من بداية افتتاح هذه المدونه المباركه
كان كل مايطرح فيها إنتاج محلي
لامجال للاقتباس أبدا
أهلنا قديما لديهم مثل " حلاة الثوب رقعته منه وفيه "

المهم قررت أقطف من بساتين الشعر ورداً نديا أزين به هذه المدونه القاحله

لكن عهداً أن أذيل كل قصيده باسم صاحبها

عوض بن شفلوت

شاعر تمتلىء قصائده بالحكمه
طبعا طريقة إلقائه للقصيده عذب جداً

يقول الشاعر

تردنا الشيمه مع من ترده
من قولة انجزها وعجّل عليها

وجميلنا اللي نفعله مانعده
حتى لو ان الأحوال فيها وفيها

ليا غرسنا غرسة يوم شده
ماحنّ بنقعد كل يوم نجيها

ليا اثمرت زدنا الموده موده
وان كان ماتت قبرها يحتريها

فكم من حصان كان وده ووده
ماجت له الدنيا على مايبيها


،،،،

أبدع وربي

يسلبني شعر الحكمه الرصين
ودي لو كان عندي "طولة نفس "الجادل
وأحلل الأبيات تحليل دقيق

الموهيم روحو لليوتوب أسمعوها بصوته

إليكم الرائعه الثانيه لذات الشاعر

خطوة الإنسان



انا اشهد ان خطوة الإنسان مكتوبه
لاشك مايصير شي إلا وله سِبْه

كلٍ على مافعل يجيه ماجوبه
من يمدحه يمدحه ومن سبه يسبه

وراعي البصيره يسير ويدري وشهوبه
في عقله منبه وفي قلبه منبه

اسمع تجاريبه وخلك على ماجوبه
مايجيبلك الدّره الاّ سابح الغبّه

باب الهوى اللي يخلي النفس ألعوبه
حاول تقفله بالمفتاح والضبّه

ماتبغضه تبغضه ماعادك بصوبه
لاعاده يطبك ولاعادك تطبَه

الموت في اللي يغطي حبه عيوبه
ماهو يضرك سوى اللي نفسك تحبه

راجع حساب الضرر في كل مرغوبه
ومن بان لك علته يسهل معه طبّه

ترى اعتدال الرجل في ساير دروبه
يخيره فأي ريعٍ وده يذبّه

مايشقي الآدمي شيٍ سوى ذنوبه
ومايسعده شيٍ مثل القرب من ربه

عوض بن شفلوت

المعزوفه الثالثه لذات الشاعر

الفرصه السانحه


الفرصه السانحه بادر لها لاتفوت
وان كان فاتت فلا تطرد ورى الفايته

ولايزين الكلام إلا يزين السكوت
ولكل حال له وقته وله غايته

فلا تجيب الكلام الا عليه الثبوت
مايبعث الله نبي الا ومعه آيته

ولاتعيد الكلام وتبعث اللي يموت
ماتستيغ الرجال اللقمه البايته

إما انك تنقد ذهب والا انك تبقى صموت
من يلزم الصمت مايدْرى وش حكايته

وان كان شفت السوالف في المجالس شتوت
فلا تسرح الصامله في مرتع الهايته

وترى أول العمر فوت وتالي العمر موت
ومن فاتته بدايته لاتفوته نهايته


عوض بن شفلوت

أعود وأنصح الجميع بالعوده لليوتوب لسماعها بصوته

ستطربكم حتما أبياته وطريقة إلقائه

أتمنى تكون ذائقتي الشعريه الليله نالت إعجابكم

وقريبا لي عوده مع قصائد وشعراء آخرين

يسعد صباحكم

ماعندي جديد أبداً

داخله " أشيك " على إنارة المدونه اذا مطفيه والا نسيتها

ويكند سعيد مقدماً