشاعر تبي فينا تعدّمنا

تقول انك بارض الحب تهدينا
قفرا وانا اشوف بيدينك تهدّمنا

شاب الشعر في ليالي الحب ومشينا
والحين يوم ارتخى عودي تعلّمنا

ياجاهل العشق ان العشق ماضينا
بالفرح والا الحزن كنا تنعّمنا

قبلك وفينا لمن قد كان يحيينا
يكفيك غش العسل مابي تسمّمنا

في زورق الهم ماتجمع مآسينا
للبحر والا الصبر كنا تكتّمنا

ماذكر بنينا ولا لحظة أمانينا
ماذكر مع الحب قد كنا تحلّمنا

اللي يحبك وغنالك اغانينا
حللت هجره ووصلك قد تحرّمنا

ماعاد باقي مع العشره بتشقينا
جات العزايم بليله ما تولّمنا

نحن انتهينا قبل تبدا تهانينا
على النهاية اخيرا قد تقدّمنا

وسلامتكم

بقلم

شاعر العرب