يوم شم النسيم
كنا نصحى من النوم بدري اركب العجلة بتاعتي واطلع على قرية مجاورة اشتري الوان كانت بتيجي بودر كدا بالالوان الأساسية احمر واخضر وازرق وبعدين نعمل لها محلول بميه دافيه علشان تبقى جاهزة ..
امي ربنا يديها الصحة تسلق لنا البيض وانا بقى اتولى عملية التلوين ليا ولاخواتي وبعد اما اخلص
أختي الكبيرة كانت شاطرة ف الرسم زي ايف كدا وهي كمان مدرسة رسم أنا لما كنت ارسم ارنب كان يطلع حمار هههههه أخري يا دوب الرسم الهندسي.. كنا نجمع بقى البيض الملون مع فاكهة موز وخوخ تاني حاجه مهمة ف اليوم دا هي الطعمية هههه طبعا معظم الناس بتكون حصدت الفول اللي بيتزرع مع البرسيم وتجيب معاه البصل الاخضر وتطحنهم أو تفرمهم ولازم ناكل طعمية ف اليوم دا وطبعا الغدا كان لازم ولابد من وجود السمك المملح طبعا بيتنا كله مفيش حد بيحب الفسيخ ف كان اخرنا الرنجة وطبعا نطلع بعد العصر على الغيطان نعمل مرجيحة على الشجرة وناكل ونلعب باقي اليوم هييييييح يا جدعان لقد هرمنا بحق ههههه

ساحر يتوب اممممممم

ساحر يتوب دي كتبتها زماااااان يمكن 2009 وقتها كنت بحب بنت جزائرية هههه كانت مشرفة القسم الادبي وقتها وكمان كانت مهندسة شاطرة القصة ان العلاقة كانت صداقة وهي كانت بتحكي ليا عن حبيب سابق وانا كنت بحبها لكن مقدرتش اقول غير من خلال الابيات دي ههههه

الجدير بالذكر أن العلاقة دي استمرت 7 سنوات تقريبا وما في يوم شوفتها أو سمعت صوتها ههه والاكتر أننا كنا اتفقنا على هجرة لفرنسا لكن الحاجة امي قالت لي لانت ابني ولا اعرفك هييييح سي لا في .. اليكم ساحر يتوب

سَاحِرٌ يَتُوْب
عَن عِشقِ الْقُلُوْب
يُسْدِل الْسِّتَار
يُعْلِن الْهُرُوب
يَبْدُو كَالْمَلَاك
وَيُوْرِد الْهَلَاك
وَمَن رِمْش الْعُيُوْن
يُعْزَل الْشِّبَاك
تَقْتُلَنِي الْظُّنُوْن
اهَوَاه بِجُنُوْن
اذُوِب ف هَوَاه
وَقَلْبُه يَخُوْن
اه الْف اه
يَا قَلْب دْوَاه
ضَمّة الْحَبِيْب
وَرَحِيْق الْشِّفَاه
سَئِمْت الْسُّكُوْت
وَالْصَّوْت الْخَفُوْت
بِكَلِمَة هَوَاه
انْطِق او امُوُت
يُعْطِيَك الْنَّعِيم
بِجُرْحٍ الْيَم
وَيَسْقِيْك الْحَنَان
مِن كَأْس الْجَحِيْم
يَأْكُلُنِي الْحَرِيْق
يَرَانِي صَدِيْق
يَحْكِي عَن حَبِيْب
فِي عِشْقِه غَرِيْق
يُلْجِمُني الْعَذَاب
يَهْدِيَنِي الْحِرَاب
اقْسِم لَن اعَوْد
وَأُدْمِن الْذَّهَاب
لَا يَا قَلْبِي لَا
لَا تُبْدِي هَوَاه
فَظُلْم الْحَبِيْب
قَد فَاق مَدَاه
فَلَتَجُرّي الْدُّمُوْع
وَلْتُحْرَق ضُلُوْع
ابَدَا لَن اعَوْد
لِذُل الْخُضُوْع

اي حد عنده ذرة مخ هيفهم أن مصر وقطر هم الداعم السياسي واللوجيستي الاول لحماس
وكل اللي بيتعمل عكس كدا شغل نصب م الاخر

ما علينا اصلا أنا مش بحب اتكلم ف السياسية ابدا .. صباحكم بيضحك

بمناسبة أن اليوم اخونا احمد المدير اهداني وسام مش عارف بصراحة اكيد علشان أنا كمان اسمي احمد هههه بالمناسبة دي بقى تذكرت مواقف محرجة مرت بحياتي ومن أكثرها موقف صار ليا وقت ما كنت بالجيش بالمناسبة أنا لازالت على قوة الاحتياطي ضابط بسلاح المهندسين العسكريين ربنا يسهل احنا جاهزين اهو نحمل سلاحنا ف لحظة ، المهم طبعا بعد تخرجي من الكلية العسكرية بعد 9 شهور شوفت فيهم عذاب اشكال وعلقنا النجمتين فوق الزاباليط ههههه تم توزيعي على الوحدة اللي هخدم فيها وهناك كان ليا زمايل من الضباط العاملين خرجين فنية عسكرية ودول كنا نسميهم صفوة الصفوة ، ومعظمهم أبناء ضباط كبار وتعليم اجنبي وليلة كبيرة سعادتك هههه .. المهم بيوم خرجت مع أحدهم كنا بمأمورية بأحد المدن الساحلية المصرية الساحرة وخلصنا وطلعنا نتفسح بليل المهم روحنا مكان كان مشغل اغنية لجماعة من الأمريكيين ذو الأصول الأفريقية اصلا معرفش نوع الموسيقى لكن إيقاعها سريع ولزقة ف بالي كان العنوان والكلام الرئيسي فيها 3 كلمات أولهم فعل أمر هههههه وربنا ما هقولها هههه اصلا هي حاجة قلة ادب خالص مالص وانا معرفش معناها والله كنت لسه بريئ وقتها ماعرف المصطلحات القذرة دي ومش ممكن اتخيل أنها ممكن تصير اغنية ومشهوره لا وكمان تعجبني إيقاعها ههههه مش دي المشكلة..

المشكلة بقى أن رجعنا الوحدة بعدها بكام يوم وطلعنا اختبارات على مستوى الفرقة المدرعة كلها وحصل أن الجو قلب وكان فيه وقف تحركات وتجمعنا عدد كبير من الضباط في استراحة كبيرة نلعب تنس طاولة ونتكلم وكنت واقف مع عمرو وجت ف بالي الأغنية هههههه وبدأت بقى ادندن كل شوية واقول الكلام المهم عمرو يبص ليا ويبرق وانا ولا أنا هنا شوية واسخن اكتر وصوتي يعلى اكتر وانا بقى مندمج بقى بغنى بالعنجليزي ههههه ولقيت الناس بتبتسم ف لقيت عمرو بيقولي ف ودني احمد اسكت .. قلتله ليه يا جدع دي اغنية حلوة وانا حافظها قالي ابوس ايدك اسكت انت عارف معناها ايه ههههههههه قلتله هيكون ايه يعني الراجل قالي على المعنى وانا وشي بقى يجيب الوان الطيف مجتمعة وطلعت جري ع الحمام م الكسوف مخرجتش غير لما كل الناس مشيوا هههههه وعمرو بعدها مسكهالي هههه وحشني والله اعتقد صار مقدم الحين هيييييح يا دنيا

اجدها من اجمل ما كتبت



صدقيني يا صديقتي

لم اعتزل الناس يوماً

لكني أخشى الخُزلان

الآم الشوگ بأوردتي

اورثني رُهاب الأحضان

حُرّيَتي كألسنةِ اللهبِ

تُحَرّقُني

تُحاصرُني

تُوجهني لنعيمِ السجّان

وكأني فُلک ف البحرِ

الريحُ يُمزق أشرعتي

والبحر كالليثِ الهائج

امواجه تنهش في بدني

والشطُ كسرابٍ خادع

وانتحر بوسطي الرُبان

اصبحتُ كريشةِ فنانٍ

إقتُلعت منها الأهداب

وتبَخرَ زيتُ الألوان

وكعودٍ أضحى بلا وترٍ

هجرته يدُ الفنان

كالجسد يسير بلا روحٍ

وكأنه شبحُ الإنسان

لم اعتزل الناس صديقتي

لكن خبريني

اين ايامُ الطفولة

قبل ان تستوطننا الملاجئ

وتَركُلنا قدم الطُغيان

ونصبحُ بلا وطنٍ نحيا

وتعيشُ فينا الأوطان

صدقيني يا صديقتي

لم اعتزل الناس يوماً

لكني أخشى الخُزلان

هَدمنا بأيدينا منازل

يكسوها أريجُ الياسمينِ

وسكنا جحور الفئران

وقتلنا يَمَامُ فيافينا

ليُطربُنا نعيق ُُ الغربان

وركضنا نهربُ من سجنٍ

فذهبنا الى سجنٍ لكن

تتوارى عنه القضبان




الساحر الابيض 28/4/2017

طيب التدوينة دي لاخوتنا المتابعين

بمناسبة اغلاق قسم الالعاب ممكن نعمل لعبة حلوة كدا هنا كانت فكرة اخونا الغالي مزاح الغرام السعودي الاصيل ربنا يصلح حاله وييسر اموره من انقى الناس اللي صادفتها كنت بنفذها معاه بشكل اساسي ومعانا اختنا طيبة الذكر المستعجلة الشيخة ام ريال هههههه ربي يسعد ايامها اينما كانت .. وهي

اللغز والقصيد كانت الفكره هي لغز على هيئة ابيات من ابداع العضو باي لهجة تتكلم عن لغز معين ونشوف مين يحله ولا يجوز فيها النقل مطلقا من ابداعك وعلى هيئة قصيد

وكان فيها تفاعل مررررة حلو ههههه واهو تسلية دمها خفيف ومفيدة نوعا ما .. بفكر اعمل الموضوع دا هنا مثلا كل يومين ننزل لغز هنا في المساء ونشوف مين يعرف يحله

وليكن مثلا ايام الخميس والسبت والاثنين .. لو تلقيت تشجيع على البدأ بنفذ ان شاء الله