إحدى أكتر الشغلات الي وعيت عليها بكير بحياتي وأثرت فيي وعملت زي عرقلة لتفكيري والمسار الي رح أمشي فيه بحياتي ،الي هو وعي العالم الي حواليي ،كيف الدنيا ماشية.
من بكير إكتشفت النظام الرأسمالي المأساوي الي نحنا عايشين فيه ،لإني بيوم من الأيام مثلا سألت نفسي ،ليش هالقد الدنيا صعبة؟ معقول هاد الحكي صح! لحد ما اكتشفت انه مش مفروض لهدرجة هاي ،الصعوبة موجودة ولكن الي عم يصير تعقيد خارج عن النطاق المعقول .

النظام الرأسمالي أحد أحقر الإختيارات الي اتخذتها البشرية ،واسمه الحلو المزركش ما لازم يخليك تغض النظر عن بشاعته ،وإنه ما بفرق عن الإشتراكية والشيوعية والعلمانية ،كله سيء بغض النظر عن اختلاف أهدافهم واتجاهاتهم ،كلهم نتائجهم جدا فردية بحيث تفيد طبقة معينة من المجتمع فقط ....

سبب كرهي الشديد لهاد النظام ،طريقته في تحييد الإنسان غصب عنه خلال حياته وفعلا ممكن يبذل جهود كتيرة وبرضه ما يجيب نتيجه،بكرهه لإنه نجح بتقسيم المجتمع لطبقتين ،الطبقة ذات الثراء الفاحش الي فش أي نوع من أنواع الرقابة على الأفعال والممارسات القذرة الي بتقوم فيها ،والطبقة الكادحة المعدومة المظلومة الي حياتهم عبارة عن استعباد ودفع ضرائب.

النظام هاد بربي النرجسية والأنانية بطريقة راسخة ومتجذرة بأفراد المجتمع ،لدرجة إنه الشخص الي طيب صار يعتبر غلط،أو على قولة البعض أهبل، صار ازا الواحد ما مشي على غيره ما يرضى لإنه ازا هو ما مشي ،رح ينمشى عليه.

النظام الرأسمالي بضيع الفرص وبحيد الواحد ،وبرجع الشخص كل فترة لنقطة الصفر مهما خطى خطوات ...

النظام الرأسمالي منخرط بشكل فظيع في المجتمع وعم يخرب كل ما تبقى من فتافيت للكادحين ،دخل على التعليم وخربه وداخل على نظام الشغل وخربه ،وبيعمل على حرمان الفرد من جميع أنواع الترفيه ،وبضله يلف حواليه ويحذره من الإعتراض عليه لإنه رح يفترسه.

النظام الرأسمالي يربي عبيد ويصنع النرجسية ويفتك بالمجتمع ويدمر الأخلاق....

الأسوء من هيك هو الفئة الي بتتعرضله ،وجهلها بالموضوع ورفضها الخروج منه ، جهلها وتحويل أنظارها لأمور جدا تافهة ومواضيع ما إلها طعمة ،مثل الشعب العربي الغارق فقط بالكلام عن المرأة وتذكر الزمن الجميل الي هو أصلا خرب بيتنا نتيجة الجهل الي كان متخلله ،والحسرة على الفشل السياسي الي حققوه خلال العقود الماضية.

من أكثر الدلائل على فشل هاد النظام ،هو ظهور العيوب بالطبقتين الي كونهم ،أولا بالطبقة الغنية المفروض عايشة حياتها بالرغيد والنعيم ولكن بالحقيقة مليئة بالقذارة والمخدرات والجهل، والطبقة الفقيرة الي مفروض يكونوا متفائلين يحسنوا من حالهم للأفضل ويتصرفوا كعبيد مطيعين زي ما بدها الرأسمالية ولكن بالمقابل عم ترتفع الجرائم والشوائب بهاي الطبقة.........

لا تكون عبد للرأسمالية ولا تاخد أفكارك ومعتقداتك مسلمات ومن الناس ،عادي سمعت اشي من منطقي اعترض ،فكر ،لا تكون روبوت ممل .

عسى نهاية اشواقي بقربك

تفقد الرغبات قيمتها حين نُلحّ في طلبها،
حين نطلبها بالأساس، فتجيء منقوصة باهتة، وقد كانت أقصى أمانينا .