٢٠١٦

تتوالى السنوات ،، و نشوف ناس جديدة و نعرف ناس جديدة و نفارق ناس ،،
اسوء شي في عملنا ،، حركة التنقلات اللي تصير ،،
اول مره طلعت من مكاني و نقلت مكان ثاني ما ابالغ اني كنت بموت من الصياح
انفطر قلبي ،، على المكان على الصحبه الطيبه اللي للحين اتشرف فيهم
هذاك المكان كان بالنسبه لي غيير غييير ،، شيء اقدر اعبر عنه و شيء ما اقدر
صارت لي في نفس المكان تغيرات عجيبه ف حياتي ،، ف الحزن و الفرح ،، ف الحب و الكره
شيء ما تتخيلونه ،،
معروف عني اني احب هالمكان اللي انا فيه الحين ،، تربطني فيه علاقة روحيه
<- شوي و تبكي خخخ

المهم اكمل لكم ،،
بعد ما جلست فيه اربع سنوات نقلت مكان ثاني ،، اول ما جيتهم قالوا لي كنك ما تبيننا
احساسي يبان و شعوري يبان ما اقدر اخفيه ،، بعدها حبيتهم تعلقت فيهم ،،
كل وحده فيهم لها مكانه خاصه ،، و فرحني هناك ان فيه بنات ما تثق بأحد و لا تعطي اسرارها لأحد
و قالت لي كل شيء عنها ،، و صرحت لي انها عمرها ما اعطت سرها لأحد ،، و هذا زادني فخر بنفسي
كلهم حبيتهم من كل قلبي <- القلب فندق خخخ
جلست عندهم خمس سنوات ،، بعدها جا نقلي للمكان اللي انولدت فيه ،،
زعلت : " ليه انقل " ، " انا ابيكم " ،، و من هالكلام ،، هو نفس شعوري اول مره نقلت
سبحان الله الانسان يجفل من التغيير ،، و انا ما اخاف منه بس ما احبه ،،
جيت للمكان اللي حبيته .. صح المجموعه كانت مختلفه لكن قلوبهم حلوه
او بالاصح انا اشوف دايم قلوب الناس حلوه ،،
" اظهر اجمل مافيك ،، ترا القلوب جميله "

من اول سنه جلست عندهم ،، جت اخر السنه و جات اسماء المنقولين <- سخافه
ودعنا ثنتين من البنات ،، كلهم يبون يرتاحون من المكان ،،
لان المكان اللي انا فيه الآن قوي و لا يستحمله الا الاقوياء ،، و انا الحمدلله اقدر اجلس فيه الزمن كله

وحدة منهم اصغر مني بعشر سنوات ،، البنت مو على سجيتها و بس ،، بنت مؤدبه متربيه
بنت اخلاقها عاليه ،، و اخر يوم طول وقتها و هي تبكي ،، كل ما ضميتها بكت
كل ما كلمناها بكت ،، " خلاص ي بنت لا عاد اشوف دمعتك "
كانت بتخليني ابكي و انا مافيني دموع خخ <- كيف تجي مدري ..
بس الاصح اني ما احب دموع الفراق ..

اخر شي جلست انا وهي ووحده صديقتنا ،، الثلاثي كان جميل ،، انا و " د" و " أ "
والله ما ابالغ ان قلت اني حبيتهم من كل قلبي ،، تمنيت نجلس سوى فتره اطول
يعجبوني الناس اللي قلوبهم بيضاء و على نياتهم ،، اتعلق فيهم بشكل مو طبيعي

المهم البنت من كثر ما تبكي ،، قمت احكيها كيف انا تنقلت و رحت وجيت و حبيت بنات كثير
و قلت لها لسى الدنيا قدامك لسى بتشوفين ،، لا تخلين دمعتك تنزل على اي شي ،،
دايم خلي عينك على الشيء الطيب ف الناس و تغافلي عن السيء لو هو ما يمسّك
اكتسبي خبرات و طبايع الناس الحلوه
و مدامنا عايشين مصيرنا نتقابل ،، و اذا اخذنا الموت نكون كسبنا ناس تدعي لنا بالخير

بس نبهتها على شيء ،، قلت شوفي ترا انا وحده ما استحي على وجهي
انا ما اكلم و لا ارسل و لا شي ،، بس ان تجمعتو دقو علي و انا اجيكم طيران
اعز بنات كثير بس مشكلتي ما احب التلفون ،،

و لازم تفهمين الشيء هذا عشان ما تزعلين مني <- كل وحده تعرفني لازم تعرف هذا الشيء
عشان ما اخسر احد احبه

بس الامل في قلبي دايم كبير ، دايم احس ان اللي جاي افضل من اللي راح ،،
صح اني مقصرة مع الله كثير بس احسه يحبني يقرب لي الخير ،،
يقويني ، يزيدني قوة و صلابه شيء عجيب و الله
الله يقويني على طاعته و عبادته ،، ابي ادخل الجنه ،، <- هذي اعظم امنياتي

امس كان احتفالنا بالبنت اللي بتنقل و المديره كانت اجازه و اصرت انها تجي و جاتنا
بس الشيء اللي ما توقعته منها ،، انها تجيب لنا هدايا تقدير و شكر بنهاية سنه عظيمه
سنه انجازات و تحقيق مستهدفات .. لان المكان زي ما قلت لكم ما يجلس فيه الا القوي

بوريكم وش جابت



اول ما عطتني الكيس ،، شكرتها و قلت لها وجودي معك هو الفخر و من زمان كنت اتمنى اشتغل معك
قلت ف نفسي من محل اكسسوارات و انا ما تستهويني الاكسسوارات بس قبلت الهديه بصدر رحب
و ما فتحتها ،، جلسنا شوي الا قالت افتحو الهدايا و شوفوها ..
يوم فتحتها و شفت الاجنده عليها اسمي و الميداليه عليها عبارة لي و بإسمي
انا هنا كنت ببكي بس الدموع ما تطلع ،، شكرتها بكل ما اوتيت من قوه و سلمت عليها
احب الهدايا اللي تكون بإسمي ،، لها مكانه خاصه

ادعي للبنات اللي فارقونا بالخير ،، و البنات اللي بجلس معهم الثلاث سنوات الجايه اذا ربي احياني
فيهم الخير و البركه ،،
ارجع اقولكم كل ما كان قلبك ابيض و صافي للناس ،، قلوب الناس تنفتح لك و يحبونك
المشاعر اليوم جياشه ،، الحروف تنكتب و انا ما احس فيها ،،
و الصباح يزيد المشاعر رهافه و رقه ،، الله يرزقكم اطيب و اجمل النعم ،،
و نتقابل ان شاءالله في الجنه و نضحك على ايام عشناها ف الدنيا و نقول ياسخفنا
كنا نبكي و نزعل على اشياء تافهه ،، كنا نضايق ناس و نزعل ناس و ننسى ان الدنيا زايله
كلام ف قلبي و حبيت اعبر عنه ،، و لو اختفيت اعرفوا اني عند الكريم جزيل العطايا
بس ابي دعواتكم تخفف عني تفرحني ،،