قرأت بمدونة اختنا العسل الاسود اخ بقى لو شوية طحينة وفطيرة مشلتتة بالسمن البلدي وحتة جبنة قديمة
ياختتتتي فطور كيلوباترا هههه نرجع للتدوينة بالمناسبة اسم المدونة حلو ضحك ولعب وجد وحب وعميق على
قد بساطته ..

هي كانت بتتكلم باختصار عن ابتذال كلمات الاغاني المنتشرة اليومين دول وان دا بدون رقابة ممكن يعمل مشكلة
وتشوه في تركية الجيل ..

طبعا أنا مع كل كلمة ف التدوينة بشكل كامل بس هنا عاوز اقول ان الموضوع دا مش مستحدث
بالعكس دا من زمان وان التربية على القدرة على الاختيار السليم هو الحل ..

يعني مثلا كان منتشر ايام ما كنت أنا في فترة المراهقة اغاني اسوء بكتير

كانت واحدة بتغنى وتقول حط النقط على الحروف قبل ما نطلع سوا للروف

وانا شخصيا اسمي استعمل ف اغنية من دي حيث قالت احداهن احمممممد الشبشب ضاع

كان فيه بلاوي والله دا غير جاد شويري واسهاماته الحثيثة في إفساد الجيل هذا وقت المراهقة

طيب بلاش دا هل أهل زمان الجدود والاباء مكنش عندهم اغاني بكلمات مبتذلة زي كدا وكان حالهم

احسن مننا ابسليوتلي ههههه دي اغانيهم الشعبية معظمها +18

انا بفضل الله عندي ذاكرة قوية وبحكم اني نشأة ريفية ف الاغاني المتداولة ف الافراح وانا صغير
واللي كانت من عهد الآباء والأجداد كانت من نوعية

يا منجد على المرتبة واعمل حساب الشقلبة وكمان امممم هزيها يا صفيحة الجاز و.... ما علينا ههههه

حتى اسمي تم استخدامه بردو ف حبيبي يا احمد يالي ع الجبهة احمد ما جاشي لا لا ولا خدله بوسة لالا من قعر الكوسة لالا ... واه لو فسرت المقصود بقعر الكوسة هههههه اخراااااشي

نهاية القول إن الاغاني المبتذلة اللي فيها كلمات تدل على التحرش موجوده ف كل زمن الرك زي ما بيقولوا على
تربية ناس تقدر تفرق وتختار صح بين الغث والسمين .. بس خلاص