الحلقة الثانية


- هذي زوجتي مها .. وهذي اختي مناير .. وهذي بنتي نوره وهذا محمد وفهد اولادي
الحقيقة وهو قاعد يعرفني بعائلته كنت مندهشا .. وقلت في خاطري ليش يعرّفني بأسماء زوجته واخته واولاده وش المناسبة ..؟؟!!!
حسيت من كلام الرجال ان الفيوز عنده ضاربه هههههههههههههه يعني عقله ضعيف .. وانا في هذا الهوجاس .. اكمل حديثه وقال :
- وانا اخوك الدكتور / سعود بن فهد ............... دكتوراه في علم النفس
أصابني الذهول لما سمعت كلمة الدكتور ... ورديت بسرعة


-تشرفنا يا دكتور .. الله يطول بعمرك
- الله يشرف مقدارك .. طبعا انت قلت في نفسك ليش هالرجال قاعد يعرفني باسم زوجته واخته واولاده .. وش المناسبة .. ويمكن قلت في نفسك ان هذا الرجال فيه خفة والا شئ ..!! صح ...
- والله يا دكتور ههههه كأنك تقرأ افكاري
- لا يا حبيبي مش قرأت افكار .. المسألة هذي طبيعية جدا .. وما تحتاج قرأت افكار .. احنا للاسف شعب صرنا نعادي الطبيعة ونعادي الافكار الواضحة والشفافة .. صرنا نحب اللكاعة .. الكذب .. الاقنعة ..
- كيف.... وش قصدك يا دكتور ..؟؟!!
- والله يا استاذ .... عفوا ما عرفتني بنفسك ..
- انا ... ناصر ............
- شفت مثل ما قلت لك يا استاذ / ناصر .. قلت لك وش اسمك .. اعطيتني اسمك الاول وبس .. وهذا مؤشر يقول لي انك متحفظ كثير .. وايضا من ناحية اخرى ... اني انا ما اني متأكد ان كان اسمك ناصر او لا .. وهذا اللي اقصده يا اخوي / ناصر .. احنا صارت عندنا ... عدم الثقة مبدأ .... وكأننا نثبت التهمة على الاخرين حتى يثبت لنا العكس .. عموما هذي فلسفة مجتمع ....
ويمكن اقول انها قناعة شخصية عندي ، اصبحنا مشاعر ووجوه مقنعة فيما بيننا حتى مع اقرب القريبين لنا ...!!! والدليل حينما قلت لك بكل شفافية وبراءة اسماء عائلتي مع ان الهدف من ذلك اعطاك الاطمئنان .. واكثر من ذلك اغرس فيك غرس مختلف عن الوضع القائم في المجتمع ...!!!!
- يا دكتور ... انت شكلك جالس تلقى محاضرة في المفاهيم والقناعات ..
- يا سيدي .. هناك اشياء كثيرة صارت مؤثرة على ارواحنا وهي بسيطة .. ولكننا جعلناها ثقيلة من خلال مفاهيمنا وقناعاتنا المعكوسة والمريضة ..
- يا دكتور .. شوي شوي على اخوك الصغير علشان بس امشي معك في نفس الاتجاه ..
- هههههههههههههههه .. قول ..
- اقول يا طويل العمر .. انت تؤمن بان الانسان يمكن يفتح قلبه لكل شخص يقابله .. ويعطيه سده ..!!؟
- ههههه .. طيب ممتاز ... احنا وصلنا الى نقطة الالتقاء الان .. وش هو السد .. بالنسبة لنا ..؟؟!! ما هي حدود المعرفة والمعلومات التي ممكن امنحها للاخر مع اول لقاء ..!! هل اسمي واسم عائلتي سد .. هل وظيفتي سد .. هل معلومات اولادي سد .. هل بعض المعلومات العامة سد .. ؟؟
- والله يا دكتور ... ما ادري وش اقول لك ..!! بس .. الحقيقة الكلام اللي تقوله يمكن يعطي مؤشرات لبحث اليات تعامل المجتمع فيما بين افراده ..
- ممتاز يا ناصر بالضبط .. وهذا بحثي القادم [ آليات تعامل المجتمع ...]
- كيف ..!!!؟
- ايه نعم بحثي القادم هو مهتم في ثقافتنا او خلنا نقول في عاداتنا المتأصلة والتي تحولت الى قناعات بل اصبحت عبادات نعطيها اهتمام اكثر من عبادة الله عز وجل ..... [ عفوا ..] ترانا قريبين من البيت .. احنا في اول حي في الجبيل ...
توقف الحديث بيني وبين الدكتور عند مدخل مدينة الجبيل بسبب انه جلس يوصف لي مكان البيت ... بعد تقريبا 10 دقايق وصلنا البيت .. وعند النزول كان هذا الحديث ..

- تفضل اخوي ناصر ..
- الله يتفضل عليك يا طويل العمر .. اللحين الساعة ثلاث ونص .. والظاهر ان اذان الفجر قريب .. وانا عندي اشغالي ... الله يحفظك ..
- على الاقل خذ لك كاس ماي ... بلل بها ريقك ..
- الله يحفظك يا دكتور ... تسلم .. الله يعافيك ..
- طيب .. انا عاجز عن الشكر اخوي ناصر على فزعتك معنا والشهادة لله انني حللت شخصيتك من اول ما وقفت بسيارتك وقعدت جالس بالسيارة .. عموما .. ما ودي اطوّل عليك .. خذ رقم جوالي واتصل عليّ ...عطني رنة علشان احفظ جوالك عندي .. وارجوك ما تردني بكرة غداك عندي ...
- والله يا طويل العمر .. بكره يمكن ما اكون موجود في الجبيل .. اذا خلصت عملي اليوم .. فانا ان شاء الله بارجع للرياض ...
- طيب ... نخليه عشاء اليوم ... وش رأيك ..!.؟
- والله يا دكتور لعلك تعذرني ... اخاف ارتبط معك ويكون عندي شغل ولا اقدر اجيك ...!
- شوف يا ابن الحلال .. اختر لك واحد من اثنين يا عشاء اليوم يا غداء بكره ...
- هههههههههههه .. لا .. انا عندي خيار ثالث .. اني استودعك الله الذي لا تضيع ودائعه ... وعندي رقم جوالك وهذي رنة علشان تحفظ جوالي عندك ... وبيننا ان شاء الله اتصال في وقت اوسع .. وش رأيك ..!!؟
- شوف اخوي ناصر .. هذا الموضوع ما فيه خيار ثالث هههههههههه .. وانا والله ابيك في شغله .. وترى الوقت متأخر مو وقت نقاش .. رح اللحين الله يسهل عليك .. نام وكمل اشغالك وبعد صلاة المغرب راح اتصل عليك علشان تأكد لي أي وقت اخترت .. وترى ما في الموضوع كلافه ... شغل بيت ..!!
- ان شاء الله .. في امان الله ..
- في امان الله اخوي ..
بعد ما مشيت بالسيارة كنت افكّر في الموضوع من كل الجوانب .. واخذ مني مساحة تفكير طول الطريق حتى وصلت الى مكان السكن اللي انا حاجز فيه ..
بعد ما صليت الفجر .. طلبت من موظف الاستقبال في الفندق يصحيني على الساعة 11 علشان اقدر اخلّص اشغالي .. فعلا قمت الساعة 11 وكانت مهمتي في العمل ما تأخذ اكثر من ساعتين .. جلست لانجاز المهمة تقريبا حتى الساعة 4 عصرا تقريبا .. رجعت للفندق وانا منهك تماما واشعر بالحاجة الى الاكل والنوم ..
تغديت غداء خفيف .. وبعدها دخلت في نوم عميق .. ولم اشعر الاّ والجوال يرن ..
استيقظت من النوم في حدود الساعة 7 مساءا ..